កូរ៉េខាងជើងនិយាយទៅកាន់អាមេរិកថា ចង់ធ្វើឱ្យ…
ទីភ្នាក់ងារព័ត៌មានផ្លូវការកូរ៉េខាងជើង KCNA អះអាងកាលពីថ្ងៃទី១៦ កញ្ញា ថា
ប្រទេសកូរ៉េខាងជើង ៖ បន្ទាប់ពីបាញ់មីស៊ីលបាលីស្ទិកថ្មីកាត់ពីលើប្រទេសជប៉ុន និង២សប្តាហ៍ក្រោយការសាកល្បងនុយក្លេអ៊ែរលើកទី៦របស់ខ្លួន ទីភ្នាក់ងារព័ត៌មានផ្លូវការកូរ៉េខាងជើង KCNA អះអាងកាលពីថ្ងៃទី១៦ កញ្ញា ថា កូរ៉េខាងជើងមានបំណងចង់បង្កើតតុល្យភាពនៃកម្លាំងយោធាជាមួយសហរដ្ឋអាមេរិក ។
KCNA បានដកស្រង់សម្តីរបស់លោកគីម ជុងអ៊ុន ដែលថ្លែងថា ទិសដៅចុងក្រោយរបស់យើង គឺបង្កើតឱ្យមានតុល្យភាពនៃកម្លាំងជាមួយសហរដ្ឋអាមេរិកដែលនឹងលែងឱ្យបណ្តាមេដឹកនាំអាមេរិកឈប់និយាយទៀតពីការជ្រើសរើសខាងយោធាប្រឆាំងកូរ៉េខាងជើង ។
ទីប្រឹក្សាសន្តិសុខជាតិរបស់លោកដូណាល់ ត្រាំ គឺលោក MCCMASTER និយាយជាថ្មីកាលពីថ្ងៃទី១៥ កញ្ញា ថា ការជ្រើសរើសខាងយោធាត្រូវបានគ្រោង និងថា ការអត់ធ្មត់របស់ក្រុងវ៉ាស៊ីនតោនឈានដល់កម្រិតរបស់វា ក្រោយការបាញ់មីស៊ីលរបស់កូរ៉េខាងជើង ដែលធ្វើឡើង៤ថ្ងៃ ក្រោយការអនុម័តរបស់ក្រុមប្រឹក្សាសន្តិសុខ អ.ស.ប លើការដាក់ទណ្ឌកម្មបន្ថែមប្រឆាំងរបបក្រុងព្យុងយ៉ាង ។
KCNA បន្តថា ការបាញ់សាកល្បងនេះអាចបង្ហាញពីសមត្ថភាពប្រយុទ្ធ និងភាពគួរឱ្យជឿជាក់នៃមីស៊ីល HWASONG-12 ជាមីស៊ីលបាលីស្ទិករយៈមធ្យមមួយ ដោយមីស៊ីលនេះបានទៅដល់គោលដៅរបស់ខ្លួនក្នុងមហាសមុទ្រប៉ាស៊ីហ្វិកក្រោយហោះកាត់ពីលើកោះហុកកៃដូជប៉ុន ។ ការបាញ់សាកល្បងនេះដឹកនាំធ្វើផ្ទាល់ដោយមេដឹកនាំកូរ៉េខាងជើង លោកគីម ជុងអ៊ុន ដែលអះអាងថា កូរ៉េខាងជើងជិតទទួលបានអាវុធនុយក្លេអ៊ែរ ហើយទោះបីមានទណ្ឌកម្មរបស់អន្តរជាតិ ។
ការបាញ់សាកល្បងមីស៊ីលថ្មីនេះញ៉ាំងឱ្យមានការថ្កោលទោសកាលពីថ្ងៃទី១៥ កញ្ញា របស់ក្រុមប្រឹក្សាសន្តិសុខ អ.ស.ប ដែលរួមប្រជុំជាបន្ទាន់ ហើយក្រុមប្រឹក្សានេះនិយាយថា វាជាការគំរាមកំហែងសម្រាប់គ្រប់ប្រទេសទាំងអស់ជាសមាជិក ។
នៅក្រុងវ៉ាស៊ីនតោន ឯកអគ្គរដ្ឋទូតចិន លោក CUI TIANKAI បានស្នើដល់សហរដ្ឋអាមេរិកឱ្យផ្អាកការគំរាមកំហែងលើកូរ៉េខាងជើង ។ លោកថ្លែងទៅកាន់សារព័ត៌មានថា សហរដ្ឋអាមេរិកត្រូវបញ្ឈប់ធ្វើការគំរាមកំហែងថ្មីៗ ហើយត្រូវជំរុញបន្ថែមទៀតស្វែងរកមធ្យោបាយដែលមានប្រសិទ្ធភាពនានាសម្រាប់ការបើកការចរចាឡើងវិញ ៕
ចែករំលែកព័តមាននេះ