បើ (ចាប់បានដោះលែងៗ)… នរណាមានកម្លាំងទៀតលោក?
ក្រោយពីទទួលបានដំណឹងយ៉ាងច្បាស់ការថា
ខេត្តបាត់ដំបង ៖ សេចក្តីរាយការណ៍ឱ្យដឹងថា ក្រោយពីទទួលបានដំណឹងយ៉ាងច្បាស់ការថា មានការដោះលែងបុរសបើកកាណូត ដែលជាជនដៃដល់ប្រើហិង្សាលើប៉ូលិស២រូបនោះ បានធ្វើឱ្យលោកឥន្ទ សេនា អាយុ៤៧ឆ្នាំ (ជនរងគ្រោះប៉ោងភ្នែកសងខាង) ជានាយប៉ុស្ដិ៍រដ្ឋបាលឃុំព្រៃចាស់ បានផ្ទុះកំហឹងប្រតិកម្មយ៉ាងខ្លាំងបំផុត និងអស់ជំនឿទៅលើប្រព័ន្ធច្បាប់របស់ថ្នាក់ដឹកនាំខាងលើ ក្នុងនាមលោកជាជនរងគ្រោះម្នាក់ ។
ការប្រតិកម្មនេះ គឺកើតឡើងកាលពីព្រឹកថ្ងៃទី២៤ សីហា នេះ ក្រោយពីលោកដឹងថា ជនដៃដល់ឈ្មោះសាន ឡេន អាយុ២៥ឆ្នាំ ត្រូវបានកម្លាំងការិយាល័យព្រហ្មទណ្ឌកម្រិតស្រាលធ្វើការដោះលែង កាលពីវេលាម៉ោង០៧យប់ថ្ងៃទី២៣ សីហា ដោយអះអាងថា ជនដៃដល់រូបនេះ មានជំងឺធ្ងន់ ។ គេនិយាយទៀតថា ការដោះលែងនេះ គឺត្រូវបានឆ្លងកាត់ព្រះរាជអាជ្ញារួចហើយ ប៉ុន្តែការពិតនោះ ជនដៃដល់នៅមិនទាន់បញ្ជូនទៅតុលាការនោះឡើយ ។
លោកឥន្ទ សេនា ជាជនរងគ្រោះបានឱ្យកោះសន្តិភាពដឹងនាថ្ងៃដដែលថា ការធ្វើបែបនេះ គឺហាក់អយុត្តិធម៌ខ្លាំងណាស់សម្រាប់លោក និងនគរបាលម្នាក់ទៀតឈ្មោះធឿន ភក្ដី ដែលបានរងរបួសដូចគ្នា ក្នុងពេលឃាត់ជនដៃដល់កុំឱ្យបើកកាណូតលឿន ព្រោះបង្កការរំខាន និងខ្លាចមានគ្រោះថ្នាកក់ដល់ដទៃ ស្រាប់តែត្រូវជនដៃដល់ប្រើហិង្សាតែម្តង ។ លោកថា កាលពីលើកមុនដូច្នេះដែរ ជនដៃដល់នេះ ត្រូវជាប់គុកម្តងហើយ តែក្រោយមក ត្រូវដោះលែងវិញដែរ ។
ជាចុងក្រោយ លោកក៏បានសំណូមពរឱ្យខាងសមត្ថកិច្ចពាក់ព័ន្ធទាំងនោះ ត្រូវតែពិនិត្យរឿងនេះឡើងវិញ ។ បើមិនដូច្នេះទេ លោកនឹងមានជម្រើសខ្លួនឯង ១-លោកអាចនឹងកាត់បន្ថយការងារខ្លួនឯង, ២-អាចនឹងសុំផ្លាស់ប្តូរអង្គភាពវិញ និង៣-លោកអាចនឹងដោះសម្លៀកបំពាក់និងសម្ភារប៉ូលិសប្រគល់ទៅឱ្យស្នងការវិញ ព្រោះអស់ជំនឿនិងគ្មានកម្លាំងធ្វើជាប៉ូលិសបន្តទៀតទេ ។ គួររលឹកថា កណ្ដាប់ដៃបែបណា… ទើបប៉ូលិស២រូបនេះរងរបួស
ចែករំលែកព័តមាននេះ