សិល្បករចាស់ៗរួមគ្នាសម្តែងល្ខោនបុរាណ
រាជធានីភ្នំពេញ ៖ លោកគ្រូ អ្នកគ្រូសិល្បៈបុរាណជាច្រើននាក់នឹងរួមគ្នាសម្តែងល្ខោនបុរាណរឿង
រាជធានីភ្នំពេញ ៖ លោកគ្រូ អ្នកគ្រូសិល្បៈបុរាណជាច្រើននាក់នឹងរួមគ្នាសម្តែងល្ខោនបុរាណរឿង«មហាវេស្សន្ដរជាតក» ចាប់ពីថ្ងៃទី១០ដល់១២ ខែកញ្ញា ឆ្នាំ២០១៧ នៅសាលសន្និសីទចតុម្មុខចាប់ពីម៉ោង៥ល្ងាចដល់ម៉ោង៧ និង៣០នាទីយប់ ។
គោលបំណងនៃការសម្តែងនោះ គឺចង់បង្ហាញពីស្នាដៃសម្តែងរបស់លោកគ្រូអ្នកសិល្បៈចាស់ៗដែលពួកគាត់នៅតែមានសមត្ថភាពក្នុងការសម្តែង ហើយជាពិសេសជាងនេះគឺចង់ឱ្យមហាជនចូលរួមថែរក្សាតម្លៃសិល្បៈមនុស្សរស់ ។
អ្នកដឹកនាំក្រុមសម្ដែងរឿង«មហាវេស្សន្ដរជាតក» លោកព្រឿង ឈៀង ឱ្យដឹងថា មុនពេលយើងសម្តែងជាផ្លូវការរឿង មហាវេស្សន្ដរជាតក យើងបានបួងសួងនៅប្រាសាទព្រះកែវមរកត ដើម្បីសុំពរជ័យសិរីសួស្ដីដល់ក្រុមសិល្បករទាំងអស់ ។ គោលបំណងសំខាន់នៃការបួងសួងនេះ គឺសុំឱ្យថ្ងៃសម្ដែងរឿងមហាវេស្សន្ដរជាតកបានទទួលជោគជ័យ និងសុំឱ្យប្រជាជនខ្មែរទាំងអស់គាំទ្រ និងលើកស្ទួយសិល្បៈ វប្បធម៌របស់ជាតិ ។
លោកគ្រូយិន យ៉ាន អតីតគ្រូបង្ហាត់ល្ខោន និងកំណាព្យនៃសាលាមធ្យមវិចិត្រសិល្បៈបញ្ជាក់ថា «វាជាការលំបាកមួយដែរសម្រាប់គ្រូ ចាស់ៗដែលចូលរួមសម្តែង ដោយពួកគាត់បាក់ស្រុតកម្លាំងច្រើន ប៉ុន្តែព្យាយាមហាត់ពុតលត់ដុំទាំងកាយវិការ និងសំឡេងដើម្បីបម្រើសិល្បៈបុរាណ និងការបញ្ចូលកំណាព្យ ក្នុងន័យឱ្យសុក្រឹតនៅក្នុងសាច់រឿងមួយនេះ» ។
អ្នកគ្រូប៉ែន សុខជា សិល្បការិនីបុរាណនិងជាអ្នកចូលរួមសម្តែងផងនោះបញ្ជាក់ថា «ជាការណ៍ពិតកម្លាំងយើងកាន់តែខ្សោយ ជាពិសេសបញ្ហាជង្គង់ ប៉ុន្តែយើងនៅតែមានទឹកចិត្តខំប្រឹងប្រែងឱ្យបានជោគជ័យ ហើយឱ្យដំណើរការនៃការរៀបចំនេះបានរលូន ។
កម្លាំងកាយគឺទន់ច្រើន តែយើងមានកម្លាំងចិត្ត ហើយសប្បាយចិត្តដែលបានចូលរួមសម្តែងនៅលើឆាកជាថ្មី បើទោះបីជាពេលនេះយើងមានវ័យកាន់តែចាស់ក៏ដោយ» ។
លោកអន ឈាហេង ទីប្រឹក្សាក្រសួងវប្បធម៌ និងវិចិត្រសិល្បៈអះអាងថា «ខ្ញុំជាអ្នកសិល្បៈដែលបានបូជាដល់សិល្បៈ ដូច្នេះត្រូវតែធ្វើអ្វីដើម្បីសិល្បៈខ្មែររីកចម្រើន ហើយសង្ឃឹមថា បើបងប្អូនយើងទាំងអស់ពេញចិត្ត និងគាំទ្រស្នាដៃសិល្បៈដូនតាយើងនាពេលនេះ មានន័យថា ក្នុងនាមខ្ញុំជាអ្នកសិល្បៈមួយរូបនេះពិតជាអស់ចិត្ត ហើយលាចាកលោកទៅដោយគ្មានស្តាយស្រណោះឡើយ ដោយសារយើងបានបន្សល់ទុកនូវស្នាដៃ» ។
ល្ខោនបុរាណរឿង មហាវេស្សន្តរជាតក នឹងសម្តែងជូនប្រមុខរាជរដ្ឋាភិបាលកម្ពុជាទស្សនាដំបូងនៅថ្ងៃទី៩ ខែសីហា មុននឹងសម្តែងជូនទស្សនិកជនទស្សនានៅសាលសន្និសីទចតុម្មុខពីថ្ងៃទី១០ ទី១១ និងទី១២ កញ្ញា ឆ្នាំ២០១៧ វេលាម៉ោង៥ល្ងាចដល់ម៉ោង៧ និង៣០យប់ ។ តម្លៃសំបុត្រ១០ម៉ឺនរៀល, ៦ម៉ឺនរៀល និង៤ម៉ឺនរៀល មានលក់នៅសាលសន្និសីទចតុម្មុខ ៕
ចែករំលែកព័តមាននេះ