ឮស្នូរបា.ញ់ច្រើនគ្រាប់… មិននឹកស្មានកើតលើផ្ទះខ្លួនឯងសោះ
ខេត្តបាត់ដំបង ៖ ជនមិនស្គាល់មុខបានប្រើប្រាស់កាំភ្លើងខ្លីបា.ញ់រះជិត១០គ្រាប់
ខេត្តបាត់ដំបង ៖ ជនមិនស្គាល់មុខបានប្រើប្រាស់កាំភ្លើងខ្លីបាញ់រះជិត១០គ្រាប់ចូលទៅក្នុងផ្ទះឈ្មួញទិញ-លក់រថយន្តម្នាក់ កាលពីវេលាម៉ោង១១ និង៥៥នាទីយប់ថ្ងៃទី១៤ កញ្ញា នៅក្នុងភូមិចិន សង្កាត់ព្រែកព្រះស្ដេច ក្រុងបាត់ដំបង ដែលគេសង្ស័យថា អាចជារឿងគំនុំ បណ្ដាលឱ្យត្រូវរថយន្ត២គ្រឿងនិងម៉ូតូ១គ្រឿងទៀតដែលទុកក្នុងផ្ទះ តែមិនមានគ្រោះថ្នាក់ដល់អាយុជីវិតម្ចាស់ផ្ទះទេ ។
សមត្ថកិច្ចបានឱ្យដឹងថា ជនរងគ្រោះដែលត្រូវខ្មាន់កាំភ្លើងបាញ់រះចូលផ្ទះនោះឈ្មោះ អៀន រដ្ឋា ប្រុស អាយុ៣៥ឆ្នាំ មានមុខរបរជាអ្នកទិញ,លក់រថយន្ត រស់នៅចំណុចភូមិ សង្កាត់ខាងលើ ។ បើតាមការពិនិត្យសម្បកគ្រាប់ គឺខ្មាន់កាំភ្លើងបានប្រើប្រាស់កាំភ្លើងម៉ាកឡុកបាញ់រះចំនួន៩គ្រាប់ទម្លុះទ្វាចូលទៅក្នុងផ្ទះ បណ្ដាលឱ្យត្រូវរថយន្តម៉ាកហាយឡែនឌ័រ១គ្រឿង រថយន្តម៉ាកព្រូស១គ្រឿងនិងម៉ាកស្កុបពី១គ្រឿង តែមិនត្រូវម្ចាស់ផ្ទះទេហើយគេសង្ស័យអាចជារឿងគំនុំ ។
បើតាមការបំភ្លឺពីម្ចាស់ផ្ទះឈ្មោះអៀន រដ្ឋា បានប្រាប់សមត្ថកិច្ចថា នៅយប់កើតហេតុនោះ ពេលគាត់កំពុងដេកលក់ ស្រាប់តែឮសំឡេងផ្ទុះ តែមិនដឹងថា ផ្ទុះអ្វីហើយក៏មិននឹងស្មានថា ផ្ទុះកាំភ្លើងដែរ ។ គាត់និយាយទៀតថា ពេលនោះគាត់បានងើបមកបើកទ្វាររកមើល តែមិនឃើញមានអ្វីហើយក៏មិនដឹងថា មានគេបាញ់ចូលផ្ទះត្រូវរថយន្ត និងម៉ូតូដែរ ហើយក៏បិទទ្វារផ្ទះចូលដេកវិញទៅ ។ លុះព្រឹកឡើងទើបដឹង ដោយសារឃើញសម្បកគ្រាប់រាយប៉ាយមុខផ្ទះ ទើបមានការភ្ញាក់ផ្អើល និងរាយការណ៍ប្រាប់សមត្ថកិច្ចតែម្ដង ។
លោក អៀន រដ្ឋា បានបញ្ជាក់ថា លោកមិនដឹងពីមូលហេតុ ដែលនាំឱ្យមានគេមកលបបាញ់រះចូលផ្ទះគាត់នោះទេ តែលោកដាក់ការសង្ស័យថា អាចបណ្ដាលមកពីរឿងគំនុំក្នុងមុខជំនួញរកស៊ី ។មន្ត្រីជំនាញបាននិយាយថា បើតាមការពិនិត្យកន្លែងកើតហេតុ ខ្មាន់កាំភ្លើងបានឈរបាញ់ពីខាងក្រៅរបងទម្លុះទ្វារចូលក្នុងផ្ទះតែម្ដង តែសំណាងល្អត្រូវតែរថយន្តនិងម៉ូតូមិនត្រូវមនុស្ស ។
លោក ជេត វណ្ណនី ស្នងការរងខេត្ត បានមានប្រសាសន៍ថា បើតាមការសួរនាំ និងបំភ្លឺខ្លះៗពីម្ចាស់ផ្ទះ យើងសង្ស័យថាការបាញ់រះចូលក្នុងផ្ទះទាំងកណ្ដាលយប់នេះទំនងអាចជារឿងគំនុំរវាងខ្មាន់កាំភ្លើងនិងម្ចាស់ផ្ទះ តែយើងមិនទាន់ដឹងថា ដោយសារតែមុខជំនួញ ឬដោយសារអ្វីច្បាស់លាស់ទេ ។ លោកស្នងការរងបានបញ្ជាក់ថា ពេលនេះមន្ត្រីជំនាញកំពុងសួរនាំជនរងគ្រោះ ដើម្បីធ្វើការស្រាវជ្រាវរកមុខសញ្ញាជនដៃដល់នោះហើយ ៕
ចែករំលែកព័តមាននេះ