រាជធានីភ្នំពេញ ៖ នៅរសៀលថ្ងៃសៅរ៍ទី២៦ សីហា ស្អែកនេះ កម្មវិធីប្រកួតប្រដាល់របស់ទូរទស្សន៍អាស៊ីអាគ្នេយ៍ នឹងនៅតែមានការប្រកួតអន្តរជាតិ ដោយប្រកាសបើករេញឱ្យកីឡាករកម្ពុជា២រូប និងបរទេស២រូបប៉ះគ្នា បើទោះជាព្រឹត្តិការណ៍ដណ្ដើមខ្សែក្រវាត់អន្តរជាតិដែលបានបញ្ចប់ទៅនៅមិនទាន់ប្រកាសបើករដូវកាលថ្មីក្ដី ។ អ្វីដែលគេកត់សម្គាល់គឺកីឡាករកម្ពុជាទាំងពីរប៉ះកីឡាករថៃសុទ្ធតែល្បីឈ្មោះ ពេញកម្លាំង និងពោរពេញដោយបច្ចេកទេសប្រកួតនៅលើសង្វៀនតែម្ដង។
ការប្រកួតដែលនឹងចាប់ផ្ដើមឡើងពីម៉ោង២រសៀលស្អែកនេះមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែង គឺព្រឹត្តិការណ៍ដំណើរការចំពេលរសៀលថ្ងៃសម្រាក ដែលមនុស្សម្នាក្នុងក្រុងនិយមមកទស្សនាដល់ស្ទូឌីយោ ។ ប្រដាល់អន្តរជាតិជាលក្ខណៈមិត្តភាពកំដររេញ ដើម្បីរង់ចាំការប្រកួតដណ្ដើមខ្សែក្រវាត់វគ្គថ្មីលេចចេញជារូបរាងនេះ ត្រូវបានប្រកាសថា ពិតជាមានទស្សនិកជនមកទស្សនាកកកុញមិនខុសពីការប្រកួតដណ្ដើមខ្សែក្រវាត់នោះឡើយ ។ កីឡាករកម្ពុជា២រូប គឺជើងខ្លាំង ង៉ែត រដ្ឋា និងកីឡាករល្បីឈ្មោះគួរសម គឹម វាសនា នឹងក្លាយជាគូប្រកួតស៊ីសាច់ហុតឈាមជាមួយកីឡាករបរទេសនៅរសៀលស្អែកនោះ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយ ដោយគ្រាន់តែបានដឹងថា ពួកគេនឹងត្រូវឡើងប្រកួតគ្នាភាគីម្ខាងៗសប្បាយចិត្តទទួលយកដោយការពេញចិត្តតែម្ដង ។
លោក ញាណ សុធី អ្នករៀបចំកម្មវិធីប្រកួតប្រចាំសង្វៀនទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ង៉ែត រដ្ឋា ជាជើងខ្លាំងឱ្យឡើងប៉ះប្រកួតជាមួយកីឡាកថៃឈ្មោះ Chhart Chhay ក្នុងនាមជាគូឯក ។ លោកថាជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងឱ្យពួកគេប៉ះគ្នាតែម្ដង នៅក្នុងព្រឹត្តិការណ៍មួយនេះ ដើម្បីឱ្យការប្រកួតនៅចុងខែសីហានេះ មានភាពទាក់ទាញ ។
លោកថា កីឡាករ ង៉ែត រដ្ឋា អាចចាត់ទុកជាជើងខ្លាំងម្នាក់នៅលើសង្វៀនទើបសម្រេចឱ្យឡើងប្រកួតជាអន្តរជាតិ ខណៈដែលព្រឹត្តិការណ៍នេះ ត្រូវបានគេដឹងថា ចម្រុះដោយកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថាជំនួប ង៉ែត រដ្ឋា ជាមួយកីឡាករថៃ ពិតជាមិនធម្មតា ។ លោកថា កីឡាករកម្ពុជារូបនេះគឺជាសមាសភាពល្អម្នាក់ បន្ទាប់ពីការប្រកួតប៉ុន្មានលើកចុងក្រោយរបស់គេមានលទ្ធផលល្អវិញ ខុសពីមួយរយៈពេលមុនដែលគេវាយជាមួយថៃល្អខ្លះ មិនសូវល្អខ្លះ នៅលើសង្វៀនអន្តរជាតិដូចគ្នា ។ លោកថា ង៉ែត រដ្ឋា នៅតែចាត់ទុកជាជើងខ្លាំងដែលមានសមត្ថភាពពេញបរិបូរទើបលោករំពឹងខ្ពស់សម្រាប់ការប្រកួតថ្ងៃស្អែក ។ លោកថា កីឡាករថៃធ្លាប់ប្រកួត៦៣លើក ឈ្នះ៥២លើក ចាញ់៨លើក និងស្មើ៣លើក ហើយបើទោះជាកីឡាកររូបនេះមានប្រវត្តិឡើងប្រកួតតិចជាងកីឡាករកម្ពុជា (ប្រកួត៦៦លើក ឈ្នះ៥៦លើក ចាញ់៨លើក និងស្មើ២លើក)ក៏មិនអាចមើលស្រាលបានដែរ ។
សម្រាប់កីឡាករ គឹម វាសនា មកពីក្លិបកងទ័ពឆត្រយោង៩១១ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃឈ្មោះ Ken Shap ក្នុងនាមជាគូរងឯកក្នុងព្រឹត្តិការណ៍ប្រដាល់អន្តរជាតិនេះដែរ ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែល គឹម វាសនា ជាកីឡាករខ្លាំង តែមិនសូវមានឱកាសឡើងប្រកួតអន្តរជាតិនាពេលកន្លងមក ។ លោកថា កីឡាករថៃគឺជាជើងចាស់ និងល្បីឈ្មោះ តែមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំបើទោះជាគេថ្មីបន្តិចក្តី ។
លោកថា កីឡាករថៃធ្លាប់ប្រកួត៦៦លើក ឈ្នះ៥៦លើក ចាញ់១០លើក មិនដែលស្មើ រីឯកីឡាករកម្ពុជាទើបប្រកួតបាន៥៦លើក ឈ្នះ៤៥លើក ចាញ់១០លើក និងស្មើ១លើក ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នាផងដែរ៕
ចែករំលែកព័តមាននេះ