យុទ្ធសាស្ត្រចម្បងធ្វើឱ្យសហព័ន្ធកីឡាជាតិអសកម្មរីកចម្រើន
រាជធានីភ្នំពេញ ៖ លោក វ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ថា
រាជធានីភ្នំពេញ ៖ លោក វ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ពាក់ព័ន្ធនឹងយុទ្ធសាស្ត្រចម្បងរបស់NOCCដើម្បីធ្វើឱ្យសហព័ន្ធកីឡាជាតិនីមួយៗអាចដំណើរការទៅបានថា ទាល់តែសហព័ន្ធនោះរៀបចំធ្វើកំណែទម្រង់ផ្ទៃក្នុងឱ្យបានរួចរាល់ជាមុនសិន បើមិនដូច្នោះទេសហព័ន្ធនោះនឹងអាចព្យួរមិនឱ្យចូលរួមប្រកួតកីឡាស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះឡើយ ។
លោក វ៉ាត់ ចំរើន បានបន្តថា សហព័ន្ធណាដែលមិនដំណើរការ ឬមិនមានការវិវឌ្ឍទៅមុខផ្នែកបច្ចេកទេស និងមានបញ្ហាមិនប្រក្រតីនៅក្នុងការដឹកនាំគ្រប់គ្រងដូចជាយូដូ វូស៊ូ និងវ៉ូវីណាមជាដើម គណៈកម្មាធិការជាតិអូឡាំពិកកម្ពុជា(NOCC)សហការជាមួយក្រសួងអប់រំ យុវជន និងកីឡា បានតម្រង់ទិសឱ្យរៀបចំធ្វើកំណែទម្រង់ផ្ទៃក្នុងឡើងវិញ។
ដូច្នេះយើងត្រូវធ្វើដំណើរតទៅទៀត ដោយឱ្យសហព័ន្ធណាដែលអសកម្មមិនមានការរីកចម្រើនឬធាក់ថយក្រោយត្រូវធ្វើកំណែទម្រង់ឱ្យបានឆាប់តាមដែលអាចធ្វើទៅបានធ្វើយ៉ាងណាឱ្យមានការឯកភាពផ្ទៃក្នុងជាមុនសិនបើមិនធ្វើតាមទេសហព័ន្ធនោះនឹងត្រូវព្យួរមិនឱ្យចូលរួមប្រកួតកីឡាស៊ីហ្គេមឆ្នាំ២០២៣ទេ។
បញ្ហាទាំងអស់នេះជាយុទ្ធសាស្ត្រសា្លប់រស់របស់កីឡាជាតិយើង មិនអាចយកមកលេងសើចបានឡើយ ។
លោកបញ្ជាក់ថា គណៈកម្មាធិការជាតិអូឡាំពិកកម្ពុជាមិនបានបោះបង់ចោលសហព័ន្ធកីឡាណាដែលអសកម្មទេ ផ្ទុយទៅវិញ យើងមានតែខិតខំជំរុញសហព័ន្ធទាំងនោះឱ្យមានដំណោះស្រាយផ្ទៃក្នុងរបស់ខ្លួនរហូតទាល់តែអស់លទ្ធភាពមុននឹងសម្រេចព្យួរសហព័ន្ធនោះចោល ។ សព្វថ្ងៃ សហព័ន្ធមួយចំនួនសុទ្ធតែមានកញ្ចប់ថវិការបស់ខ្លួនត្រឹមត្រូវ ប៉ុន្តែកញ្ចប់ថវិកាទាំងនេះមានតែសហព័ន្ធដែលមានការរីកចម្រើន មានរចនាសម្ព័ន្ធច្បាស់លាស់ មានការទទួលស្គាល់ដោយក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជាប៉ុណ្ណោះ ។ ជាពិសេសសហព័ន្ធដែលមាននៅក្នុងគម្រោងផែនការមេ មានការវិវឌ្ឍផ្នែកបច្ចេកទេស មានដំណើរការសកម្មភាពរបស់ខ្លួនច្បាស់លាស់។
ដោយឡែកសហព័ន្ធមួយចំនួនដែលមិនទាន់មានការវិវឌ្ឍផ្នែកបច្ចេកទេស ទាល់តែស្វែងរកដំណោះស្រាយបញ្ហាផ្ទៃក្នុងរបស់ខ្លួនឱ្យបានរួចរាល់ មានសកម្មភាពហ្វឹកហាត់ច្បាស់លាស់ ត្រឹមត្រូវ ធ្វើទៅតាមកំណែទម្រង់ក៏អាចទទួលបានកញ្ចប់ថវិកាពីក្រសួងអប់រំ យុវជន និងកីឡាដូចគេឯងដែរ ។ កញ្ចប់ថវិកាទាំងនេះបានតែសហព័ន្ធណាដែលមានសក្ដានុពលស្ថិតនៅក្នុងផែនការមេសម្រាប់ការប្រកួតកីឡាស៊ីហ្គេមឆ្នាំ២០២៣តែប៉ុណ្ណោះ ។ លោកថា ការប្រកួតកីឡាស៊ីហ្គេមឆ្នាំ២០២៣យើងមានគម្រោងរួចហើយ ត្រូវមានសហព័ន្ធកីឡាជាតិចាប់ពី៣០ទៅ៣៥ប្រភេទកីឡាដែលសុទ្ធសឹងតែជាប្រភេទកីឡាដែលមានសក្ដានុពល ។
ប៉ុន្តែបើដល់ពេលនោះ សហព័ន្ធណាដែលមិនមានលទ្ធភាពគ្រប់គ្រាន់ កម្រិតបច្ចេកទេសអត្តពលិកនៅមានកម្រិត គឺមិនអនុញ្ញាតឱ្យចូលរួមប្រកួតទេបើទោះជាដល់ពេលនោះនៅសល់ប៉ុន្មានគឺធ្វើប៉ុនហ្នឹងកុំឱ្យមានច្រើនប្រភេទកីឡាតែឥតប្រយោជន៍ ។ លោកសង្កត់ធ្ងន់ថា ចាប់ពីពេលនេះទៅ គឺជាពេលវេលានៃការធ្វើកំណែទម្រង់ហើយ ដូច្នេះសហព័ន្ធកីឡាជាតិនីមួយៗមិនអាចព្រងើយកន្តើយបានទៀតឡើយ ៕
ចែករំលែកព័តមាននេះ