ហេតុផលមិនគួរដាក់ជើងលើតាប្លូរថយន្តពេលធ្វើដំណើរ
តើអ្នកទាំងអស់គ្នាចូលចិត្តធ្វើដំណើរផ្លូវឆ្ងាយដែរឬទេ ? ពេលខ្លះ ដោយសារតែធ្វើដំណើរផ្លូវឆ្ងាយពេក អ្នកអង្គុយជិតអ្នកបើកបរ អាចនឹង
តើអ្នកទាំងអស់គ្នាចូលចិត្តធ្វើដំណើរផ្លូវឆ្ងាយដែរឬទេ ? ពេលខ្លះ ដោយសារតែធ្វើដំណើរផ្លូវឆ្ងាយពេក អ្នកអង្គុយជិតអ្នកបើកបរ អាចនឹងមានអារម្មណ៍ធុញថប់ ហើយក៏លើកជើងទៅដាក់នៅលើតាប្លូដើម្បីកុំឲ្យស្ពឹកស្រពន់ ប៉ុន្តែបន្ទាប់ពីអានអត្ថបទនេះរួចហើយ អ្នកអាចនឹងលែងធ្វើដូចនេះ ។
ខាងក្រោមនេះ គឺជាការចែករំលែកបទពិសោធន៍របស់ស្ត្រីម្នាក់ ដែលជួបប្រទះនឹងរឿងអាក្រក់មួយក្នុងជីវិតរបស់នាង ដោយសារតែយកជើងទៅដាក់លើតាប្លូរថយន្តពេលធ្វើដំណើរ ៖
អ្នកនាង Audra មកពីរដ្ឋហ្សកហ្ស៊ី សហរដ្ឋអាមេរិក បានរៀបរាប់នូវហេតុការណ៍កាលពី២ឆ្នាំមុន ពេលដែលនាងកំពុងជិះក្នុងរថយន្តនៅកៅអីខាងមុខជាប់អ្នកបើកបរ។ នាងមានទម្លាប់អាក្រក់មួយ គឺនាងចូលចិត្តលើកជើងដាក់នៅលើតាប្លូរថយន្តខាងមុខ ។
នាងបានប្រាប់ទៅព័ត៌មាន KTVQ ថា ៖«តាំងពីដើមរៀងមក ខ្ញុំចូលចិត្តដាក់ជើងបែបនេះ។ ប្តីរបស់ខ្ញុំតែងតែប្រាប់ឲ្យខ្ញុំប្រយ័ត្ន ព្រោះវាអាចធ្វើឲ្យខ្ញុំបាក់ជើងបាន » ។
នាងតែងតែស្តាប់តាមប្តីរបស់នាងជានិច្ច ពេលប្តីនាងស្រែកប្រាប់ ប៉ុន្តែនៅពេលនាងភ្លេចខ្លួន ស្រាប់តែមានរថយន្តមួយផ្សេងទៀត មកបុកចំពីមុខរថយន្តដែលនាងកំពុងជិះ។ ជើងរបស់នាងបានបាក់ជាច្រើនកំណាត់ ដោយសារតែកម្លាំងប៉ះទង្គិចយ៉ាងខ្លាំង ។ ជើងនាងបានខ្ទាតពីតាប្លូ មកប៉ះជាមួយនឹងក្តោងច្រមុះនិងស្មា ដែលធ្វើឲ្យបាក់ទាំងពីរកន្លែងនេះទៀត ។
នាងនិយាយថា ៖« ពេលបុកភ្លាម ពោងសុវត្ថិភាពលើតាប្លូខាងមុខបានផ្ទុះចេញមក ធ្វើឲ្យជើងខ្ញុំខ្ទាតហោះមកបុកជាមួយនឹងស្មា និងក្តោងច្រមុះ ។ ខ្ញុំមើលឃើញវាហោះមកជាប់នឹងមុខខ្ញុំស្រស់ៗតែម្តង » ។
អស់រយៈពេល២ឆ្នាំមកនេះ Audra នៅតែមិនទាន់ជាស្រួលបួលឡើយ ។ ជើងរបស់នាងនៅតែមិនអាចដូចដើមវិញ ។ នាងប្រាប់ថា ៖«ខ្ញុំមិនអាចបន្តធ្វើការជាអ្នកសង្គ្រោះបន្ទាន់ទៀតទេ។ ខ្ញុំមិនអាចលើកអ្នកជំងឺបានទេ ។ ជាងនេះទៀត ខ្ញុំមិនអាចឈរយូរជាង៤ម៉ោងឡើយ។ រាល់ពេលដែលខ្ញុំត្រូវឈរធ្វើការចាប់ពី៤ម៉ោង ខ្ញុំតែងតែឈឺរហូតដល់ស្រក់ទឹកភ្នែក » ។
នាងចែករំលែកបទពិសោធន៍បែបនេះ ដោយសារតែនាងមិនចង់ឲ្យអ្នកដទៃសាងកំហុសដូចខ្លួន ។ នាងយល់ថា ជីវិតរបស់នាងពិតជាពិបាករស់នៅណាស់ ក្រោយពេលជួបគ្រោះថ្នាក់ខាងលើ ។ ចូរប្រុងប្រយ័ត្នទាំងអស់គ្នា បើជៀសបាន សូមកុំដាក់ជើងលើតាប្លូខាងមុខដូច Audra ឲ្យសោះ ៕
ចែករំលែកព័តមាននេះ