ម្សិិលមិញ… ភ្លៀងហែកមេឃ ចាក់ពន្លិចក្រុងភ្នំពេញ
រាជធានីភ្នំពេញ ៖ នៅវេលាថ្ងៃត្រង់ថ្ងៃទី២៨ កញ្ញា ក្រោយពីភ្លៀងបានធ្លាក់យ៉ាងគំហុក១មេធំ
រាជធានីភ្នំពេញ ៖ នៅវេលាថ្ងៃត្រង់ថ្ងៃទី២៨ កញ្ញា ក្រោយពីភ្លៀងបានធ្លាក់យ៉ាងគំហុក១មេធំ
រាជធានីភ្នំពេញ ៖ នៅវេលាថ្ងៃត្រង់ថ្ងៃទី២៨ កញ្ញា ក្រោយពីភ្លៀងបានធ្លាក់យ៉ាងគំហុក១មេធំ លើភូមិសាស្ត្ររាជធានីភ្នំពេញ បានបង្កឱ្យបណ្តាដងផ្លូវតូចធំទាំងឡាយ ត្រូវជន់លិចដោយជំនន់ទឹកភ្លៀង និងផ្លូវមួយចំនួនត្រូវកកស្ទះចរាចរណ៍យ៉ាងណែនណាន់តាន់តាប់ ធ្វើឱ្យអ្នកដែលធ្វើដំណើរមានការលំបាកជាខ្លាំង និងខ្លះបានបណ្តើរម៉ូតូលើផ្លូវដ៏វែងឆ្ងាយក្នុងជម្រៅទឹកលិចជិតដល់ចង្កេះ។ ទោះបីជាយ៉ាងណា នៅតំបន់មួយចំនួនភ្លៀងធ្លាក់ត្រូវតិចតួច និងមិនបណ្តាលឱ្យមានការជន់លិចខ្លាំងពេកទេ ។ តាមការកត់សម្គាល់ទឹកភ្លៀងលិចស្ទើរគ្រប់ខណ្ឌ ស្ទើរគ្រប់ផ្លូវក្នុងរាជធានីភ្នំពេញ ។ ប៉ុន្តែគ្រាន់តែលិចមិនយូរប៉ុណ្ណោះឆាប់ស្រកទៅវិញក្នុងរយៈពេល២ម៉ោងក្រោយភ្លៀងរាំង ។
ការធ្លាក់ភ្លៀងដូចគេហែកមេឃចាក់អស់ប្រមាណជាង១ម៉ោងនៅវេលាថ្ងៃត្រង់ គេឃើញកំណាត់ផ្លូវកម្ពុជាក្រោមចាប់ពីវិទ្យាល័យជាស៊ីម សន្ធរម៉ុកទៅទិសខាងលិច ត្រូវទឹកជន់លិចដែលកន្លែងខ្លះត្រឹមជង្គង់ ហើយបានធ្វើឱ្យយានយន្តមួយចំនួនបានបើកវាងទៅតាមបណ្តោយមហាវិថីសហព័ន្ធរុស្ស៊ី បណ្តាលឱ្យកកស្ទះយ៉ាងខ្លាំងលើកំណាត់ផ្លូវនេះ ។ បាតុភូតធម្មជាតិនេះអ្នកធ្វើដំណើរតាមម៉ូតូមួយចំនួនបានរលត់ម៉ូតូហើយបណ្តើរ ទៅរកជាង ។ ក្រៅពីផ្លូវកម្ពុជាក្រោម ក៏មានផ្លូវធំនិងតូចមួយចំនួនទៀត ក៏ត្រូវបានគេរាយការណ៍ថាត្រូវទឹកជន់លិច និងផ្លូវមួយចំនួនត្រូវបានអ្នកដំណើរជិះវាងទឹកជាហេតុបណ្តាលឱ្យផ្លូវ ធំមួយចំនួនដែលមិនលិចទឹកបានកកស្ទះចរាចណ៍ ដូចជាកំណាត់ផ្លូវម៉ៅសេទុង ត្រង់ស្តុបកោសដូងនិងផ្លូវលេខ២០០៤ក៏ត្រូវទឹកលិចយ៉ាងជ្រៅផងដែរ ។
ហើយអ្វីដែលមានការកត់សម្គាល់នោះគឺលូមួយនៅក្បែររបងសាលាណតប្រ៊ីដ ដែលជាលូខ្ពស់ជាងផ្លូវមានទឹកបាញ់ចេញពីលូប្រៀបដូចទឹកផុសឡើងលើ ។ ប៉ុន្តែនៅវេលាម៉ោងជាង៥ល្ងាចក៏ស្រាប់តែបាត់ លុះមើលទៅឃើញលូធំមួយបង្ហូរចេញពីក្នុងសាលានោះ ។ មិនមាននរណាម្នាក់ដឹងថាទឹកដែលបាញ់ចេញពីមាត់លូនោះហូរមកពីណានោះទេ ។ ការកត់សម្គាល់មួយទៀតដែរមានការបង្ហោះផ្សាយតៗគ្នានោះគឺរថយន្តឡង់គ្រីស្ស័រ១គ្រឿងដែលបើកកាត់ទឹកអែបរបងតាមផ្លូវលេខ៥៦៦បានផុងលូលិចក្បាលកប់លើផ្ទៃទឹកបះគូទឡើងលើ ។ ទោះបីយ៉ាងណាការជន់លិចមិនយូរប៉ុន្មាននោះទេ តែក្នុងរយៈពេលពី១ម៉ោងទៅ២ម៉ោងទឹកក៏បានស្រក ។
តាមព័ត៌មានឱ្យដឹងថាការជន់លិចរាជធានីភ្នំពេញ គឺបណ្តាលមកពីស្ថានភាពលូមួយចំនួនបានស្ទះដោយសារតែសំរាម និងដីនិងលូមួយចំនួនតូច ទឹកមិនអាចហូរទាន់រួមនឹងបរិមាណទឹកភ្លៀងខ្លាំង ។ ម្យ៉ាងវិញទៀតលូនិង ប្រឡាយមេនៅតំបន់មួយចំនួនដាក់ដូចជាមិនមានការយកចិត្តទុកដាក់ពីអាជ្ញាធរមូលដ្ឋានចុះទៅស្តារឡើយ ។
សម្រាប់ខណ្ឌពោធិ៍សែនជ័យផ្លូវ១ខ្សែនិងលំនៅឋានមួយចំនួននៅក្នុងភូមិសាស្ត្រ សង្កាត់កាកាប និង១ខ្សែទៀតស្ថិតនៅក្នុង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញត្រូវបានលិចទឹកក្រោយដែលមានភ្លៀងធ្លាក់រយៈពេលជិត១ម៉ោង កាលពីវេលាម៉ោង១និង៣០នាទីរសៀលថ្ងៃទី២៨ កញ្ញា ។ ការជន់លិចផ្លូវនេះបង្កការលំបាកដល់ការធ្វើដំណើរ ហើយក្រោយពេលរាំងភ្លៀងទឹកក៏មិនងាយនឹងស្រកទៅវិញភ្លាមៗនោះឡើយ ដោយសារតែប្រព័ន្ធលូចាស់ៗមានលក្ខណៈតូចព្រមទាំងមានការស្ទះ ឬក៏កន្លែងខ្លះទៀតគ្មានប្រព័ន្ធសម្រាប់បង្ហូរទឹកតែម្ដង ។
ដោយឡែក ផ្លូវមួយខ្សែគឺជាផ្លូវបេតុង ស្ថិតនៅជាប់របងរោងចក្រសួនឧស្សាហ៍កម្មកាណាឌីយ៉ា ស្ថិតនៅក្នុងភូមិត្រពាំងថ្លឹង២ សង្កាត់ចោមចៅ ខណ្ឌពោធិ៍សែនជ័យ ដែលផ្លូវមួយខ្សែនេះបានលិចច្រើនថ្ងៃកន្លងមកហើយ តាំងពីអំឡុងក្រោយថ្ងៃបុណ្យភ្ជុំបិណ្ឌមកម្លេ៉ះ ប៉ុន្តែនៅពេលមានភ្លៀងនាថ្ងៃដដែលនោះថែមទៀតបានធ្វើឱ្យលិចលង់ កាន់តែខ្លាំងឡើងដែលកន្លែងខ្លះមានជម្រៅត្រឹមភ្លៅ និងកន្លែងខ្លះទៀតមានជម្រៅត្រឹមជង្គង់ ។
ព្រោះជាតំបន់កំពុងអភិវឌ្ឍន៍ ក្រុមហ៊ុនអ្នកសាងសង់ផ្ទះបានចាក់ដីលុបបឹងត្រពាំងនិងថ្លុកជិតអស់ មិនតែប៉ុណ្ណោះបានចាក់ដីខ្ពស់ជាងផ្លូវថែមទៀតផង ។ ជាពិសេសនៅមិនទាន់មានប្រព័ន្ធលូបង្ហូរទឹកត្រឹមត្រូវនៅឡើយ ។ ដូច្នេះផ្លូវមួយនេះគ្មានសង្ឃឹមថានិងអាចស្រកទៅវិញត្រឹម១ថ្ងៃឬ២ថ្ងៃ ឬក៏មួយអាទិត្យក្រោយពេលរាំងភ្លៀងនោះទេ ។ ប៉ុន្តែទោះជាយ៉ាងណាប្រជាពលរដ្ឋនៅតំបន់នោះមានផ្លូវជាច្រើនខ្សែសម្រាប់ធ្វើដំណើរវាងផងដែរ ។
ស្ថានីយបូមទឹក១៣កន្លែងកំពុងមមាញឹកបូមទឹកចេញពីក្នុងក្រុងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ក្រោមឥទ្ធិពលព្យុះ ទឹកភ្លៀងកំពុងធ្លាក់យ៉ាងខ្លាំងក្នុងរាជធានីភ្នំពេញ ។ ខណៈពេលនេះស្ថានីយបូមទឹកចំនួន១៣កន្លែង និងក្រុមការងារកំពុងដំណើរការបូមយ៉ាងមមាញឹកគ្មានសម្រាកទេ ។
លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញ បានអំពាវនាវដល់ប្រជាពលរដ្ឋ ដែលរស់នៅតាមដងទន្លេ ក្នុងភូមិសាស្ត្ររាជធានីភ្នំពេញទាំងអស់ ត្រូវបង្កើនការប្រុងប្រយ័ត្នខ្ពស់ ចំពោះកូនចៅ និងទ្រព្យសម្បត្តិព្រោះស្ថានភាពទឹកទន្លេកំពុងមានសន្ទុះកើនឡើងខ្លាំង ដើម្បីការពារគ្រោះថ្នាក់កើតឡើងជាយថាហេតុ ។
លោក ម៉ៅ ប៊ុនធឿន បានឱ្យដឹងទៀតថា ក្នុងរយៈពេលប៉ុន្មានថ្ងៃកន្លងមកនេះ ប្រទេសកម្ពុជាមានប្រព័ន្ធសម្ពាធទាបបានគ្របដណ្តប់នៅទូទាំងប្រទេស ដែលបង្កឱ្យមានភ្លៀងធ្លាក់រាយប៉ាយស្ទើរទូទាំងខេត្ត ពិសេសរាជធានីភ្នំពេញមានភ្លៀងធ្លាក់ច្រើន ធ្វើឱ្យទឹកទន្លេមានសន្ទុះកើនឡើងគួរឱ្យចាប់អារម្មណ៍ ។
លោកបន្តថា បញ្ហាទឹកទន្លេឡើងនេះ មន្ត្រីជំនាញកំពុងធ្វើការអង្កេតតាមដានស្ថានភាពទឹកជាប់ជារៀងរាល់ថ្ងៃ ដូច្នេះប្រជាពលរដ្ឋដែលរស់នៅតាមដងទន្លេ ត្រូវប្រុងប្រយ័ត្នភ្ញាក់រលឹកដោយខ្លួនឯង ហើយបើឃើញបញ្ហាទឹកឡើងមិនប្រក្រតី ត្រូវប្រញ៉ាប់រាយការណ៍ជូនអាជ្ញាធរ ដើម្បីផ្តល់ព័ត៌មានបន្តទៅក្រសួងចាត់វិធានការ ។ លោកប្រធានមន្ទីរក៏បានសំណូមពរដល់ប្រជាពលរដ្ឋ ដែលរស់នៅតាមមាត់ទន្លេត្រូវមានការប្រុងប្រយ័ត្ននិងភ្ញាក់រលឹកដោយខ្លួនឯង បើមានបញ្ហាណាកើតឡើងខុសប្រក្រតីណាមួយ សូមជួយរាយការណ៍ជូនអាជ្ញាធរដែនដី ដើម្បីអាជ្ញាធរដែនដី ធ្វើរបាយការណ៏បន្តទៅក្រសួងចាត់វិធានការ ។
លោកបានបញ្ជាក់ថា តាមព្រឹត្តប័ត្រព័ត៌មាន និងការព្យាករណ៍បានបង្ហាញថា ស្ថានភាពទឹកជំនន់នៅតាមដងទន្លេនានានៅកម្ពុជាកំពុងបន្តហក់ឡើង ពិសេសនៅទន្លេមេគង្គ ។ ដោយឡែកស្ថានីយជលសាស្ត្របាសាក់ចតុមុខ នាពេលនេះ ទឹកមានកំពស់៨,៣០ម៉ែត្រ ហើយប៉ុន្មានថ្ងៃទៀត បើសិនស្ថានភាពទឹកភ្លៀងនៅតែធ្លាក់បន្ត ទឹកអាចនឹងឡើងដល់កំពស់ជាង៩ម៉ែត្រ ។ ដូច្នេះតាមរយៈស្ថានភាពនេះ លោក អំពាវនាវដល់ប្រជាពលរដ្ឋរស់នៅអមសងខាងដងទន្លេ ត្រូវបង្កើនការប្រុងប្រយ័ត្នខ្ពស់និងយកចិត្តទុកដាក់តាមដានឱ្យបានជាប់លាប់ ដើម្បីការពារគ្រោះថ្នាក់កើតឡើងជាយថាហេតុ ។
សូមបញ្ជាក់ថា តាមការព្យាករអំពីកម្ពស់ទឹកជំនន់ នៅរាជធានីភ្នំពេញចាប់ពី១០,៥០ម៉ែត្រឡើងទៅ ទើបប្រកាសអាសន្ន នៅតាមស្ថានីយជលសាស្ត្រចតុមុខ ៕
ចែករំលែកព័តមាននេះ