រាជធានីភ្នំពេញ ៖ រឿង សោភ័ណ្ឌ មកពីក្លិបមកុដរាជសីហ៍ និងមាស សុជាតិ មកពីក្លិបឃ្លាំងមឿងកីឡា ត្រូវបានគេរៀបចំឱ្យជួបប្រកួតជាមួយអ្នកប្រដាល់ជើងខ្លាំងថៃ នៅលើសង្វៀន
រាជធានីភ្នំពេញ ៖ រឿង សោភ័ណ្ឌ មកពីក្លិបមកុដរាជសីហ៍ និងមាស សុជាតិ មកពីក្លិបឃ្លាំងមឿងកីឡា ត្រូវបានគេរៀបចំឱ្យជួបប្រកួតជាមួយអ្នកប្រដាល់ជើងខ្លាំងថៃ នៅលើសង្វៀនទូរទស្សន៍ភីអិនអិននាថ្ងៃអាទិត្យទី២៧ សីហា ចុងសប្តាហ៍នេះ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំងពីររូបនេះអាចសម្រេចគោលដៅរបស់ខ្លួនឬយ៉ាងណាខណៈកីឡាករថៃដែលពួកគេត្រូវជួបហាក់មានសមត្ថភាពពិបាកផ្តួលអីុចឹងនោះ។
រឿង សោភ័ណ្ឌ ដែលត្រូវជួបប្រកួតជាមួយកីឡាករថៃឈ្មោះ ផេត ឆ័យ ក្នុងប្រភេទទម្ងន់៦៩គីឡូក្រាមលើកនេះមិនទាន់ដឹងថាយ៉ាងណានោះទេ ។ ប៉ុន្តែបើតាមការវាយតម្លៃពីអ្នកទស្សនាភាគច្រើនសុទ្ធតែមានទំនុកចិត្តលើសមត្ថភាពរឿង សោភ័ណ្ឌដោយសារកីឡាកររូបនេះមានភាពរហ័សរហួន កម្លាំងខ្លាំងកណ្ដាប់ដៃធ្ងន់ ពេលវាយចេញម្ដងៗត្រូវចំគោលដៅល្អណាស់ ។ ចាំមើលរឿង សោភ័ណ្ឌ អាចផ្ដួលកីឡាករថៃរូបនេះបានឬអត់ ។
មាស សុជាតិ ត្រូវជួបប្រកួតជាមួយកីឡាករថៃឈ្មោះ ឆាយ លេក ក្នុងប្រភេទទម្ងន់៦៥គីឡូក្រាម ។ កីឡាករថៃរូបនេះធ្លាប់បង្ហាញមុខនៅលើសង្វៀនភីអិនអិនពីមុនមកដែរគ្រាន់តែមិនធ្លាប់ជួបប្រកួតជាមួយកីឡាករ មាស សុជាតិ ប៉ុណ្ណោះ ។ តាមការសង្កេតការប្រកួតកន្លងមក មាស សុជាតិ ជាអ្នកប្រដាល់ជើងខ្លាំងមួយរូបដែលមានថ្វីដៃប្រកួតនៅលើសង្វៀនមិនធម្មតា ។ ជាពិសេសផ្លែកែងនិងជង្គង់របស់គេសុទ្ធតែអាចប្រើការបានយ៉ាងស្ទាត់ជំនាញទៀតផង ។ ទោះបីយ៉ាងណា គេមិនអាចមើលស្រាលលើឆាយ លេកបានឡើយ ដោយសារកីឡាករថៃរូបនេះមានសមត្ថភាពមិនអន់ឡើយ ទាំងស្នៀតកែងនិងជង្គង់សុទ្ធតែអាចប្រើការបានយ៉ាងស្ទាត់ជំនាញដូចគ្នា ថែមទាំងមានកម្លាំងខ្លាំងទៀតផង ។ ចាំមើលគូនេះអ្នកណានឹងក្លាយជាអធិរាជនៅលើសង្វៀន ។
ចំណែកគូបើកឆាក កីឡាករវ័យក្មេង វ័ន្ត ថៃ មកពីក្លិបរស្មីភូមិគាបខេត្តបន្ទាយមានជ័យ ត្រូវជួបប្រកួតជាមួយកីឡាករថៃឈ្មោះក្លាវ ក្លាយ ក្នុងប្រភេទទម្ងន់២៨គីឡូក្រាម ។ ឯគូប្រកួតមិត្តភាពរវាងកីឡាករកម្ពុជានិងកម្ពុជាវិញ កីឡាករ ផល វិចិត្រ មកពីក្លិបភារម្យគុនខ្មែរ ប្រកួតជាមួយកីឡាករ រតនា សីហា មកពីក្លិបប្រដាល់គុនខ្មែរ ៕
ចែករំលែកព័តមាននេះ