ស្ត្រីខ្មែរ២នាក់ម្តាយ និងកូនក្លែងឯកសារដកប្រាក់ពីធនាគារអស់ជាង៧ម៉ឺនដុល្លារអាមេរិក
រាជធានីភ្នំពេញ ៖ ស្ត្រីខ្មែរ២នាក់ម្តាយ និងកូន ត្រូវបានសមត្ថកិច្ចនគរបាលនាយកដ្ឋានគ្រប់គ្រងសន្តិសុខឯកជនក្រសួងមហាផ្ទៃ
រាជធានីភ្នំពេញ ៖ ស្ត្រីខ្មែរ២នាក់ម្តាយ និងកូន ត្រូវបានសមត្ថកិច្ចនគរបាលនាយកដ្ឋានគ្រប់គ្រងសន្តិសុខឯកជនក្រសួងមហាផ្ទៃ ឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ កាលពីរសៀលថ្ងៃទី៣១ សីហា ពាក់ព័ន្ធក្លែងឯកសារ ឆបោកប្រាក់ ជនជាតិជប៉ុនប្រមាណជាង៧ម៉ឺនដុល្លារអាមេរិក។ ស្ត្រីជាម្តាយឈ្មោះ ប៊ុត សឿន អាយុ៤៨ឆ្នាំ មានអាស័យដ្ឋាននៅភូមិព្រែកខ្សេវ ឃុំរការខ្ពស់ ស្រុកស្អាង ខេត្តកណ្តាល និងកូនស្រីឈ្មោះ ភា សុខលីន អាយុ២៨ឆ្នាំ មានទីលំនៅភូមិបូរីសំបូរមាស សង្កាត់ដង្កោ ខណ្ឌដង្កោ រាជធានីភ្នំពេញ (មានប្តីជាជនជាតិនីហ្សេរីយ៉ា)។
ទាក់ទាន់នឹងការនាំខ្លួនស្ត្រី២នាក់ម្តាយ និងកូនទៅសាលាដំបូងនេះត្រូវបានសមត្ថកិច្ចឲ្យដឹងថា កាលពីថ្ងៃទី១០ កក្កដា ២០១៧ នាយកដ្ឋានកណ្តាលនគរបាលសន្តិសុខ បានទទួលពាក្យបណ្តឹងពីឈ្មោះ សាលី វង្សកុមារ ភេទប្រុស អាយុ៣២ឆ្នាំ ជាបុគ្គលិកធនាគារABA តំណាងឲ្យធនាគារវឌ្ឍនៈអាស៊ីចំកាត់(អេបីអេ) ប្តឹងទៅលើឈ្មោះ Nge Try ជនជាតិនីហ្សេរីយ៉ា(ប្តីនាង ភា សុខលីន) ដែលកំពុងគេចខ្លួនបានក្លែងតួនាទី Direct0r Foregn Remittance របស់ធនាគារ អេបីអេ យកទៅឆបោកលើឈ្មោះ KONDO YUSUKE ជនជាតិជប៉ុន តាមរយៈអ៊ីមែលថា គាត់(KONDO YUSUKE) ទទួលបានប្រាក់មរតកចំនួន១០លាន៧សែនដុល្លារអាមេរិក។
មន្ត្រីនគរបាលបន្តថា ដើម្បីទទួលបានសិទ្ធិវេរលុយចេញពីធនាគារ អេបីអេ ជនរងគ្រោះត្រូវបង់ថ្លៃសេវាមេធាវី និងចំណាយលើឯកសារៗជាមុនសិន។ ពេលនោះជនរងគ្រោះក៏បានជឿស្លុងទៅលើជនឆបោក ជនជាតិនីហ្សេរីយ៉ា បានផ្ញើប្រាក់មកឲ្យចំនួន៣លើក(សរុប ៧៦.៥១២ដុល្លារអាមេរិក) លើកទី១ ថ្ងៃទី២១ ឧសភា ២០១៧ វេរចូលគណនេយ្យលេខ០០០២២៥៧១៦ របស់ឈ្មោះ ភា សុខលីន ចំនួន៤៨.៤៣២ដុល្លារអាមេរិក។ លើកទី២.ថ្ងៃទី២២ ឧសភា ២០១៧ វេចូលគណនេយ្យលេខ០០០០៨២៨២៤ របស់ឈ្មោះ ព្រំ សុភាង ចំនួន៦.៦៨០ ដុល្លារអាមេរិក និងលើកទី៣.នៅថ្ងៃទី២០ មិថុនា ២០១៧ វេរចូលគណនេយ្យលេខ២៧២៧៦៤ របស់ឈ្មោះ ប៊ុត សឿន ចំនួន២១.៤០០ដុល្លារអាមេរិក។ ក្រោយពីនាយកដ្ឋានកណ្តាលសន្តិសុខទទួលបានពាក្យបណ្តឹងនោះហើយ សំណុំរឿងនេះត្រូវបានចាត់បញ្ជូនទៅនាយកដ្ឋានគ្រប់គ្រងសន្តិសុខឯកជន ដើម្បីស្នើសុំទៅស្ថាប័នអយ្យការ នៃសាលាដំបូងបើកការស៊ើបអង្កេត។ លុះដល់ថ្ងៃទី២៩ សីហា ២០១៧ កម្លាំងសមត្ថកិច្ចនាយកដ្ឋានសន្តិសុខឯកជន បានឈានដល់ការឃាត់ខ្លួនជនសង្ស័យស្ត្រីខ្មែរ២នាក់ម្តាយ និងកូននេះ ចំណែកបុរសជាប្តី ជាកូនប្រសារ ជាជនជាតិនីហ្សេរីយ៉ា ដែលជាអ្នកផ្តើមគំនិតបាន និងកំពុងគេចខ្លួនបាត់។
បន្ទាប់ពីសមត្ថកិច្ចឃាត់ខ្លួនឈ្មោះ ភា សុខលីន បានសារភាពថា រូបគេបានស្គាល់ឈ្មោះ CHILIKE JOHN ជនជាតិនីហ្សេរីយ៉ា និងយកធ្វើជាប្តីច្រើនឆ្នាំហើយ។ ចំពោះឈ្មោះ Nge Try ដែលគេប្រើយកមកឆបោកប្រាក់ពីជនជាតិជប៉ុននេះ គឺជាឈ្មោះក្លែងក្លាយទេ ឈ្មោះ CHILIKE JOHN ជាឈ្មោះពិត។ ដូច្នោះការរៀបចំឆបោកប្រាក់ពីជនជាតិជប៉ុននេះ គឺប្តីនាងជាអ្នកផ្តើមគំនិត នាង និងម្តាយគ្រាន់តែបានប្រើប្រាស់គណនេយ្យរបស់ខ្លួនដើម្បីទៅបើកយកប្រាក់តាមអ្វីដែលប្តីប្រើឲ្យធ្វើនោះទេ ហើយនៅពេលនាងទៅបើកប្រាក់នោះម្តងៗ ប្តីតែងតែប្រាប់ថា ប្រាក់នេះជាប្រាក់របស់មិត្តភក្តិគេ ប៉ុន្តែប្តីបានឲ្យម្តង២០០ដុល្លារដែរនៅពេលបើកប្រាក់នោះបាន។
ស្ត្រីជាម្តាយឈ្មោះ ប៊ុត សឿន ក៏បានសារភាពប្រហាក់ប្រហែលគ្នា និងកូនស្រីដែរគាត់គ្មានគំនិតឯណាចេះប្រើល្បិចឆបោកតាមបែបបច្ចេកវិទ្យាទំនើបដូច្នេះទេ។ បើទោះបីជាយ៉ាងណាចម្លើយសារភាពរបស់ម្តាយ និងកូនពិតជាមានភាពស៊ីសង្វាក់គ្នាពាក់ព័ន្ធជាមួយកូនប្រសារ ឬប្តី ដែលជាជនជាតិនីហ្សេរីយ៉ា ប្រព្រឹត្តបទល្មើសព្រហ្មទណ្ឌ(ឆបោក)ប្រាក់ជនជាតិជប៉ុនដូចពាក្យបណ្តឹងខាងលើនេះ ដូច្នេះបានជាសមត្ថកិច្ចកសាងសំណុំរឿង បញ្ជូនស្ត្រី២នាក់ម្តាយ និងកូនទៅកាន់សាលាដំបូងរាជធានីភ្នំពេញតាមនីតិវិធី៕
ចែករំលែកព័តមាននេះ