តើអ្នកយល់យ៉ាងណា… ក្រាលកន្ទេលយកលុយតាមឆ្នេរអីុចឹង?
សេវាកម្មមួយចំនួននៅតាមតំបន់ឆ្នេរសាធារណៈ ជាពិសេសគឺការ
សេវាកម្មមួយចំនួននៅតាមតំបន់ឆ្នេរសាធារណៈ ជាពិសេសគឺការ
ខេត្តកែប ៖ ជាមួយនឹងកំណើនភ្ញៀវទេសចរជាតិ និងអន្តរជាតិទៅកម្សាន្តនៅឆ្នេរសមុទ្រខេត្តកែបនោះ សហគមន៍មូលដ្ឋានបាន និងកំពុងផ្តល់សេវាកម្មមួយចំនួននៅតាមតំបន់ឆ្នេរសាធារណៈ ជាពិសេសគឺការ «ក្រាលកន្ទេលលើឆ្នេរខ្សាច់» សម្រាប់អ្នកទេចចរ ។ អ្នកទេសចរខ្លះស្វាគមន៍សេវាកម្មនេះ ឯខ្លះទៀតមិនសូវពេញចិត្តទេព្រោះត្រូវបង់ប្រាក់ ។
ខេត្តកែបទើបតែទទួលបានពានរង្វាន់«ទីក្រុងនិរន្តរបរិស្ថានអាស៊ាន» កាលពីថ្ងៃទី១២ ខែកញ្ញា ២០១៧ នៅប្រទេសប្រ៊ុយណេ និងពានរង្វាន់ «ទីក្រុងស្អាត ផ្ការំដួល៣ទង» ពីរាជរដ្ឋាភិបាលកម្ពុជា ហេតុដូច្នេះហើយខេត្តមាត់សមុទ្រដែលមានឆ្នេរស្រស់ស្អាត ជាមួយបរិស្ថានល្អទទួលបានការចាប់អារម្មណ៍មួយកម្រិតទៀតពីភ្ញៀវជាតិ និងអន្តរជាតិ ។ ចំពោះសេវាកម្មនៅតាមឆ្នេរសមុទ្រ ដូចជាការលក់វត្ថុអនុស្សាវរីយ៍ ម្ហូបអាហារ និងការជួលកន្លែងសម្រាប់សម្រាកកម្សាន្ត ។ ប៉ុន្តែក្នុងនោះការត្អូញត្អែរពីភ្ញៀវមួយចំនួនអំពីកន្លែងអង្គុយលំហែកាយនោះ គឺពាក់ព័ន្ធនឹងតម្លៃ ដោយសារកន្លែងនីមួយៗសុទ្ធតែមានការក្រាលកន្ទេល អង្រឹង និងប៉ៅអ៊ីជាដើម ហើយពួកគាត់ត្រូវបង់តម្លៃ ក្នុងមួយកន្ទេលចំនួន៥.០០០រៀល ទៅ១០.០០០រៀល ។
បើតាមការឱ្យដឹងពីភ្ញៀវដែលទៅជួលកន្លែងសម្រាប់អង្គុយ ឱ្យដឹងកាលពីពេល ថ្មីៗកន្លងមកថា«សូម្បីកន្លែងដែលធ្លាប់អង្គុយលេង ឬញ៉ាំអីពីមុន ឥឡូវក៏យកលុយដែរ ដោយកន្ទេលមួយគឺមានតម្លៃ៥.០០០រៀល ។ បើសិនជាពួកគាត់នៅធ្វើអ៊ីចឹងទៀត ច្បាស់ជាមិនមានភ្ញៀវណាហ៊ានមកអង្គុយលេងមើលទឹកសមុទ្រខេត្តកែបទៀតទេ ព្រោះភ្ញៀវខ្លះគាត់មកពីតាមបណ្ដាខេត្ត ផ្សេងៗដែលពុំសូវមានលុយច្រើនដូចភ្ញៀវមកពីរាជធានីភ្នំពេញទេ »។
អ្នកស្រីញ៉ែម រំដួល ជាអាជីវករជួលកន្ទេលនៅឆ្នេរខ្សាច់មាត់សមុទ្រកែប លើកឡើងថា៖ «សម្រាប់កន្លែងខ្ញុំ បើភ្ញៀវអង្គុយលើខឿន គឺខ្ញុំអត់គិតលុយទេ តែបើអង្គុយលើកន្ទេល ឬប៉ៅអ៊ី គឺតម្រូវឱ្យបង់សេវាហើយ ។ សម្រាប់ខែបុណ្យទានក្នុងមួយកន្លែងគឺតម្លៃ ២០ដុល្លារ ដោយមិនរាប់បញ្ចូលតម្លៃម្ហូបអាហារ មានន័យថាភ្ញៀវអត់ហូបអីសោះ គឺជួលតែកន្ទេល ។ សម្រាប់ថ្ងៃធម្មតាគឺតម្លៃ១៥ដុល្លារ ដោយមានបាំងឆត្រសម្រាប់ឲ្យភ្ញៀវជ្រកម្លប់ផងដែរ» ។
ពាក់ព័ន្ធនឹងបញ្ហាយកកម្រៃសេវានេះ លោកសោម ពិសិដ្ឋ អភិបាលរងខេត្តកែប បានលើកឡើងផងដែរក្នុងពិធីបិទវគ្គ និងប្រគល់វិញ្ញាបនបត្របញ្ជាក់ការសិក្សាថ្នាក់ជាន់ខ្ពស់បច្ចេកទេសដល់សិស្ស និស្សិតជំនាន់ទី៥ នៃសាលាបច្ចេកទេសដុនបូស្កូ ខេត្តកែបកាលពីថ្ងៃទី៨ ខែតុលា ឆ្នាំ២០១៧ ដោយបញ្ជាក់ថា ការជួលកន្ទេលនេះជារបស់ឯកជន ប៉ុន្តែកន្លងមករដ្ឋបាលខេត្តបានគិតគូរពីបញ្ហានេះដែរ ។
លោកអភិបាលរងខេត្តកែប បន្តថាការចូលទៅកម្សាន្តនៅខេត្តកែបត្រូវបង់ថ្លៃរថយន្តក្នុងមួយគ្រឿង ពី៤.០០០ ទៅ៥.០០០រៀល ។
លោកសោម ពិសិដ្ឋ មានប្រសាសន៍ថា៖ «ការជួលកន្លែងនេះ គឺជាវិស័យឯកជន គាត់ជាអ្នកដេញថ្លៃបានថវិកាបង់ចូលរដ្ឋ ហើយគាត់មានការទទួលខុសត្រូវទៅលើការសំអាតអនាម័យតាំងពីកន្លែងផ្សារក្ដាមរហូតដល់ផែកោះទន្សាយ ។ គាត់យកសេវាអស់ហ្នឹងហើយ ទើបមកធ្វើការដេញថ្លៃភាស៊ីក្នុងមួយឆ្នាំមួយដងជារៀងរាល់ឆ្នាំ ហើយថវិកាចូលរដ្ឋទាំងអស់ មិនធ្លាក់ចូលដៃឯកជនណាមួយទេ» ។
លោកអភិបាលរងខេត្តកែប បន្ថែមទៀតថា៖ «ការជួលខ្យូស គឺជារបស់ប្រជាពលរដ្ឋ ហើយចំពោះតម្លៃគឺខ្ញុំសូមបញ្ជាក់ថាជាការស្រុះស្រួលគ្នារវាងភ្ញៀវ និងម្ចាស់កន្លែងជួល ព្រោះគាត់មានការស្រុះស្រួលគ្នារួចហើយ ថាគាត់ត្រូវការ ឬមិនត្រូវការសេវាកម្មនោះ» ។
ខេត្តកែបនឹងរៀបចំពិធីបុណ្យសមុទ្រ នៅខែធ្នូ ឆ្នាំ២០១៧ ហើយអាជ្ញាធរខេត្តរំពឹងថានឹងមានភ្ញៀវចូលរួមប្រមាណជាង១លាននាក់ ។
បើតាមសម្ដីរបស់លោកប៉ុក ទាំង អនុប្រធានមន្ទីរទេសចរណ៍ខេត្តកែប ឱ្យដឹងថា ភ្ញៀវទេចរដែលទៅលេងខេត្តកែបពីគ្រប់ទិសទី និងមានការកើនឡើងពីមួយឆ្នាំទៅមួយឆ្នាំ។ ចំពោះមូលហេតុលោកថា«ដោយសារតែស្រុកទេសមានសុខសុវត្ថិភាព ពាក់ព័ន្ធនឹងសន្តិសុខសង្គម មានការអភិវឌ្ឍច្រើន ទាំងវិស័យទេសចរណ៍ បរិស្ថាន និងហេដ្ឋារចនាសម្ព័ន្ធ ដែលមាននៅក្នុងខេត្តកែប ។
ជាពិសេសគឺមានសក្តានុពលច្រើន ទាំងក្នុងទឹក និងលើគោក ដែលមានទឹកស្អាត ដីស្អាត និងមានខ្យល់អាកាសបរិសុទ្ធសម្រាប់ទាក់ទាញភ្ញៀវជាតិ និងអន្តរជាតិឱ្យមកទស្សនាខេត្តកែបយើងនេះ » ៕
ចែករំលែកព័តមាននេះ