ភិន សុដាលីស ចង់សម្តែងឈុតស្នេហារោលរាល
រាជធានីភ្នំពេញ ៖ ភិន សុដាលីស និយាយថា
រាជធានីភ្នំពេញ ៖ អ្នកនាងភិន សុដាលីសបានសម្តែងក្នុងរឿង«មន្តស្នេហ៍លេខា»ដោយមានឈុតឆាកស្នេហារោលរាលអារម្មណ៍ ។ ភិន សុដាលីស ចង់ថតឈុតបែបនេះទៀត ។
កាលពីល្ងាចថ្ងៃទី១៣ កញ្ញា ឆ្នាំ២០១៧ នៅបរិវេណរោងកុនមេជើស៊ីណឺភ្លិចក្នុងផ្សារទំនើបអុីអន រាជធានីភ្នំពេញ បានរៀបចំកម្មវិធីបើកការចាក់បញ្ចាំងភាពយន្តរឿង«មន្តស្នេហ៍លេខា»នៅតាមរោងកុន ។ រឿងនេះបានចាក់បញ្ចាំងជារឿងភាគម្តងរួចមកហើយនៅលើកកញ្ចក់ទូរទស្សន៍PNN ។ តួឯកប្រុសស្រីក្នុងរឿង«មន្តស្នេហ៍លេខា»គឺអ្នកនាងភិន សុដាលីស និងលោកយឹម សម្បត្តិ ។
អ្នកនាងភិន សុដាលីស ឲ្យដឹងថា ដោយសារតែមានសំណូមពរពីទស្សនិកជន ភាពយន្តរឿង«មន្តស្នេហ៍លេខា»ចាក់ផ្សាយឡើងនៅតាមរោងកុន ។ រឿងនេះប្រភពដើមជារឿងប្រលោមលោក ហើយកែសម្រួលជាខ្សែភាពយន្ត ។ ការបញ្ចាំងតាមទូរទស្សន៍ គឺទស្សនិកជនមើលសាច់រឿងមិនបានជាប់លាប់ ដូច្នេះអាចមើលសាច់រឿងចប់ចុងចប់ដើមនៅរោងកុនម្តង ។
ភិន សុដាលីស និយាយថា«ក្នុងនាមជាតួឯកស្រីចរិតសម្តែងគឺមិនដែលសម្តែងពីមុនមកនោះទេ ភាគច្រើនអ្នកជ្រើសរើសនាងខ្ញុំថារឿងនេះមានឈុតសិចស៊ី ឱបថើបស្រើបស្រាល ដូច្នេះពីដំបូងចង់ដកថយ តែពេលមើលសាច់រឿង អានហើយក៏ស្រឡាញ់ ក៏ចាប់ផ្តើមយល់ព្រមថត ។ យ៉ាងណាមិញក្រោយឆ្លងកាត់ហើយ យើងយល់ថាវាជាសិល្បៈ នាងខ្ញុំនឹងបន្តថតរបៀបនេះមិនទើសទាល់នោះទេប្រសិនបើមានសាច់រឿងតម្រូវ» ។
លោកអីុន សុភិន ចាងហ្វាងផលិតកម្មលើកឡើងថា រឿង «មន្តស្នេហ៍លេខា» បន្ទាប់ពីបញ្ចាំងជារឿងភាគនៅតាមទូរទស្សន៍ហើយបានកាត់កងជារឿងដុំបញ្ចាំងនៅរោងកុនវិញម្តង ៕
ចែករំលែកព័តមាននេះ