ផ្ទុះប្រតិកម្មពីមន្ត្រីខ្មែរក្នុងព្រឹត្តិការណ៍ស៊ីហ្គេមនៅម៉ាឡេស៊ី
ម៉ាឡេស៊ី ៖ មកទល់ពេលនេះ ម្ចាស់ផ្ទះម៉ាឡេស៊ីកំពុងបន្តនាំមុខចំនួនមេដាយមាស ប្រាក់ និង សំរឹទ្ធិ ដែល
ម៉ាឡេស៊ី ៖ មកទល់ពេលនេះ ម្ចាស់ផ្ទះម៉ាឡេស៊ីកំពុងបន្តនាំមុខចំនួនមេដាយមាស ប្រាក់ និង សំរឹទ្ធិ ដែល
ម៉ាឡេស៊ី ៖ មកទល់ពេលនេះ ម្ចាស់ផ្ទះម៉ាឡេស៊ីកំពុងបន្តនាំមុខចំនួនមេដាយមាស ប្រាក់ និង សំរឹទ្ធិ ដែលដណ្ដើមបានពីព្រឹត្តិការណ៍កីឡាស៊ីហ្គេមលើកទី២៩ដែលខ្លួន
រៀបចំលើបណ្ដាប្រទេសដទៃក្នុងតំបន់អាស៊ានដដែល ដោយបាននាំមុខប្រទេសថៃដែលមានមេដាយមាសលំដាប់ទី២រហូតដល់ជិត២ដង ។
មេដាយដែលម៉ាឡេស៊ីដណ្ដើមបាន មួយចំណែកត្រូវគេមើលឃើញថាបានដោយភាពអយុត្តិធម៌ ជាពិសេសនៅពេលអត្តពលិកប្រទេសដទៃមានលទ្ធភាពឈ្នះពិន្ទុតែបន្តិចក៏ត្រូវប្រទេសម្ចាស់ផ្ទះមួយនេះបន្លំលទ្ធផលឱ្យអត្តពលិករបស់ខ្លួនឈ្នះបានដែរ ។
ជាក់ស្ដែងមន្ត្រីខ្មែរបានបញ្ចេញប្រតិកម្មធ្ងន់ៗជុំវិញការផ្ដល់ពិន្ទុឱ្យកីឡាករកម្ពុជា គឺឡៅ ចិត្រា បរាជ័យនៅលើសង្វៀន បន្ទាប់ពីគេបើកការប្រកួតតាំងពីដើមរហូតដល់ចប់ទឹកហើយត្រូវគេឃើញឈ្នះដាច់តែម្ដងលើកីឡាករម៉ាឡេស៊ី តែចុងក្រោយគណៈកម្មការបែរជាផ្ដល់ពិន្ទុឱ្យកីឡាករម៉ាឡេស៊ីឈ្នះទៅវិញ ។ ការប្រកួតប្រដាល់រវាងកីឡាករកម្ពុជា ឡៅ ចិត្រា និងកីឡាករម្ចាស់ផ្ទះម៉ាឡេស៊ី បង្ហាញឱ្យឃើញនូវលទ្ធផលលម្អៀងរហូតដល់ថ្នាក់មន្ត្រីខ្មែរប្រតិកម្ម បើទោះជាក្នុងជំហានផ្ដល់ពិន្ទុលម្អៀងនៅពេលនោះ គណៈកម្មការដដែលបានផ្ដល់ពិន្ទុឱ្យកីឡាករប្រដាល់គុនខ្មែរ២រូប គឺឃុន ឌីម៉ា ហៅ ឃឹម ឌីម៉ា និង ម៉ឺន សុភា បានបន្ដដំណើរទៅវគ្គផ្ដាច់ព្រ័ត្រក្នុងព្រឹត្តិការណ៍ស៊ីហ្គេមលើកទី២៩ នៅម៉ាឡេស៊ី បន្ទាប់ពីផ្ដួលគូប្រកួតនៅរសៀលថ្ងៃទី២៨ ខែសីហា នោះក៏ពិតមែន ក៏អ្នកទស្សនាភាគច្រើនបានកត់សម្គាល់ថា ជ័យជម្នះរបស់ឃុន ឌីម៉ា និងម៉ឺន សុភា គឺបានដោយសារផ្ដួលគូប្រកួត តែសម្រាប់ឡៅ ចិត្រា ដែលឈ្នះដោយមិនបានវាយម្ចាស់ផ្ទះដួលខ្ពកលើរេញនោះ គឺបានបរាជ័យ រហូតថ្នាក់ដឹកនាំកីឡាកម្ពុជា និងអ្នកគាំទ្រកម្ពុជា សម្ដែងប្រតិកម្ម ។ ម្នាក់ៗបានចាត់ទុកថាការកាត់ក្ដីឱ្យកីឡាករកម្ពុជា ឡៅ ចិត្ដ្រា ចាញ់ពិន្ទុកីឡាករ Ain របស់ម្ចាស់ផ្ទះម៉ាឡេស៊ីក្នុងវគ្គពាក់កណ្ដាលផ្ដាច់ព្រ័ត្រ គឺជារឿងមិនអាចទទួលយកបាន ដោយសារតែការប្រកួតជាក់ស្ដែងគឺអ្នកលេងគុនខ្មែរទម្ងន់៥៤គីឡូក្រាមរូបនេះ ឈ្នះដាច់រហូតដល់៣ទឹកពេញ ដោយកីឡាករម្ចាស់ផ្ទះមានឱកាសវាយបានល្អត្រឹមតែ២ទឹកប៉ុណ្ណោះ តែចុងក្រោយបែរជាឱ្យកីឡាករម្ចាស់ផ្ទះឈ្នះទៅវិញធ្វើឱ្យមន្ត្រីខ្មែរសម្ដែងអារម្មណ៍ហួសចិត្ត ។
ទោះបីយ៉ាងណា លទ្ធផលដែលបានស្ដែងឡើងក៏ធ្វើឱ្យម្ចាស់ផ្ទះម៉ាឡេស៊ីរងការរិះគន់ថាទទួលបានមេដាយមាសរហូតដល់ជាង១០០លើវិញ្ញាសាផ្សេងទៀត ដោយសារតែការផ្ដល់ពិន្ទុយកប្រៀបលើគូប្រកួតប៉ុណ្ណោះ ។ គេអាចនិយាយបានថា វិញ្ញាសាណាដែលម៉ាឡេស៊ីបន្លំបានគឺធ្វើឡើងទាំងអស់ ដូចជាករណីឱ្យឡៅ ចិត្រា ដែលឈ្នះ៣ទឹកចាញ់ក្រោមដៃកីឡាករម៉ាឡេស៊ីដែលវាយបានល្អតែ២ទឹកនោះជាភស្ដុតាងស្រាប់ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) និងជានាយបេសកកម្មបានបញ្ចេញប្រតិកម្មជាសាធារណៈភ្លាមៗដោយលោកនិយាយថា គឺជារឿងអយុត្តិធម៌ហួសពីការស្មានដែលកីឡាករ ឡៅ ចិត្ដ្រា វាយឈ្នះកីឡាករម្ចាស់ផ្ទះម៉ាឡេស៊ីច្បាស់នឹងភ្នែកប៉ុនហ្នឹងហើយបែរជាឱ្យចាញ់ក្នុងលទ្ធផលពិន្ទុ២៧ទល់នឹង៣០យ៉ាងអយុត្តិធម៌ទៅវិញ ។ លោក វ៉ាត់ ចំរើន បានអះអាងថា ក្រោយជួបរឿងអយុត្តិធម៌បែបនេះ ថ្នាក់ដឹកនាំ NOCCនឹងពិចារណាតើគួរបន្តបញ្ជូនកីឡាករផ្នែកប្រដាល់គុនខ្មែរទៅប្រកួតក្នុងព្រឹត្តិការណ៍ស៊ីហ្គេមទៀតឬត្រូវផ្អាករហូតដល់ឆ្នាំកម្ពុជាធ្វើជាម្ចាស់ផ្ទះខ្លួនឯងទើបសម្រេចឱ្យមានវិញ្ញាសានេះឡើងវិញ ។ លោកថា កីឡាករកម្ពុជាសម្រាប់វិញ្ញាសាប្រដាល់គុនខ្មែរមិនដែលទទួលបានមេដាយមាសត្រឡប់មកវិញនោះទេ ដោយសារតែភាពជាក់ស្ដែងគឺវិញ្ញាសានេះគេអាចបន្លំលទ្ធផលបាន ខុសពីរត់ប្រណាំង ឬហែលទឹកដែលមិនអាចបន្លំឱ្យអ្នកមកក្រោយឈ្នះអ្នកទៅដល់ទីមុនកើតទេ ។
អីុចឹងហើយទើបមិនចង់បន្តបញ្ជូនវិញ្ញាសានេះឱ្យទៅប្រកួតទៀតដោយសារឱ្យតែប៉ះជាមួយម្ចាស់ផ្ទះគឺចាញ់ជាប្រចាំ ។
លោក វ៉ាត់ ចំរើន បាននិយាយប្រាប់បណ្ដាញសារព័ត៌មានថា៖«នេះគឺជារឿងអាម៉ាស់មួយរបស់ម្ចាស់ផ្ទះ ហើយបើសិនយើងបន្ដមើលឃើញភាពអយុត្ដិធម៌ និងមិនត្រឹមត្រូវ យើងនឹងដកខ្លួនពីស៊ីហ្គេមក្រោយៗរហូតដល់យើងធ្វើជាម្ចាស់ផ្ទះ ។ គណៈកម្មាធិការជាតិអូឡាំពិកកម្ពុជាដែលទទួលបានការណែនាំពីលោកបណ្ឌិត ថោង ខុន ពេលមើលឃើញពីភាពមិនប្រក្រតីហ្នឹងហើយនឹងពិចារណាដើម្បីតម្រែតម្រង់ភាពត្រឹមត្រូវ ព្រោះយើងចង់ឱ្យមានភាពយុត្តិធម៌» ។ លោកនៅតែអះអាងថា វិញ្ញាសានេះមិនអន់នោះទេក្នុងពេលប្រកួតជាក់ស្ដែង ប៉ុន្តែមកពីគេផ្ដល់លទ្ធផលអយុត្តិធម៌ទើបកម្ពុជាជាម្ចាស់ក្បាច់គុនបុរាណខ្មែរមួយដែរនោះមិនដែលបានមេដាយមាសគ្រប់ពេលបញ្ជូនចេញទៅកាន់ព្រឹត្តិការណ៍ស៊ីហ្គេម ។ លោកអះអាងថា បើផ្ដល់ពិន្ទុឱ្យសុក្រឹត កីឡាករកម្ពុជាមិនចាញ់ការប្រកួតនោះទេ ។ យ៉ាងណាមិញ គេមិនទាន់ដឹងថា តើកម្ពុជាពិតជាផ្អាកបញ្ជូនវិញ្ញាសាខ្លះដែលទទួលរងភាពអយុត្តិធម៌ម្ដងហើយម្ដងទៀត ដូចជាករណីវិញ្ញាសាប្រដាល់សម្រាប់ព្រឹត្តិការណ៍ស៊ីហ្គេមឬយ៉ាងណានោះទេ ដោយគ្រាន់តែអ្វីដែលកម្ពុជាបានទទួលគឺធ្វើឱ្យមន្ត្រីកម្ពុជាយល់ថា សម្រាប់វិញ្ញាសាប្រដាល់ក្បាច់គុនបុរាណខ្មែរ និងវិញ្ញាសាមួយចំនួនដែលការផ្ដល់ពិន្ទុស្ថិតនៅលើទស្សនៈរបស់គណៈកម្មការ គឺកម្ពុជានឹងមិនមានលទ្ធភាពទទួលបានមេដាយមាសនោះទេ ជាពិសេសនៅពេលប៉ះគ្នាជាមួយម្ចាស់ផ្ទះដូចករណីឡៅ ចិត្រា ជាសាក្សីរស់ស្រាប់នោះ។
មកទល់ពេលនេះ យុទ្ធនាការចូលរួមប្រកួតកីឡាស៊ីហ្គេមលើកទី២៩ នៅម៉ាឡេស៊ី កម្ពុជាបានធ្លាក់មកឈរចំណាត់ថ្នាក់លេខ៩ បន្ទាប់ពីឡាវដណ្ដើមបានមេដាយមាស២នាំមុខកម្ពុជា ហើយរុញចំណាត់ថ្នាក់កម្ពុជាដែលរំកិលបានលេខរៀងទី៨ម្ដងហើយ ឱ្យធ្លាក់មកឈរលេខរៀងទី៩វិញ ។ លទ្ធផលបណ្ដោះអាសន្ន កម្ពុជាដណ្ដើមបានមេដាយសរុប១៤ រួមមានមេដាយមាស ១ ប្រាក់ ១ និងសំរឹទ្ធិ ១២ តាមពីក្រោយក្រុមអត្តពលិកឡាវ ដែលឈរលេខ៨ មានមេដាយមាស២ ប្រាក់៣ និងសំរឹទ្ធិ១៣ក្នុងដៃ ខណៈក្រុមអត្តពលិកម្ចាស់ផ្ទះម៉ាឡេស៊ីបន្ដឈរកំពូលតារាងមេដាយ ដោយដណ្ដើមបានមេដាយដ៏ច្រើន រួមមានមេដាយមាស ១០៥, ប្រាក់៧១ និងសំរឹទ្ធិ៦៩ គិតត្រឹមយប់ថ្ងៃទី២៨ សីហា ។ កម្ពុជានឹងពិបាកទទួលបានមេដាយមាសច្រើនត្រឡប់មកវិញ ព្រោះតែហេតុផលនេះ សូម្បីតែថៃ និងប្រទេសដែលមានអត្តពលិកខ្លាំងៗផ្សេងទៀត ក៏រងសម្ពាធបែបហ្នឹងមិនខុសគ្នា គឺគ្រាន់តែអត្តពលិកទាំងនោះគេមានសមត្ថភាពឈ្នះដាច់ខ្លាំងពេកនៅពេលប៉ះគ្នាជាមួយម្ចាស់ផ្ទះ ទើបធ្វើឱ្យម៉ាឡេស៊ីមិនអាចបន្លំស៊ីបានស្រួលដូចពេលម្ចាស់ផ្ទះប៉ះជាមួយកីឡាករកម្ពុជា ឬកីឡាកររបស់ប្រទេសដែលស្ថិតនៅក្បែរៗបាតតារាងផ្សេងទៀតប៉ុណ្ណោះ ៕
ចែករំលែកព័តមាននេះ