លោក ម៉ាត់ សារ៉ន ប្រាប់មូលហេតុគ្រូគុនខ្មែរបានប្រាក់ខែតិចជាងគ្រូថៃ
រាជធានីភ្នំពេញ ៖ លោក ម៉ាត់ សារ៉ន ប្រធានក្លិបមរតកយុទ្ធគុនខ្មែរ បានប្រាប់ថា
រាជធានីភ្នំពេញ ៖ លោក ម៉ាត់ សារ៉ន ប្រធានក្លិបមរតកយុទ្ធគុនខ្មែរដែលមានទីតាំងស្ថិតនៅក្នុងសង្កាត់ច្រាំងចំរេះទី១ ខណ្ឌឫស្សីកែវ ថ្វីដ្បិតតែរូបលោកមិនមែនជាកីឡាករល្បីឈ្មោះដូចកីឡាករខ្លាំងៗមួយចំនួនក្ដីក៏រូបលោកធ្លាប់មានបទពិសោធន៍ទៅបង្ហាត់នៅក្រៅប្រទេសអស់រយៈពេលជាច្រើនឆ្នាំ និងបានដឹងច្បាស់ពីអ្វីដែលជាតម្លៃនៃវប្បធម៌ក្បាច់គុនបុរាណខ្មែរ។
លោក ម៉ាត់ សារ៉ន បច្ចុប្បន្នមានអាយុ៤៨ឆ្នាំ មានស្រុកកំណើតនៅភូមិព្រែកក្ដាមស្រុកពញាឮ ខេត្តកណ្ដាល ។ លោកមិនមានឈាមជ័រជាកីឡាករប្រដាល់បន្តិចណាឡើយគ្រាន់តែរូបលោកចូលចិត្តហាត់កីឡាប្រដាល់តាំងពីតូចៗមកម្ល៉េះ គឺហ្វឹកហាត់ដើម្បីសុខភាពប៉ុណ្ណោះ ។ លោកបានសិក្សាត្រឹមថ្នាក់ឌីប្លូមនៅឆ្នាំ១៩៨៧ប៉ុន្តែដោយសារកាលណោះប្រទេសកម្ពុជានៅមិនទាន់ចប់សង្គ្រាមលោកក៏បានចូលបម្រើក្នុងជួរកងទ័ពក្នុងសម័យរដ្ឋកម្ពុជានៅឆ្នាំ១៩៩២ ដោយត្រូវបានមេចាត់តាំងឱ្យទៅឈរជើងនៅសមរភូមិសំឡូត ក្នុងខេត្តបាត់ដំបង ។
ជាអកុសលរូបលោកត្រូវខ្មែរក្រហមនៅជាយដែនកម្ពុជាថៃចាប់បានយកទៅឃុំឃាំងអស់រយៈពេល៣ឆ្នាំ ។ ចាត់ទុកថាសំណាងល្អដែរដែលលោកអាចរត់រួចពីមន្ទីរឃុំឃាំងរបស់ខ្មែរក្រហមទៅជ្រកកោននៅខេត្តត្រាត ប្រទេសថៃ ដោយធ្វើជាកម្មករនេសាទសមុទ្រហើយនៅពេលទំនេរពីការងារលោកឆ្លៀតហ្វឹកហាត់ក្បាច់ប្រដាល់ផងដែរ ។
បន្ទាប់ពីរស់នៅនិងហ្វឹកហាត់នៅប្រទេសថៃអស់រយៈពេលជាច្រើនឆ្នាំលោកត្រូវបានអ្នករៀបចំការប្រកួតអនុញ្ញាតឱ្យឡើងសង្វៀនប្រកួតនៅពេលមានបុណ្យភូមិម្ដងម្កាល។
នៅក្នុងឆ្នាំ២០០៣ លោកបានវិលមករស់នៅប្រទេសកម្ពុជាវិញក្នុងពេលវិស័យកីឡាប្រដាល់កម្ពុជាមិនទាន់រីកចម្រើននៅឡើយ ។ ក្រោយមកលោកត្រូវបានលោក យុទ្ធ ភូថង អតីតអភិបាលខេត្តកោះកុង សុំឱ្យរូបលោកជួយបង្ហាត់នៅក្នុងក្លិបអប្សរាក្បាច់គុនខ្មែរអស់រយៈពេលជាច្រើនខែក្នុងឋានៈជាគ្រូជំនួយ។បន្ទាប់មកលោកបានជួយបង្ហាត់នៅក្នុងក្លិបខា្លរខិនមានឫទ្ធិអស់រយៈពេលជាច្រើនខែទៀត និងចុងក្រោយមុនពេលរូបលោកចេញទៅបង្ហាត់នៅប្រទេសជប៉ុន លោកបានជួយបង្ហាត់ក្នុងកម្មវិធីកំពូលអ្នកប្រយុទ្ធMMAវគ្គ៣របស់សង្វៀនទូរទស្សន៍CTNដែលកាលណោះគ្រប់គ្រងដោយលោក ម៉ា សេរី ដោយធ្វើជាគ្រូជំនួយនៅទីនោះអស់រយៈពេលជិត១ឆ្នាំ។
ទីបំផុតនៅក្នុងឆ្នាំ២០១៤ លោកត្រូវបានសហព័ន្ធកីឡាប្រដាល់ប្រទេសជប៉ុនចរចាឱ្យទៅធ្វើជាគ្រូបង្ហាត់នៅទីនោះអស់រយៈពេលជិត៣ឆ្នាំ ។ នៅទីនោះលោកពិតជាបានដឹងច្បាស់ថាគ្រូបង្ហាត់កម្ពុជាយើងមិនត្រូវបានគេផ្ដល់តម្លៃខ្ពស់ដូចគ្រូបង្ហាត់មកពីប្រទេសថៃឡើយ សូម្បីតែការរស់នៅនិងហូបចុកដើរហើរក៏ត្រូវបានគេដាក់កម្រិតឱ្យដែរមិនដូចគ្រូមកពីថៃដែលមានសេរីភាពគ្រប់គ្រាន់ទេ ។ ឯតម្លៃខ្លួនគ្រូបង្ហាត់កម្ពុជាក្នុងខែដំបូងបានត្រឹមតែ៧០០ដុល្លារអាមេរិកប៉ុណ្ណោះ រហូតដល់ជិត២ឆ្នាំទើបឡើងដល់១.០០០ដុល្លារក្នុងពេលគ្រូថៃតម្លៃខ្លួនទាបបំផុត២ពាន់ដុល្លារខែដំបូងរហូតឡើងដល់៣ពាន់ដុល្លារ ។ ការផ្ដល់ប្រាក់ខែទាបជាងគ្រូថៃបែបនេះមានគ្រូប្រដាល់ភាគច្រើននិយាយថា មកពីគេមិនសូវឱ្យតម្លៃកម្ពុជាដូចថៃ ។ បើសិនជាចង់ឱ្យគ្រូបង្ហាត់កម្ពុជាមានតម្លៃដូចគេគួរតែសហព័ន្ធកីឡាប្រដាល់គុនខ្មែររៀបចំឱ្យមានកិច្ចសហការមួយឱ្យបានច្បាស់លាស់ជាមួយសហព័ន្ធកីឡាប្រដាល់ប្រទេសជប៉ុន ដូចជាការចុះអនុស្សរណៈឱ្យបានត្រឹមត្រូវជាផ្លូវការ និងនិយាយពីតម្លៃប្រាក់ខែឱ្យបានច្បាស់លាស់។
មានមូលហេតុមួយទៀតដែលគ្រូថៃមានតម្លៃខ្លួនខ្ពស់ជាងគ្រូកម្ពុជាដោយសារពួកគេស្គាល់តែក្បាច់គុនថៃប៉ុណ្ណោះចំណែកក្បាច់គុនខ្មែរពុំសូវមានគេស្គាល់ច្បាស់ឡើយ ។ សូម្បីប្រជាជនជប៉ុនមួយចំនួនក៏មិនស្គាល់យើងដែរដោយសារកម្ពុជាមានសង្គ្រាមរុាំរៃ៉អស់រយៈពេលជាច្រើនឆ្នាំជាហេតុធ្វើឱ្យថៃមានឱកាសយកក្បាច់គុនបូរាណខ្មែរទៅផ្សព្វផ្សាយនៅលើពិភពលោកថាជាក្បាច់គុនរបស់គេទៅវិញ ។ មិនតែប៉ុណ្ណោះប្រទេសថៃគេផ្ដល់តម្លៃដល់កីឡារបស់គេណាស់ ដូចជាសម្លៀកបំពាក់កីឡាករក៏បង្កប់នូវស្លាកសញ្ញានៃអត្តសញ្ញាណជាតិរបស់គេដែរ មិនតែប៉ុណ្ណោះគេថែមទាំងលើកតម្កើនកីឡាករល្បីៗដោយឆ្លាក់ឈ្មោះពួកគេនៅលើសម្លៀកបំពាក់លក់បានតម្លៃរាប់លានបាតទៀតផង ។ ម្យ៉ាងប្រទេសថៃតែងតែរៀបចំកម្មវិធីប្រកួតផ្សព្វផ្សាយក្បាច់គុននៅតាមបណ្ដាប្រទេសជាច្រើននៅលើពិភពលោក ដូចជាជប៉ុន សិង្ហបុរី ឥណ្ឌូណេស៊ីជាដើម
ដោយបាននាំយកកីឡាករល្បីៗទៅប្រកួតជាមួយកីឡាកររបស់ប្រទេសទាំងនោះទៀតផង ។
ដូច្នេះក្នុងនាមរូបលោកដែលជាអ្នកស្រឡាញ់វិស័យកីឡានិងចង់ចូលរួមលើកស្ទួយវិស័យក្បាច់គុនបុរាណខ្មែរមួយរូបដែរនោះ លោកក៏មានបំណងចង់ឱ្យសហព័ន្ធកីឡាប្រដាល់គុនខ្មែរធ្វើដូចគេ កុំឱ្យគេយកក្បាច់គុនរបស់យើងទៅសាបព្រោះតាមអំពើចិត្តហើយស្រែកថាជាក្បាច់គុនរបស់គេតទៅទៀត ។ សព្វថ្ងៃដោយសារតែលោកស្រឡាញ់វិស័យកីឡាប្រដាល់បែបនេះហើយទើបខិតខំប្រឹងប្រែងប្រមែប្រមូលថវិកាផ្ទាល់ខ្លួនមកបង្កើតក្លិបកីឡាប្រដាល់នេះឡើងដោយទទួលក្មេងខ្លះជាក្មេងកំព្រានិងខ្លះត្រូវបានឪពុកម្ដាយអនុញ្ញាតយកមកបណ្ដុះបណ្ដាលដោយមិនយកលុយដែលរហូតមកដល់ពេលនេះមានចំនួនជាង២០នាក់ហើយ ៕
ចែករំលែកព័តមាននេះ