កត្តាសំខាន់3យ៉ាង ដែលធ្វើឱ្យការលក់រថយន្តថ្មីនៅកម្ពុជាកើនឡើង
រាជធានីភ្នំពេញ ៖ កត្តាសំខាន់ៗចំនួន៣ បានជំរុញឲ្យទីផ្សាររថយន្តថ្មីសម្រេចបានកំណើនខ្ពស់នៃការលក់នៅឆ្នាំនេះ ជាពិសេស
រាជធានីភ្នំពេញ ៖ កត្តាសំខាន់ៗចំនួន៣ បានជំរុញឲ្យទីផ្សាររថយន្តថ្មីសម្រេចបានកំណើនខ្ពស់នៃការលក់នៅឆ្នាំនេះ ជាពិសេស
រាជធានីភ្នំពេញ ៖ កត្តាសំខាន់ៗចំនួន៣ បានជំរុញឲ្យទីផ្សាររថយន្តថ្មីសម្រេចបានកំណើនខ្ពស់នៃការលក់នៅឆ្នាំនេះ ជាពិសេស ក្នុងរយៈពេលប៉ុន្មានឆ្នាំចុងក្រោយ ។
លោក សេង វឹង អគ្គនាយកផ្នែករថយន្តFord នៃក្រុមហ៊ុន អ អិម អេ ខេមបូឌា (RMA Cambodia) បានថ្លែងតាមទូរស័ព្ទនៅល្ងាចថ្ងៃទី៣០ សីហា ថា ការលក់រថយន្តថ្មីឆ្នាំនេះទទួលបានជោគជ័យខ្លាំង ដោយសារកត្តាមួយចំនួនដូចជា រថយន្តរបស់យើងមានភាពទំនើប កំណើនសេដ្ឋកិច្ច និងការកើនឡើងនៃប្រាក់ចំណូលរបស់ប្រជាពលរដ្ឋ ការផ្តល់ឥណទានពីធនាគារ និងស្ថាប័នហិរញ្ញវត្ថុផ្សេងៗកាន់តែមានភាពងាយស្រួល ។
លោក សេង វឹង បានបន្តថា ទីផ្សារ និងការនាំចូលរថយន្តថ្មីឆ្នាំនេះមានកំណើនច្រើន ខណៈការនាំចូលរថយន្តជជុះបានថយចុះ ដោយសារកាលពីឆ្នាំមុន មានការនាំចូលរថយន្តជជុះច្រើនរួចទៅហើយ ព្រោះតែការដំឡើងពន្ធពីរាជរដ្ឋាភិបាល ។
លោកបន្តថា ៖« ចំណែកការលក់រថយន្តរបស់យើងឆ្នាំនេះ សម្រេចបានកំណើនប្រមាណ៣០% ហើយខ្ញុំរំពឹងថា ការលក់រថយន្តឆ្នាំនេះសម្រេចបានជាង១.០០០គ្រឿង » ។ លោកបន្តថា ៖« ទីផ្សាររថយន្តថ្មីកើនឡើងមួយផ្នែក ក៏ដោយសារកម្រិតនៃការយល់ដឹងរបស់ប្រជាពលរដ្ឋមានភាពប្រសើរជាងមុនផងដែរ» ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ កាលពីពេលថ្មីៗនេះបានថ្លែងថា ការនាំចូលរថយន្តថ្មីៗកាន់តែច្រើន និងការវិនិយោគលើវិស័យយានយន្តនៅកម្ពុជា គឺជាការលើកកម្ពស់មុខមាត់ប្រទេសជាតិ ។ ការនាំចូលរថយន្តថ្មីកាន់តែច្រើនឆ្លុះបញ្ចាំងពីទីផ្សារនេះកាន់តែរីកចម្រើន និងការរីកចម្រើនរបស់ប្រទេសជាតិ ដោយសារកម្ពុជារក្សាបាននូវសុខសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ ។
លោករដ្ឋមន្ត្រីក្រសួងពាណិជ្ជកម្មបានថ្លែងបែបនេះក្នុងពិធីដាក់តាំងបង្ហាញរថយន្តប្រណីតម៉ាក Range ROVER ឆ្នាំ២០១៨ នៅរាជធានីភ្នំពេញ ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អុិន ចាន់នី បានថ្លែងថា កម្ចីប្រើប្រាស់សម្រាប់ទិញរថយន្ត ឬរបស់របរប្រើប្រាស់ដទៃទៀត មិនមានកំណើនគួរឲ្យបារម្ភទេនៅកម្ពុជា ប៉ុន្តែលោកព្រមានថា ឥណទានសម្រាប់ប្រើប្រាស់បែបនេះ មិនជួយលើកកម្ពស់ផលិតភាពសេដ្ឋកិច្ចទេ ព្រោះបើយកលុយទៅទិញរបស់របរប្រើប្រាស់ វាមិនបង្កើនចំណូលទេ ។ លោកបន្តថា ៖« ឥណទានដែលបង្កើនចំណូល ទើបជាឥណទានមានផលប្រយោជន៍ច្រើន ហើយវាបង្កើនផលិតភាពសេដ្ឋកិច្ច » ៕
ចែករំលែកព័តមាននេះ