កីឡា8រូបកំពុងតែលេចធ្លោនាពេលបច្ចុប្បន្ន
រាជធានីភ្នំពេញ ៖ បើទោះជាកីឡាករ-កីឡាការិនីល្បីឈ្មោះមួយចំនួនត្រូវបានគេកត់សម្គាល់ថា
រាជធានីភ្នំពេញ ៖ បើទោះជាកីឡាករ-កីឡាការិនីល្បីឈ្មោះមួយចំនួនត្រូវបានគេកត់សម្គាល់ថា
រាជធានីភ្នំពេញ ៖ បើទោះជាកីឡាករ-កីឡាការិនីល្បីឈ្មោះមួយចំនួនត្រូវបានគេកត់សម្គាល់ថា បានហួសវ័យតំណាងឱ្យកម្ពុជាចេញទៅប្រកួតនៅក្នុងព្រឹត្តិការណ៍អន្តរជាតិក្ដីក៏កីឡាករ-កីឡាការិនីទាំងនោះនៅតែត្រូវបានចាត់ទុកជាSuper Starsប្រចាំប្រភេទកីឡាដែលពួកគេធ្លាប់តំណាងរហូតមកទល់ពេលនេះ ។
ភាសាសាមញ្ញគឺឱ្យតែនិយាយដល់ប្រភេទកីឡាណាមួយនោះ គេច្បាស់ជានឹកឃើញភ្លាមដល់កេរ្តិ៍ឈ្មោះរបស់Super Starទាំងនោះតែម្ដង ដោយក្នុងសហព័ន្ធដែលពួកគេជ្រកកោននៅតែរកអ្នកជំនួសតំណែងមួយនេះមិនទាន់បាន ។ ជាក់ស្ដែង Super Starsកីឡា៨រូបគឺសុទ្ធតែល្បីក្នុងប្រភេទកីឡាដ៏ពេញនិយមចំនួន៧ដោយត្រូវបានគេទទួលស្គាល់យ៉ាងទូលំទូលាយពីស្នាដៃ និងកេរ្តិ៍ឈ្មោះដែលបានជួយឱ្យប្រភេទកីឡារបស់ពួកគេមានការចាប់អារម្មណ៍មកទល់ពេលនេះ ។
– ស៊ន សៀវម៉ី ៖ គឺជា Super Star តែម្នាក់គត់របស់សហព័ន្ធកីឡាតេក្វាន់ដូកម្ពុជា ដោយនាងបានជួយឱ្យសហព័ន្ធមួយនេះមានការទទួលស្គាល់មិនត្រឹមតែកេរ្តិ៍ឈ្មោះក្នុងស្រុកប៉ុណ្ណោះទេ លើឆាកអន្តរជាតិក៏ទទួលស្គាល់ថានាងជាជើងខ្លាំងនៅក្នុងប្រភេទកីឡាមួយនេះផងដែរ ។ ជាក់ស្ដែងក្រោយពីដណ្ដើមបានមេដាយមាសពីកីឡាអាស៊ីកាលពីឆ្នាំ២០១៤ កីឡាការិនីរូបនេះទទួលបានភាពល្បីល្បាញយ៉ាងខ្លាំង ហើយក៏ជួយឱ្យប្រភេទកីឡាតេក្វាន់ដូខ្ទរខ្ទារកេរ្តិ៍ឈ្មោះណាស់ដែរ ដោយសារតែស្នាដៃដែលនាងធ្វើបាន ។ ស្របគ្នាដែលនាងទើបតែទទួលបានមេដាយមាសពីកីឡាស៊ីហ្គេមនៅប្រទេសម៉ាឡេស៊ីមុននេះផង ទើបកាន់តែធ្វើឱ្យនាងនៅតែឈរជើងជា Super Star គ្មានគូប្រៀបសម្រាប់ប្រភេទកីឡាតេក្វាន់ដូ បើទោះជាក្នុងពេលនេះក៏មានកីឡាករ-កីឡាការិនីមួយចំនួនកំពុងតែលេចធ្លោប្រចាំសហព័ន្ធក្ដី ។ នាងក៏ត្រូវបានគេចាប់អារម្មណ៍ថាជាកីឡាការិនីតែម្នាក់គត់ដែលទាក់ទាញស្ប៉តពាណិជ្ជកម្មបានច្រើនជាងគេ និងទទួលបានជំនួយឧបត្ថម្ភក៏ច្រើនជាងគេដែរ តាមរយៈឱកាសបានក្លាយជាអ្នកតំណាងដ៏ល្បីក្នុងប្រភេទកីឡាតេក្វាន់ដូនេះ។
– ចាន់ វឌ្ឍនាកា ៖ បើនិយាយពីកីឡាបាល់ទាត់ស្ទើរតែមួយផ្ទៃប្រទេសគឺនឹកដល់ឈ្មោះកីឡាករ ចាន់ វឌ្ឍនាកា ភ្លាម ។ លោកបានសាងកេរ្តិ៍ឈ្មោះនៅក្នុងវិស័យនេះធ្វើឱ្យមានការទទួលស្គាល់យ៉ាងខ្លាំង ជាពិសេសបន្ទាប់ពីលោកបានឈ្នះពានរង្វាន់លេចធ្លោក្នុងក្រុមជម្រើសជាតិផ្ទួនៗ ហើយចុងក្រោយក៏ត្រូវបានក្រុមបាល់ទាត់ល្បីឈ្មោះមួយរបស់ប្រទេសជប៉ុនទិញយកទៅលេងនៅក្នុងក្លិបរបស់គេរយៈពេលមួយឆ្នាំ ដែលនឹងដាច់កុងត្រាឆ្នាំទី១នៅដើមឆ្នាំ២០១៨ ។ លោកគឺជា Super Starបាល់ទាត់កម្ពុជាដែលមានទាំងជាតិ និងអន្តរជាតិទទួលស្គាល់ ជាពិសេសគឺសមត្ថភាពបណ្ដើរបាល់ ចែកបាល់ និងស៊ុតបាល់បញ្ចូលទីគូប្រកួត ។ ក្នុងនោះលោកក៏រត់លឿនមិនចាញ់កីឡាករល្អៗរបស់បរទេសផងដែរ ទើបសមត្ថភាពរបស់លោកត្រូវគេប្រៀបធៀបថាជា Messi របស់កម្ពុជាទៅទៀត ។
មកទល់ពេលនេះ ភាពល្បីល្បាញរបស់លោកបានដក់ជាប់ក្នុងអារម្មណ៍មហាជនយ៉ាងខ្លាំង ហើយបើទោះជាក្នុងវិស័យបាល់ទាត់មានកីឡាករល្អៗច្រើនលេចឡើងក៏ក្នុងវិស័យមួយនេះ កីឡាករ ចាន់ វឌ្ឍនាកា នៅតែជាប់ឈ្មោះថាជា Super Star ដដែល។
– កែ ឡេង និង អ៊ុក ស្រីមុំ ៖ កាលពីមុននៅក្នុងប្រភេទកីឡាប៉េតង់កម្ពុជា មានតែអ្នកស្រីកែ ឡេង ប៉ុណ្ណោះ ដែលត្រូវបានគេចាត់ទុកថាជា Super Star បន្ទាប់ពីអ្នកស្រីដណ្ដើមបានមេដាយមាសពិភពលោកកីឡាប៉េតង់ ។ ប៉ុន្តែឆ្លងកាត់ការចាប់ដៃគ្នាលេងជាគូជាមួយកីឡាការិនី អ៊ុក ស្រីមុំ ហើយទទួលបានមេដាយមាសនៅក្នុងព្រឹត្តិការណ៍ស៊ីហ្គេមដែលទើបបញ្ចប់ ទើបធ្វើឱ្យ Super Star នៅក្នុងប្រភេទកីឡាមួយនេះត្រូវគេបង្វែរការទទួលស្គាល់ថាមាន២នាក់ ដោយមិនមានតែម្នាក់ដូចមុន ។
មកទល់ពេលនេះ ឱ្យតែគេនិយាយដល់កីឡាប៉េតង់ គឺគេនឹកដល់កីឡាការិនីទាំង២រូបនេះភ្លាម ដោយអាចនិយាយបានថា អ្នកស្រី កែ ឡេង និងអ្នកស្រី អ៊ុក ស្រីមុំ គឺជាដៃគូដ៏ខ្លាំងនៅក្នុងសហព័ន្ធកីឡាប៉េតង់កម្ពុជា ដែលជាក្ដីសង្ឃឹមរបស់កម្ពុជានៅគ្រប់ការប្រកួតលើឆាកអន្តរជាតិសម្រាប់ប្រភេទកីឡានេះផងដែរ ។ យ៉ាងណាក៏ដោយ គេមិនទាន់ដឹងថា Super Stars ទាំងពីរនឹងបន្តឈរជើងនៅក្នុងប្រភេទកីឡាមួយនេះបានរហូតដល់ពេលណានោះទេ ក្នុងពេលដែលអ្នកស្រីក៏មានវ័យជ្រេ និងជាកីឡាការិនីដែលមានវ័យចំណាស់ជាងគេក្នុងចំណោមSuper Stars ផ្សេងទៀតដែលត្រូវបានគេទទួលស្គាល់នៅក្នុងសហព័ន្ធកីឡាល្បីៗ។
– ឃុន ឌីម៉ា ៖ លោកទើបតែបានក្លាយខ្លួនជា Super Star នៅក្នុងប្រភេទកីឡាប្រដាល់សេរីក្រោយឈ្នះមេដាយមាសនៅក្នុងព្រឹត្តិការណ៍កីឡាស៊ីហ្គេមមុននេះប៉ុណ្ណោះ ខណៈដែលក្នុងវិស័យប្រដាល់គុនខ្មែរ គេហាក់មិនទាន់បែងចែកឱ្យច្បាស់ថាអ្នកណាជាតំណាងឱ្យកម្ពុជាបានយូរឆ្នាំនៅឡើយ ។ ឆ្នាំខ្លះកីឡាកររូបនេះក៏លោតខ្លាំង ឆ្នាំខ្លះកីឡាកររូបនោះក៏លោតខ្លាំង ទើបគេពិបាកបែងចែកថាអ្នកណាជា Super Star ពិតប្រាកដបើធៀបនឹងសហព័ន្ធល្បីៗផ្សេងទៀតដែលមានកីឡាករ និងកីឡាការិនីលោតខ្លាំងតែម្នាក់ឬ២នាក់ហើយល្បីឈ្មោះប្រចាំសហព័ន្ធបានយូរឆ្នាំ ។ យ៉ាងណាមិញ បើគិតត្រឹមរយៈពេលនេះ គឺឃុន ឌីម៉ា (ឃឹម ឌីម៉ា) ត្រូវបានគេចាត់ទុកថាជាអ្នកលើកមុខមាត់កម្ពុជានៅក្នុងប្រភេទកីឡាប្រដាល់គុនខ្មែរឬប្រដាល់សេរីជាបណ្ដោះអាសន្នសិន ដោយសារតែលោកមានទម្ងន់ដណ្ដើមបានមេដាយមាសស៊ីហ្គេមឱ្យកម្ពុជាជាផ្លូវការក្ដៅៗ។
– ហែមថុន វិទិនី ៖ នាងគឺជា Super Star ក្នុងវិស័យហែលទឹកជាយូរមកហើយ បើទោះជានាងមិនធ្លាប់ទទួលបានមេដាយមាស សូម្បីតែម្ដងលើឆាកអន្តរជាតិ ។ នៅក្នុងសហព័ន្ធកីឡាហែលទឹក មានការប្រកាសថាមិនមានកីឡាការិនី ឬកីឡាករណាមួយហែលទឹកបានល្អជាងនាងនោះទេ ទើបឱ្យតែមានការបញ្ជូនកីឡាករឬកីឡាការិនីខាងផ្នែកហែលទឹកឱ្យចេញប្រកួតនៅក្រៅប្រទេស គឺនាងរមែងបានចេញទៅតំណាងមិនដែលបាត់មុខ ។ យ៉ាងណាមិញ នាងទទួលបានភាពល្បីល្បាញដោយសារតែនៅក្នុងស្រុកនាងមានសមត្ថភាពនាំមុខគេ ហើយរូបសម្រស់ក្នុងចំណោមកីឡាការិនីក៏លេចធ្លោ។ ស្របគ្នាដែលនាងក៏មានស្នេហាជាមួយកីឡាករល្បីឈ្មោះគឺចាន់ វឌ្ឍនាកា កាលពីអតីតកាល និងចុងក្រោយជាមួយកីឡាករ សំអឿន ពិដោរ នោះផង គឺរឹតតែធ្វើឱ្យនាងទទួលបានការចាប់អារម្មណ៍ទ្វេដង ។
– សម ថារ័ត្ន ៖ នាងជា Super Star នៅក្នុងប្រភេទកីឡាល្បុក្កតោដែលជាកីឡាប្រចាំត្រកូលរបស់កម្ពុជា ។ ទាំងលើឆាកអន្តរជាតិ និងនៅក្នុងស្រុក នាងត្រូវគេទទួលស្គាល់ថា ជាជើងខ្លាំងនៅក្នុងប្រភេទកីឡាមួយនេះ រហូតដល់មានការផ្ដល់ឱកាសឱ្យនាងបានក្លាយជាតួសម្ដែងវាយតប់ក្នុងខ្សែភាពយន្តយ៉ាងលេចធ្លោទៀតផង ។ មកទល់ពេលនេះ នាងនៅតែកាន់តំណែងជា Super Star ក្នុងប្រភេទកីឡាល្បុក្កតោ បើទោះជាកីឡាមួយនេះហាក់មិនសូវមានសកម្មភាពខ្លាំងក្លាដូចកាលពីចេញមុខដំបូងៗ ដែលជារឿយៗគឺឧស្សាហ៍បញ្ជូនកីឡាករ-កីឡាការិនីទៅប្រកួត ឬទៅសម្ដែងក្បាច់គុននៅក្រៅប្រទេសនោះ។
– ចូវ សុធារ៉ា ៖ មកទល់ពេលនេះ នាងបានសម្រេចចិត្តបោះបង់ការប្រកួតដែលត្រូវជ្រើសតាំងដោយសហព័ន្ធចំបាប់មួយរយៈមកហើយ ដោយបានប្ដូរតួនាទីធ្វើជាគ្រូបង្វឹកជំនួសវិញ ដើម្បីផ្ដល់ឱកាសឱ្យក្មេងជំនាន់ក្រោយ ។ ប៉ុន្តែគេមិនទាន់ឃើញអ្នកជំនាន់ក្រោយណាម្នាក់អាចជំនួសតំណែងលេចធ្លោរបស់នាងបាននៅឡើយទេ ទើបធ្វើឱ្យក្នុងសហព័ន្ធមួយនេះគឺនាងនៅតែមានកេរ្តិ៍ឈ្មោះមិនធម្មតា ។ បើសំដៅដល់កីឡាផ្នែកចំបាប់គេនឹកឃើញភ្លាមដល់ចូវ សុធារ៉ា ដោយសារតែនាងរកបានមេដាយមាសច្រើនគួរសមនាពេលកន្លងមកទាំងការប្រកួតក្នុងស្រុក និងក្រៅស្រុក។
ក្រៅពី Super Stars កីឡាទាំង៨រូបក៏មាន Super Starsប្រចាំសហព័ន្ធកីឡាផ្សេងទៀតផងដែរដោយគ្រាន់តែSuper Starsទាំងនោះមិនទាន់មានស្នាដៃល្បីឈ្មោះដែលរុញឱ្យមហាជនស្គាល់ច្បាស់ដូចថ្ងៃដូចកីឡាករ-កីឡាការិនីដែលបានរៀបរាប់ខាងលើ ។ យ៉ាងណាមិញ មន្ត្រីសហព័ន្ធកីឡាដែលលេចធ្លោនីមួយៗបានអះអាងថា ខ្លួននឹងរកអ្នកបន្តវេនឱ្យកាន់តែល្អដើម្បីជំនួសតំណែងឱ្យ Super Stars ខាងលើ ក្រោយពេលដែលអ្នកទាំង៨ក្លាយជាជើងខ្លាំងចូលនិវត្តន៍នាពេលអនាគត ៕
ចែករំលែកព័តមាននេះ