មតិនានាទាក់ទិនបទចម្រៀងនិពន្ធថ្មី
រាជធានីភ្នំពេញ ៖ ក្នុងរយៈពេលចុងក្រោយនេះ បណ្តាផលិតកម្មចម្រៀងក្នុងស្រុកស្ទើរទាំងអស់យក
រាជធានីភ្នំពេញ ៖ ក្នុងរយៈពេលចុងក្រោយនេះ បណ្តាផលិតកម្មចម្រៀងក្នុងស្រុកស្ទើរទាំងអស់យកចិត្តទុកដាក់ផលិតបទចម្រៀងថ្មីមិនចម្លងពីបរទេស ក្នុងពេលដែលបទចម្លងពីបរទេសរងការរិះគន់ខ្លាំងពីទស្សនិកជន ។
ការផលិតបទថ្មីរបស់ផលិតកម្មមួយចំនួនមានការគាំទ្រពីអ្នកស្តាប់ ប៉ុន្តែក៏មានបទខ្លះមិនជោគជ័យតាមការចង់បានរបស់អ្នកនិពន្ធផងដែរ ។ ករណីមិនទទួលជោគជ័យត្រូវយុវវ័យមួយចំនួនលើកឡើងកាលពីពេល ថ្មីៗកន្លងមកថា ការតាក់តែងជាបទភ្លេង និងទំនុកច្រៀងខ្លះ ហាក់មិនស៊ីសង្វាក់គ្នា ហើយកត្តាមួយទៀតអ្នកនិពន្ធតែងតែបញ្ចូលជាចង្វាក់រ៉េបស្តាប់មិនចូល ។
អ្នកជួសជុលទូរស័ព្ទយុវជនវណ្ណៈ លើកឡើងកាលពីពេល ថ្មីៗកន្លងមកថា គេមិនសូវចូលចិត្តបទសម័យនេះទេ ពោលនៅតែចូលចិត្តដដែលទៅលើបទចម្រៀងពីដើម ប៉ុន្តែក្នុងរយៈពេលចុងក្រោយនេះគេមានចំណាប់អារម្មណ៍ស្តាប់បទសម័យនេះដែរ ។ ទោះជាយ៉ាងណាក្តីគេមិនសូវចាប់អារម្មណ៍ថាវាជាបទចម្លងពីគេ ឬបទថ្មីស្នាដៃខ្មែរទេ សំខាន់ស្តាប់ទៅពីរោះ ។ បន្ទាប់ពីមានការផ្សព្វផ្សាយពីការផលិតបទចម្រៀងថ្មីមកក៏ចាប់អារម្មណ៍ ហើយលោកធ្លាប់ស្តាប់បទចម្រៀងបែបនោះមួយចំនួនដែរ ។
ពេលខ្លះបទចម្រៀងថ្មីមួយចំនួនលោកវណ្ណៈ ស្តាប់ទៅហាក់មិនសូវជាចូលត្រចៀកហើយបញ្ចូលជាទំនុកច្រៀងបែបរ៉េបទៀតនោះរឹតតែពិបាកស្តាប់ តែលោកទទួលស្គាល់ថា មានបទចម្រៀងមួយចំនួនពីរោះ និងបែបមនោសញ្ចេតនា ដែលចំណុចនេះគឺជាអ្វីដែលលោកចូលចិត្ត ។
កម្មករសំណង់យុវជនម៉ូ លើកឡើងថា គេចូលចិត្តបទចម្រៀងបែបយុវវ័យខ្លាំង បើទោះបីជាបទនោះចម្លង ឬជាបទនិពន្ធថ្មីរបស់អ្នកនិពន្ធខ្មែរក៏ដោយ ។ ក្នុងរយៈពេលចុងក្រោយនេះគេចាប់អារម្មណ៍ពីការផលិតបទចម្រៀងថ្មីរបស់បណ្តាផលិតកម្ម ផ្សេងៗ ហើយបទទាំងនោះរូបគេចូលចិត្ត ។ ជាក់ស្តែងដូចជាបទ «ទីបំផុត» របស់លោកហេង ពិទូ និងបទ «សុំទោស» របស់លោកសៅ ឧត្តម និងបទចម្រៀងមួយចំនួនទៀត ពេលស្តាប់ធ្វើឱ្យមានភាពអណ្តែតអណ្តូងទៅតាមបទចម្រៀង ។
យុវជនម៉ូ លើកទឹកចិត្តឱ្យមានការនិពន្ធបទចម្រៀងថ្មីបន្តទៀត ពិសេសបញ្ចូលបទមនោសញ្ចេតនាឱ្យបានច្រើន ព្រោះទាំងរូបគេ និងយុវវ័យជាច្រើនចូលចិត្តបទបែបនោះ។
ជាមន្ត្រីធ្វើការនៅក្រសួងរដ្ឋមួយលោក វិចិត្រ លើកឡើងថា បច្ចុប្បន្នបទចម្រៀងថ្មីមានការចាប់អារម្មណ៍ខ្លាំងពីប្រិយមិត្តអ្នកស្តាប់ មិនថាតែរូបលោកទេ ។ កន្លងមកបទចម្រៀងខ្មែរភាគច្រើនចម្លងបទភ្លេងពីបរទេសដោយមិនផលិតដោយខ្លួនឯងទេ ដោយសារតម្រូវតាមទីផ្សារអ្នកស្តាប់ ។ លុះក្រោយមកដោយសារមានការរិះគន់ខ្លាំងទើបបណ្តាផលិតកម្មនានាងាកមកផលិតបទចម្រៀងថ្មី ហើយទទួលបានជោគជ័យមិនចាញ់បទចម្លងពីបរទេស ។
លោកវិចិត្រ និយាយថា «ខ្ញុំជឿថាកូនខ្មែរពិតជាមានស្នាដៃក្នុងតាក់តែងនិពន្ធដោយខ្លួនឯង តាមលំនាំដែលអ្នកនិពន្ធជើងចាស់ធ្លាប់ធ្វើពីមុនមក ហើយបទចម្រៀងទាំងនោះខ្លះមានការគាំទ្រយ៉ាងខ្លាំងពីអ្នកស្តាប់ ដោយសារអ្នកនិពន្ធចេះជ្រើសរើសសាច់ភ្លេង និងទំនុកច្រៀងចាក់ដោតដល់បេះដូងយុវវ័យ ។
ខ្ញុំសូមស្នើឱ្យបណ្តាផលិតកម្មក្នុងស្រុកនានាបន្តធ្វើបទចម្រៀងនិពន្ធដោយខ្លួនឯងនេះបន្តទៀត បើទោះបីជាពេលខ្លះវាមានការពិបាកបន្តិចយ៉ាងណាក៏ដោយ »។
ប្រធានផ្នែកលក់របស់ផលិតកម្មថោនលោក នួន វិចិត្រ អះអាងថា តាមការសង្កេតបទនិពន្ធថ្មីមានការគាំទ្រច្រើនពីប្រិយមិត្តអ្នកស្តាប់ជាងបទចម្លងពីគេ ។ កន្លងមកផលិតកម្ម ថោន បានផលិតបទថ្មីជាបន្តបន្ទាប់ ពោលមិនមែនទើបតែផលិតក្នុងពេល ថ្មីៗនេះទេ ។
លោកនួន វិចិត្រ បញ្ជាក់ថា «កម្រិតនៃការល្អក៏មានសភាពល្អប្រសើរផងដែរ តួយ៉ាងកាលពីពេល ថ្មីៗនេះផលិតកម្មថោនបានទទួលជោគជ័យទៅលើបទ «មេឃកំពុងភ្លៀងហើយ» ច្រៀងដោយមាស សុខសោភា» ។
បើតាមលោកនួន វិចិត្រ ការផលិតបទថ្មីពិបាកព្រោះត្រូវការធនធានច្រើន ជាមួយនឹងអ្នកដែលមានជំនាញ និងបទពិសោធន៍ ព្រោះមិនមែនចេះតែធ្វើឱ្យរួចពីដៃទេ ។ លោកវិចិត្រ បញ្ជាក់ថា «ការធ្វើបទOriginal Song គឺត្រូវទាមទារឱ្យអ្នកនិពន្ធគិតច្រើនជាងបទដែលចម្លងពីគេ ហើយមួយខែគឺយើងធ្វើបានតែ២ទៅ៣បទប៉ុណ្ណោះ» ។
លោកនួន វិចិត្រ ស្នើឱ្យទស្សនិកជនបន្តគាំទ្រ និងលើកទឹកចិត្តការផលិតបទចម្រៀងនិពន្ធថ្មី ។ លើសពីនេះសូមទិញស៊ីឌីOriginal កុំទិញCD Copy ធ្វើឱ្យផលិតកម្មខាតបង់ និងបាក់ទឹកចិត្តក្នុងការផលិតបទថ្មីៗ ៕
ចែករំលែកព័តមាននេះ