ចាប់ខ្លួននារីមេការខារ៉ាអូខេម្នាក់ក្រោយថា… ប៉ូលិសគាបស៊ី
ខេត្តកោះកុង ៖ នៅលើអាខោនហ្វេសប៊ុកផ្ទាល់ខ្លួនរបស់នាងឈ្មោះ(បងជារស្មីនៃជីវិតអូន) ថា
ខេត្តកោះកុង ៖ សមត្ថកិច្ចប៉ូលិសព្រហ្មទណ្ឌខេត្តកោះកុង បានចាប់ខ្លួននារីជាមេការខារ៉ាអូខេម្នាក់ កាលពីរសៀលថ្ងៃទី២៣ សីហា ស្ថិតក្នុងសណ្ឋាគារវ៉ាស៊ីនតោន ក្រោយពីនាងបានបង្ហោះចោទប្រកាន់ទៅលើសមត្ថកិច្ចប៉ូលិសព្រហ្មទណ្ឌនៃស្នងការដ្ឋាននគរបាលខេត្តកោះកុងនៅលើអាខោនហ្វេសប៊ុកផ្ទាល់ខ្លួនរបស់នាងឈ្មោះ(បងជារស្មីនៃជីវិតអូន) ថា បានគាបស៊ីលុយចំនួន550$ពីរូបនាង។
ការចាប់ខ្លួន គឺធ្វើឡើងតាមដីកាបង្គាប់របស់ព្រះរាជអាជ្ញាអមសាលាដំបូងខេត្តកោះកុង ចុះថ្ងៃទី២១ សីហា ។ ការចេញដីកាតាមចាប់ខ្លួននារីមេការរូបនេះ គឺដោយយោងតាមពាក្យបណ្តឹងរបស់ថៅកែហាងខារ៉ាអូខេយីហោ SR KTV ស្ថិតនៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង ដោយចោទថា មេការូបនេះ បានប្រព្រឹត្តិអំពើលួច នៅក្នុងបន្ទប់ថៅកែរបស់ខ្លួនតែម្តង កាលពីថ្ងៃទី១៥ សីហា មកម្ល៉េះ ។
សមត្ថកិច្ចឱ្យដឹងថា ក្រោយចាប់ខ្លួននាងភ្លាម បានដកហូតលុយចំនួន550$ ដែលនៅជាប់ខ្លួនរបស់នាង រួចឱ្យនាងត្រលប់ទៅកន្លែងធ្វើការវិញ ដើម្បីរង់ចាំឱ្យរូបនាងចូលខ្លួនមកដោះស្រាយ ជាមួយដើមបណ្តឹងនៅថ្ងៃបន្ទាប់ ។ ប៉ុន្តែមេការរូបនេះ ក៏បានគេចខ្លួនទៅភ្នំពេញរហូតមិនចូលខ្លួនមកដោះស្រាយឡើយ ។ មិនតែប៉ុណ្ណោះ ក្នុងពេលរូបនាងគេចខ្លួននោះដែរ នាងក៏បានបង្ហោះចោទប្រកាន់មកលើសមត្ថកិច្ចប៉ូលិសវិញថា បានប្រើល្បិចគាបនាងយកលុយចំនួន550$នោះ ។ ប៉ុន្តែលុយចំនួន550$ ដែលសមត្ថកិច្ចដកហូតនោះ គឺសមត្ថកិច្ចបានសងទៅភាគីដើមបណ្តឹង ខណៈពេលដែលខ្លួនមិនព្រមចូលខ្លួនដោះស្រាយ ។
ហេតុនេះ ទើបសមត្ថកិច្ចតាមចាប់ខ្លួននាងមកវិញ ខណៈដែលរូបនាងបានគេចខ្លួនពីកោះកុង ទីនៅសណ្ឋាគារវ៉ាស៊ីនតោន ឯរាជធានីភ្នំពេញ។ នៅចំពោះមុខសមត្ថកិច្ចប៉ូលីសព្រហ្មទណ្ឌខេត្ត មេការ ឈិន ស្រីនាង បានសារភាពថា រូបនាងពិតជាបានប្រឌិតព័ត៌មានបង្ខូចកេរ្តិ៍ឈ្មោះសមត្ថកិច្ចប៉ូលិសប្រាកដមែន ព្រោះនាងស្តាយលុយដែលប៉ូលិសដកហូតនោះខ្លាំងពេក ៕
ចែករំលែកព័តមាននេះ