មន្ត្រីបក្សកាន់អំណាចឆ្លើយតប ៖ ក្រៅពីតុលាការកម្ពុជា គ្មានសិទ្ធិទាមទារដោះលែងទេ
រាជធានីភ្នំពេញ ៖ មន្ត្រីជាន់ខ្ពស់គណបក្សកាន់អំណាច
រាជធានីភ្នំពេញ ៖ មន្ត្រីជាន់ខ្ពស់គណបក្សកាន់អំណាច
រាជធានីភ្នំពេញ ៖ មន្ត្រីជាន់ខ្ពស់គណបក្សកាន់អំណាច បានស្នើដល់សភាអឺរ៉ុបក្តាប់ឱ្យបានគ្រប់ជ្រុងជ្រោយ ចំពោះសភាពការណ៍ពិតនៅកម្ពុជា កុំច្បោលៗជឿតែតាមមជ្ឈដ្ឋានប្រឆាំង ។ការស្នើសុំនេះបន្ទាប់ពីសភាអឺរ៉ុបបានសម្តែងការព្រួយបារម្ភចំពោះស្ថានការណ៍នយោបាយនៅកម្ពុជា បន្ទាប់ពីសមត្ថកិច្ចចាប់ខ្លួនលោក កឹម សុខា ប្រធានគណបក្សសង្គ្រោះជាតិ កាលពីថ្ងៃទី៣ កញ្ញា ឆ្នាំ២០១៧ កន្លងមក ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា ប្រជាជនកម្ពុជាយល់ថា ការសម្រេចរបស់សភាអឺរ៉ុបគ្មានន័យ ។លោកថា បរិយាកាសនយោបាយមិនអាក្រក់ទេមិនបាច់ព្រួយបារម្ភអីទេ ។ ការចាប់ខ្លួនអ្នកនយោបាយមួយចំនួនក្នុងបក្សប្រឆាំងគឺកើតឡេីងពីអំពេីប្រព្រឹត្តល្មេីសច្បាប់របស់សាមីជនតែប៉ុណ្ណោះ ហើយការចោទប្រកាន់តាមផ្លូវតុលាការគឺជាការអនុវត្តនីតិរដ្ឋ ស្របតាមស្មារតីកិច្ចព្រមព្រៀងទីក្រុងប៉ារីស ។ លោកលើកឡើងតាមប្រព័ន្ធតេឡេក្រាមនៅថ្ងៃទី១៦ កញ្ញាថា ការចង់ដោះលែងជនជាប់ចោទមិនមែនដោយសារការស្រែក ឬបាតុកម្មទេ តែជាការសម្រេចរបស់សមត្ថកិច្ចរបស់តុលាការជាស្ថាប័នឯករាជ្យ ។ ដូច្នេះស្នេីគោរពឯករាជ្យភាពរបស់តុលាការផង ។
លោក សុខ ឥសាន បញ្ជាក់ថា៖«អ្នកក្រៅពីតុលាការកម្ពុជា គ្មានសិទ្ធិទាមទារឱ្យដោះលែង ជនជាប់ចោទ និងទណ្ឌិតទេសុំកុំច្រឡំឱ្យសោះ» ។លោកសូមឱ្យសភាអឺរ៉ុបក្តាប់ឱ្យបានគ្រប់ជ្រុងជ្រោយចំពោះសភាពការណ៍ពិតនៅកម្ពុជា កុំច្បោលៗជឿតែតាមមជ្ឈដ្ឋានប្រឆាំង ហើយដាក់កំហុសទាំងងងឹតងងុលមកលើរាជរដ្ឋាភិបាលកម្ពុជា ។
ការលើកឡើងរបស់លោកសុខ ឥសាន នេះបន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិបានអំពាវនាវដល់សហគមន៍អន្តរជាតិដាក់ទណ្ឌកម្មមកលើកម្ពុជា ។លោក សម រង្ស៊ី ថា ទណ្ឌកម្មពីលោកសេរីអាចជំរុញឱ្យរាជរដ្ឋាភិបាលកម្ពុជាដើរទៅរកគន្លងលទ្ធិប្រជាធិបតេយ្យវិញ ។ លោកថា នៅពេលផ្ដល់ជំនួយមកកម្ពុជា សហគមន៍អន្តរជាតិត្រូវភ្ជាប់នូវលក្ខខណ្ឌទាមទារឱ្យរាជរដ្ឋាភិបាលគោរពសិទ្ធិមនុស្ស ឬដាក់ទណ្ឌកម្មលើបុគ្គលមន្ត្រីរដ្ឋាភិបាលដូចជា មិនផ្ដល់ទិដ្ឋាការឱ្យធ្វើដំណើរទៅកាន់ប្រទេសលោកសេរីរួមមាន សហរដ្ឋអាមេរិក សហភាពអឺរ៉ុប ប្រទេសអូស្ត្រាលី និងជប៉ុនជាដើម ។
លោក សម រង្ស៊ី ថា នៅពេលទណ្ឌកម្មប៉ះពាល់ដល់រដ្ឋាភិបាល និងប្រយោជន៍ផ្ទាល់ខ្លួនរបស់មន្ត្រីក្នុងជួររាជរដ្ឋាភិបាលពួកគេនឹងពិចារណា ។ បើទោះជាពេលនេះរាជរដ្ឋាភិបាលកម្ពុជាហាក់កំពុងមានប្រទេសចិនជាខ្នងបង្អែកក៏ដោយលោក សម រង្ស៊ី ថ្លែងថា រាជរដ្ឋាភិបាលកម្ពុជានៅតែត្រូវការ និងពឹងផ្អែកខ្លាំងលើជំនួយរបស់លោកសេរី ព្រោះថា ប្រមាណ៤០ភាគរយនៃថវិកាជាតិរបស់កម្ពុជា គឺជាជំនួយរបស់ប្រទេស ប្រជាធិបតេយ្យដូចជា សហរដ្ឋអាមេរិក សហភាពអឺរ៉ុប ជប៉ុន និងអូស្ត្រាលីជាដើម ។
លោក សម រង្ស៊ី ក៏អំពាវនាវឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសជំរុញឱ្យរាជរដ្ឋាភិបាលកម្ពុជាអនុវត្តនូវគោលការណ៍ប្រជាធិបតេយ្យស្របតាមស្មារតីនៃកិច្ចព្រមព្រៀងនេះ ។ ការអំពាវនាវរបស់លោក សម រង្ស៊ី ឱ្យប្រទេសលោកសេរីដាក់ទណ្ឌកម្មចំពោះរាជរដ្ឋាភិបាលកម្ពុជានេះធ្វើឡើងក្រោយពីសហរដ្ឋអាមេរិកបានសម្រេចផ្អាកផ្ដល់ទិដ្ឋាការដល់មន្ត្រី នៃក្រសួងការបរទេសកម្ពុជា ។
ជាការឆ្លើយតប សម្តេចតេជោ ហ៊ុន សែន ក៏ផ្អាកកិច្ចសហការជាមួយសហរដ្ឋអាមេរិកក្នុង ការរុករកអដ្ឋិធាតុទាហានអាមេរិកជិត៥០នាក់ ទៀតនៅកម្ពុជាផងដែរ ។លោក សុខ ឥសាន ថា គណបក្សប្រជាជនកម្ពុជា និងរាជរដ្ឋាភិបាលកម្ពុជាប្តេជ្ញាដេីរតាមគន្លងលទ្ធិប្រជាធិបតេយ្យ និងពង្រឹងនីតិរដ្ឋនៅកម្ពុជាស្របតាមស្មារតីនៃកិច្ចព្រមព្រៀងទីក្រុងប៉ារីសថ្ងៃទី២៣ ខែតុលា ឆ្នាំ១៩៩១ និងខ្លឹមសារនៃរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីការពាររបបរាជានិយមអាស្រ័យរដ្ឋធម្មនុញ្ញសន្តិភាព និងវិបុលភាពរបស់ប្រជាជនកម្ពុជា ៕
ចែករំលែកព័តមាននេះ