ខេត្តបាត់ដំបង ៖ ជនត្រូវចោទចំនួន០៣នាក់ត្រូវចៅក្រមស៊ើបសួរសាលាដំបូងខេត្ត សម្រេចចេញដីកាបង្គាប់ឲ្យបញ្ជូនទៅឃុំខ្លួនក្នុងពន្ធនាគារ កាលពីល្ងាចថ្ងៃទី១០ មីនា ក្រោយពីត្រូវកម្លាំងសមត្ថកិច្ចឃាត់ខ្លួន ពាក់ព័ន្ធនឹងករណីលួចមានស្ថានទម្ងន់ទោស (ឆក់កន្ត្រកដាក់លុយ) អ្នកលក់ទឹកអំពៅ…
ខេត្តបាត់ដំបង ៖ ជនត្រូវចោទចំនួន០៣នាក់ត្រូវចៅក្រមស៊ើបសួរសាលាដំបូងខេត្ត សម្រេចចេញដីកាបង្គាប់ឲ្យបញ្ជូនទៅឃុំខ្លួនក្នុងពន្ធនាគារ កាលពីល្ងាចថ្ងៃទី១០ មីនា ក្រោយពីត្រូវកម្លាំងសមត្ថកិច្ចឃាត់ខ្លួន ពាក់ព័ន្ធនឹងករណីលួចមានស្ថានទម្ងន់ទោស (ឆក់កន្ត្រកដាក់លុយ) អ្នកលក់ទឹកអំពៅ កាលពជាងមួយឆ្នាំមុន ។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាលបានឲ្យដឹងថា ជនត្រូវចោទទាំង០៣នាក់ ដែលទើបត្រូវចាប់ខ្លួនមាន ១-ឈ្មោះមាន សីហា ហៅ ឈីវ អាយុ១៧ឆ្នាំ នៅភូមិចំការសំរោង១ សង្កាត់ចំការសំរោង ២-ឈ្មោះ ឆុំ ឆាយវិសុទ្ធ ហៅ វីន អាយុ១៧ឆ្នាំ នៅភូមិអូរតានប់ សង្កាត់ក្ដុលដូនទាវ និង ៣-ឈ្មោះ ហ៊ុន វណ្ណារ័ត្ន អាយុ១៦ឆ្នាំ នៅភូមិព្រែកតាតន់ សង្កាត់ព្រែកព្រះស្ដេច។ លោកថា ជនទាំង០៣នាក់នេះ ត្រូវបានកម្លាំងរបស់លោកឃាត់ខ្លួន កាលពីថ្ងៃទី៩ មីនា ក្រោយពីកម្លាំងរបស់លោកប្រទះឃើញនៅចំណុចភូមិជ្រៃកោង សង្កាត់ស្លាកែត ក្រុងបាត់ដំបង ដែលជាមុខសញ្ញា«ឆក់យកកន្ត្រកដាក់លុយ»របស់ស្ត្រីលក់ទឹកអំពៅម្នាក់ កាលពីជាង០១ឆ្នាំមុន ។
យោងតាមព្រឹត្តិហេតុរបស់សមត្ថកិច្ចបានឲ្យដឹងថា កាលពីអំឡុងខែកក្កដា ឆ្នាំ២០២២ កន្លងទៅ ជនត្រូវចោទទាំង០៣នាក់ បានជិះម៉ូតូ០២គ្រឿងធ្វើសកម្មភាព «ឆក់យកកន្ត្រកដាក់លុយ» របស់ស្ត្រីម្នាក់ឈ្មោះថាវ លក្ខណា អាយុ៤១ឆ្នាំ ពេលគាត់ជិះម៉ូតូសណ្ដោងរឺម៉កលក់ទឹកអំពៅ នៅម្ដុំផ្សារបឹងឈូក ក្នុងក្រុងបាត់ដំបង ។ ក្រោយធ្វើសកម្មភាព ក្រុមនេះបានជិះម៉ូតូគេចខ្លួនបាត់រហូត។ ប៉ុន្តែដោយសារមន្ត្រីជំនាញកំណត់បានច្បាស់លាស់នូវមុខសញ្ញាជនសង្ស័យទាំង០៣នាក់នេះ ទើបមន្ត្រីជំនាញតាមប្រមាញ់រហូតទើបចាប់ខ្លួននៅពេលនេះ។
នៅចំពោះមុខសមត្ថកិច្ច ក្រុមជនដៃដល់ទាំង០៣នាក់បានសារភាពទទូលស្គាល់ថា ពួកគេពិតជាធ្លាប់បានឆក់យកកន្ត្រកលុយរបស់អ្នកលក់ទឹកអំពៅនោះមែន ។ ជាមួយនឹងការឃាត់ខ្លួន សមត្ថកិច្ចក៏បានដកហូតម៉ូតូ០២គ្រឿងដែលមន្ត្រីជំនាញអះអាងថា ជាមធ្យោបាយដែលក្រុមជនដៃដល់ជិះធ្វើសកម្មភាពប្រព្រឹត្តបទល្មើស ។
លោកឈឿង គឹមសុង បានបញ្ជាក់ដែរថា ជនដៃដល់ទាំង០៣នាក់ បានព្យាយាមគេចខ្លួនក្រោយប្រព្រឹត្តបទល្មើស រីឯលោកស្នងការខេត្ត ក៏នៅតែដាក់ផែនការឲ្យកម្លាំងជំនាញការិយាល័យរបស់លោកបង្កើតករណតស៊ូ ស្រាវជ្រាវរហូតតាមក្របួចបាននៅពេលនេះ ។
ទោះយ៉ាងណា ពេលនេះតុលាការបានសម្រេចឃុំខ្លួនជនដៃដល់ទាំង០៣នាក់នេះក្នុងពន្ធនាគារហើយ៕
ចែករំលែកព័តមាននេះ