អាមេរិកបញ្ជូននាវាវាយលុកជាមួយយន្តហោះ F-35B ទៅកាន់ឧបទ្វីបកូរ៉េថែមទាំងចង់…
សហរដ្ឋអាមេរិក-ប្រទេសកូរ៉េ ៖ នាវាវាយលុក AMPHIBIE អាមេរិក USS WASP បានចាកចេញពីកំពង់ផែសំចតរបស់វានៅរដ្ឋវៀជីនៀមកកាន់ SASEBO ប្រទេសជប៉ុន
សហរដ្ឋអាមេរិក-ប្រទេសកូរ៉េ ៖ នាវាវាយលុក AMPHIBIE អាមេរិក USS WASP បានចាកចេញពីកំពង់ផែសំចតរបស់វានៅរដ្ឋវៀជីនៀមកកាន់ SASEBO ប្រទេសជប៉ុន
សហរដ្ឋអាមេរិក-ប្រទេសកូរ៉េ ៖ នាវាវាយលុក AMPHIBIE អាមេរិក USS WASP បានចាកចេញពីកំពង់ផែសំចតរបស់វានៅរដ្ឋវៀជីនៀមកកាន់ SASEBO ប្រទេសជប៉ុន ដែលនៅទីនោះនាវានេះចូលរួមក្នុងកងនាវាចរណ៍ទី៧អាមេរិក ជាមួយវត្តមានរបស់បណ្តាយន្តហោះប្រយុទ្ធជំនាន់ក្រោយគេបំផុតធុន F-35 ដើម្បីជាការបង្ហាញកម្លាំងចំពោះកូរ៉េខាងជើង ។ វិទ្យុ KBS អាមេរិករាយការណ៍ថា នាវា USS WASP បានចាកចេញពីមូលដ្ឋាននាវាចរណ៍ NORFOLK រដ្ឋវៀជីនៀកាលពីថ្ងៃទី៣០ សីហា ដើម្បីមកជំនួសនៅកំពង់ផែជប៉ុន SASEBO នាវាប្រភេទគ្នានេះ USS BONHOMME RICHARD ។ លើនាវា USS WASP មានយន្តហោះប្រដេញទំនើបធុន F-35B មួួយកង ដែលត្រូវពង្រឹងដល់កងនាវាចរណ៍ទី៧របស់សហរដ្ឋអាមរិកគ្រោងសម្រាប់លទ្ធភាពនៃសកម្មភាពយោធានៅឧបទ្វីបកូរ៉េ ។ យោងតាមមេបញ្ជាការរបស់នាវា USS WASP លោក ANDREW SIMTH ថា បណ្តាយន្តហោះ F-35B នឹងបង្កើនសមត្ថភាពវាយប្រហារច្បាស់របស់កងនាវាចរណ៍ទី៧ ។
លោកបញ្ជាក់ថា នាវានេះនឹងរួមចំណែកដល់ការចូលរួមរបស់អាមេរិកក្នុងការថែរក្សាសន្តិសុខ និងស្ថិរភាពសមុទ្រនៅតំបន់មហាសមុទ្រឥណ្ឌា និងប៉ាស៊ីហ្វិក ។ នាវា WASP ផ្ទុកកងទី២នៃយន្តហោះ F-35 ក្នុងតំបន់។ កងទីមួយមានយន្តហោះធុននេះ៨គ្រឿងចាប់តាំងពីខែមីនា ឆ្នាំ២០១៧មក ស្ថិតនៅឯមូលដ្ឋានអាកាសចរណ៍របស់កងម៉ារីននៅកោះអូគីណាវ៉ា ។ យន្តហោះធុន F-35B រហូតដល់១០០គ្រឿង ត្រូវធ្វើការហោះហើរនៅជិតឧបទ្វីបកូរ៉េរយៈពេលប៉ុន្មានឆ្នាំខាងមុខនេះ ខណៈក្រុងសេអ៊ូល និងក្រុងតូក្យូបានសម្រេចទិញយន្តហោះប្រភេទនេះជាង៤០គ្រឿងពីក្រុមហ៊ុន LOCKHEED MARTIN ។ យន្តហោះធុន F-35B មានសមត្ថភាពហោះឡើងត្រង់ដូចឧទ្ធម្ភាគចក្រ ហើយអាចធ្វើប្រតិបត្តិការក្នុងអាកាសដូចបណ្តាយន្តហោះប្រដេញ។ ចំណែកព្រឹទ្ធសមាជិកអាមេរិក លោក JOHN MCCAIN អំពាវនាវកាលពីថ្ងៃទី១០ កញ្ញា ឱ្យមានការដាក់ពង្រាយអាវុធនុយក្លេអ៊ែរអាមេរិកនៅដែនដីកូរ៉េខាងត្បូង ។ ក្នុងបទសម្ភាសន៍មួយជាមួយទូរទស្សន៍ CNN លោក MCCAIN ព្រឹទ្ធសមាជិករដ្ឋអារីហ្សូណា និងជាប្រធានគណៈកម្មការកងទ័ពរបស់ព្រឹទ្ធសភាអាមេរិកនិយាយថា ខ្ញុំយល់ថា ការដាក់ពង្រាយបែបនេះត្រូវគ្រោងមកពីការគំរាមកំហែងនុយក្លេអ៊ែរ និងបាលីស្ទិករបស់កូរ៉េខាងជើង ។ ចំពោះពួកអភិរក្សនិយមនៃគណបក្សប្រឆាំងកូរ៉េខាងត្បូងក៏ទាមទារឱ្យមានការពង្រាយអាវុធនុយក្លេអ៊ែរអាមេរិកដែរតែរដ្ឋាភិបាលរបស់លោកប្រធានាធិបតី MOON JAE IN យល់ថា ការដាក់ពង្រាយអាវុធនុយក្លេអ៊ែរជាថ្មីនេះគឺផ្ទុយទៅនឹងគោលការណ៍រំសាយនុយក្លេអ៊ែរនៅឧបទ្វីបកូរ៉េ ។ សហរដ្ឋអាមេរិកបានដកអាវុធនុយក្លេអ៊ែរតាក់ទិកពីឧបទ្វីបកូរ៉េកាលពីដើមទសវត្សឆ្នាំ៩០ ។
យោងតាមលោក MCCAIN ថា ក្រុងវ៉ាស៊ីនតោនក៏ត្រូវនិយាយយ៉ាងច្បាស់ដែរចំពោះមេដឹកនាំកូរ៉េខាងជើងថា ប្រសិនបើខ្លួនធ្វើសកម្មភាពបែបឈ្លានពាននោះនឹងត្រូវបង់តម្លៃគឺការកម្ទេចចោល ។ ប្រទេសកូរ៉េខាងជើងបានព្រមានកាលពីថ្ងៃទី១១ កញ្ញា ថា សហរដ្ឋអាមេរិកនឹងត្រូវប្រឈមមុខនឹងការឈឺចុកចាប់យ៉ាងធំធេង ប្រសិនបើជំរុញឱ្យមានទណ្ឌកម្ម អ.ស.ប កាន់តែខ្លាំងថែមទៀតក្រោយការសាកល្បងនុយក្លេអ៊ែរលើកទី៦របស់ខ្លួន ។ រដ្ឋមន្ត្រីការបរទេសកូរ៉េខាងជើងថ្លែងថា សហរដ្ឋអាមេរិកនឹងត្រូវបង់តម្លៃប្រសិនបើក្រុងវ៉ាស៊ីនតោនបន្តយុទ្ធនាការឱ្យមានការអនុម័តដំណោះស្រាយដែលដាក់ទណ្ឌកម្មកាន់តែខ្លាំងប្រឆាំងក្រុងព្យុងយ៉ាង។ បណ្តាវិធានការខាងមុខដែលកូរ៉េខាងជើងចាត់នឹងបង្កឱ្យសហរដ្ឋអាេមរិករងការឈឺចាប់ដែលខ្លួនពុំធ្លាប់ជួបប្រទះក្នុងប្រវត្តិសាស្ត្រ ។
គម្រោងទណ្ឌកម្មខ្លាំងអាមេរិកត្រូវកែសម្រួលគម្រោងដាក់ទណ្ឌកម្មខ្លាំងក្លាថ្មីស្នើដោយសហរដ្ឋអាមរិកប្រឆាំងកូរ៉េខាងជើង ដែលត្រៀមអនុម័តនារសៀលថ្ងៃទី១១ កញ្ញា ត្រូវបានសម្រាលក្នុងឱកាសនៃការចរចានៅទីស្នាក់ការ អ.ស.ប ដើម្បីជំរុញឱ្យរុស្ស៊ី និងចិន ដែលមានសិទ្ធិវេតូទទួលយកបាន ។ ប្រភពការទូតរាយការណ៍ថា គម្រោងដំណោះស្រាយនេះនាប៉ុន្មានថ្ងៃចុងក្រោយបានសម្រាលក្នុងគោលដៅឱ្យរុស្ស៊ី និងចិន ព្រមអនុម័តដែរ ។ ក្នុងគម្រោងដំបូងសហរដ្ឋអាមេរិកគ្រោងឱ្យមានការហ៊ុមព័ទ្ធប្រេងកាត ផ្អាកការនាំចេញវាយនភណ្ឌកូរ៉េខាងជើង និងផ្អឹបទុកទ្រព្យសម្បត្តិ ព្រមទាំងហាមឃាត់ការធ្វើដំណើរទៅក្រៅរបស់លោកគីម ជុងអ៊ុន។ គម្រោងកែប្រែពុំទាមទារឱ្យហ៊ុមព័ទ្ធលើប្រេងកាត តែផ្ទុយទៅវិញការនាំចូលផលិតផលប្រេងចម្រាញ់នឹងកំណត់ច្រើនបំផុតត្រឹម២លានធុងក្នុង១ឆ្នាំ ការនាំចូលប្រេងឆៅនឹងកំណត់ត្រឹមកម្រិតបច្ចុប្បន្ន ។ ការនាំចេញទៅកាន់កូរ៉េខាងជើងនូវឧស្ម័នក៏កម្រិតដែរ ។ យោងតាមតួលេខរបស់អាជ្ញាធរកូរ៉េខាងត្បូងថា ជាមួយការនាំចូលប្រេង៥០០.០០០តោនក្នុងមួយឆ្នាំ ចិនជាអ្នកផ្តល់ប្រេងឆៅស្ទើរតែទាំងស្រុងដល់កូរ៉េខាងជើង ។ កូរ៉េខាងជើងក៏នាំចូលដែរពីចិនផលិតផលប្រេងដល់២០០.០០០តោនក្នុង១ឆ្នាំ ។ ការនាំចេញប្រេងឆៅរបស់រុស្ស៊ីទៅកាន់កូរ៉េខាងជើងមានប្រមាណជា៤០.០០០តោនក្នុង១ឆ្នាំ ៕
ចែករំលែកព័តមាននេះ