ស្ងាត់ៗ កីឡាករ ឃឹម ឌីម៉ា ក្លាយជាតារាសម្តែងភាពយន្តខ្នាតធំ
រាជធានីភ្នំពេញ ៖ ថ្វីដ្បិតថា ស្ងាត់ពីការងារប្រដាល់មិនសូវសស្រាក់សស្រាំលើសង្វៀនដូចមុន ប៉ុន្តែគេកត់សម្គាល់ថា
រាជធានីភ្នំពេញ ៖ ថ្វីដ្បិតថា ស្ងាត់ពីការងារប្រដាល់មិនសូវសស្រាក់សស្រាំលើសង្វៀនដូចមុន ប៉ុន្តែគេកត់សម្គាល់ថា
រាជធានីភ្នំពេញ ៖ ថ្វីដ្បិតថា ស្ងាត់ពីការងារប្រដាល់មិនសូវសស្រាក់សស្រាំលើសង្វៀនដូចមុន ប៉ុន្តែគេកត់សម្គាល់ថា កីឡាករល្បីឈ្មោះ ឃឹម ឌីម៉ា នៅតែមានកេរ្តិ៍ឈ្មោះបោះសំឡេងក្នុងចំណោមអ្នកស្នេហាប្រដាល់ភាគច្រើន ។ អ្វីដែលគួរឱ្យកត់សម្គាល់ គឺកីឡាកររូបនេះបានក្លាយជាតារាសម្ដែងក្នុងពិភពភាពយន្តខ្នាតធំគួរឱ្យភ្ញាក់ផ្អើល ដែលនេះគឺជាជំហានដំបូងដែលរូបគេបានបោះជំហានពីកីឡាប្រដាល់ទៅជាតារាភាពយន្ត ដែលខុសពីអាជីពដើមរបស់ខ្លួន ។
ប្រភពពីផលិតកររឿង «ចង់ដឹងសាកមើល» ដែលជាភាពយន្តខ្នាតធំបានអះអាងថា កីឡាករល្បីឈ្មោះ ឃឹម ឌីម៉ា បានចុះកិច្ចសន្យាធ្វើជាតួសម្ដែងនៅក្នុងភាពយន្តមួយនេះរួចរាល់ហើយដែលនឹងដល់ប្លង់ត្រូវថតក្នុងពេលឆាប់ៗនេះ ដើម្បីឱ្យរឿងទាំងមូលត្រូវថតចប់ទាំងស្រុងនៅអំឡុងចុងខែកញ្ញាខាងមុខ ។
លោក ដេវីត អ្នកគ្រប់គ្រងផលិតកម្មGM ដែលជាអ្នកផលិតភាពយន្តនេះ បានអះអាងថា ឃឹម ឌីម៉ា ត្រូវបានឱ្យសម្ដែងជាតួសំខាន់មួយក្នុងរឿង ដោយរូបគេត្រូវសម្ដែងជាអ្នកក្លាហាន មានចរិតម៉ឺងម៉ាត់ និងពូកែវាយតប់ផង ដោយមិនមែនជាតួសម្ដែងតែប៉ុន្មានប្លង់ហើយក៏បាត់មុខនោះទេ ។ ទោះបីជា ឃឹម ឌីម៉ា មិនទាន់ប្រាកដថាមានទេពកោសល្យក្នុងការសម្ដែងភាពយន្តក៏ដោយ ប៉ុន្តែផ្អែកតាមរូបសម្បត្តិ ភាពល្បីល្បាញ គឺក្រុមការងារនឹងផ្ដល់ឱកាសឱ្យរូបគេសម្ដែងជាតួសំខាន់ក្នុងរឿង ដោយក្រុមការងារក៏នឹងបង្ហាត់ឱ្យចេះលេងទឹកមុខដើម្បីឱ្យការសម្ដែងលើកដំបូងរបស់មានការចាប់អារម្មណ៍ផងដែរ ។
លោក ដេវីត ថ្លែងទៀតថា លោកមានបំណងលើក ឃឹម ឌីម៉ា ឱ្យមានកេរ្តិ៍ឈ្មោះបោះសំឡេងនៅក្នុងពិភពភាពយន្ត ដោយរំពឹងថាការសម្ដែងរបស់គេនឹងទាក់ទាញអ្នកស្នេហាវិស័យប្រដាល់ឲ្យចង់ទស្សនាភាពយន្តមួយនេះក្រោយពេលដាក់បញ្ចាំង ដោយសារតែនៅក្នុងពិភពប្រដាល់ ឃឹម ឌីម៉ា គឺកីឡាករល្បីឈ្មោះ និងមានការគាំទ្រខ្លាំង ។ លោកសម្លឹងឃើញថា ឃឹម ឌីម៉ា នឹងមានជំហានឈានឡើងមិនចាញ់ការប្រឡូកសិល្បៈសម្ដែងរបស់អតីតកីឡាករ ចៀស ស្រួច និង ចាន់ រតនា នោះទេ ដោយសារតែកីឡាកររូបនេះពេលថតគឺស៊ីកាមេរ៉ា ហើយបើនិយាយពីរូបរាងក៏មិនចាញ់តារាសម្ដែងមួយចំនួនដែរ ។
លោកនឹងធ្វើឱ្យភ្ញាក់ផ្អើលជាមួយនឹងការបោះជំហានក្នុងពិភពសម្ដែងរបស់ ឃឹម ឌីម៉ា ជាពិសេសក្នុងពេលដែលរឿងមួយនេះត្រូវបានប្រកាសថា តម្រូវឱ្យរូបគេសម្ដែងជាតួសំខាន់ចេញមុខច្រើនគួរសម ដែលងាយនឹងលេចធ្លោ ហើយត្រូវសម្ដែងជាតួអង្គចេះវាយតប់ និងមានអត្តចរិតជាអ្នកក្លាហាន ដែលពិតជាស៊ីនឹងសមត្ថភាពរបស់គេដែលមានជំនាញជាអ្នកកីឡាអាជីពស្រាប់នោះទៅទៀត ។
ទោះជាយ៉ាងណា លោក ដេវីត មិនបានប្រាប់ឱ្យដឹងថា ឃឹម ឌីម៉ា ស៊ីថ្លៃប៉ុន្មានក្នុងរឿង «ចង់ដឹងសាកមើល» ជាភាពយន្តខ្នាតធំដែលគេទទួលសម្ដែងបើកឆាក ចាប់តាំងពីបានក្លាយជាកីឡាករប្រដាល់ល្បីឈ្មោះនោះទេ ដោយគ្រាន់តែអះអាងថា មានការចរចាគ្នាក្នុងកម្រិតមួយអាចទទួលយកបាន ទើបគេសុខចិត្តធ្វើដំណើរតាំងពីខេត្តបន្ទាយមានជ័យមកថតដល់ភ្នំពេញ និងនៅកន្លែងខ្លះទៀត ដើម្បីរំលេចផ្ទៃរឿងដែលលោកចង់បានឱ្យមានភាពទាក់ទាញ ។
លោកមានគម្រោងនឹងផ្ដល់តំណែងឱ្យ ឃឹម ឌីម៉ា បានថតក្នុងរឿងរបស់លោកជាបន្តបន្ទាប់ទៀត ប្រសិនបើគេអាចសម្ដែងបានជាតួធម្មតាៗ ដោយមិនទាល់តែតួវាយតប់ឱ្យត្រូវនឹងអាជីព ។ ម្យ៉ាង មកពីរូបគេគឺជាកីឡាករដែលមានរូបរាងទាក់ភ្នែកផងនោះ ទើបយល់ថាបើគេអាចសម្ដែងជាតួទូទៅបានដោយមិនទាល់តែឱ្យសម្ដែងជាតួចេះក្បាច់គុន គឺងាយស្រួលក្នុងការសៀតស៊កតែម្ដង ។
តាមរយៈការទម្លាយរបស់ផលិតកររឿ «ចង់ដឹងសាកមើល» បានបង្ហាញថា ឃឹម ឌីម៉ា ដែលគេធ្លាប់តែស្គាល់ពីសមត្ថភាពតាមរយៈការឡើងសង្វៀនវាយប្រកួតជាមួយកីឡាករថៃ និងបរទេសផ្សេងទៀត នឹងបង្ហាញសមត្ថភាពមួយបែបផ្សេងគឺប្រឡូកជាតារាសម្ដែងវិញម្ដង។
ឌីម៉ា គឺជាកីឡាករល្បីម្នាក់ទៀត ដែលបានហក់ចូលក្នុងអាជីពនេះ ក្នុងពេលដែលកីឡាករប្រដាល់ពីរបីរូបហើយបានចូលប្រឡូកដូចគ្នា និងបានក្លាយជាតារាដែលមានទីផ្សារក្នុងការសម្ដែងភាពយន្ត ។ ទោះជាយ៉ាងណា គេនៅមិនទាន់ដឹងថា តើការសម្ដែងជាចំណូលចិត្តរបស់ ឃឹម ឌីម៉ា បន្ថែមដោយទេពកោលស្យឬយ៉ាងណាទេ ក្នុងពេលដែលកីឡាកររូបនេះធ្លាប់បានប្រកាសថា ការសម្ដែងគឺរូបគេមិនសូវមានចំណូលចិត្ត តែបើមានការស្នើពីខាងផលិតករ ហើយរូបគេគិតថាអាចសម្ដែងជាតួអង្គនោះបាន គឺនឹងសាកល្បងសម្ដែង ។
ឃឹម ឌីម៉ា គឺជាកីឡាករមួយរូបដែលមិនសូវមានមហិច្ឆតាចង់ក្លាយជាតារាសម្ដែងបន្ថែមពីលើការប្រដាល់នោះទេ ប៉ុន្តែបើការសម្ដែងរបស់គេក្នុងជំហានបើកឆាកនេះមានការគាំទ្រ និងមានផលិតករបន្តផ្ដល់ឱកាស គឺច្បាស់ណាស់រូបគេនឹងអាចឈោងចាប់អាជីពសម្ដែង ក្នុងពេលអាជីពប្រដាល់របស់ខ្លួនក៏មិនសូវរីកចម្រើនដូចមុន ដោយសារតែវត្តមានកីឡាករក្មេងៗ និងអាចបណ្ដាលមកពីរូបគេកាន់តែរយាលមិនសូវចង់ហ្វឹកហាត់ជាប់លាប់ដូចមុន ដែលនាំឱ្យធ្លាក់ដៃក្នុងពេលឡើងសង្វៀនក្រោយៗ ។
បើធៀបនឹងអំឡុងពេលមុន គឺបច្ចុប្បន្ន ឃឹម ឌីម៉ា មិនសូវបានឡើងសង្វៀនប៉ុន្មានទេ ពោលគឺចាប់តាំងពីរូបគេមានការប្រែប្រួលសមត្ថភាពដែលត្រូវគេកត់សម្គាល់ថាទទួលបានភាពបរាជ័យក្រោមដៃកីឡាករបរទេសច្រើនជាងឈ្នះ ដែលមិនមែនជាអ្វីដែលអ្នកគាំទ្រទទួលយក។
ក្នុងនោះ សូម្បីតែការប្រដាល់ដាក់ទ្រុង ដែលធ្លាប់ជួយឱ្យកីឡាកររូបនេះមានកេរ្តិ៍ឈ្មោះបោះសំឡេង ក៏សឹងតែបាត់ឱកាសដែរ ដោយសារតែរូបគេបរាជ័យនៅលើសង្វៀនអន្តរជាតិនោះរហូតធ្វើឱ្យបាត់បង់ការផ្គូផ្គងនាពេលចុងក្រោយ ។
ឃឹម ឌីម៉ា ត្រូវបានគេកត់សម្គាល់ថា ជាកីឡាករមួយរូបដែលមានទីផ្សារនៅលើសង្វៀនប្រដាល់ក្នុងស្រុក សម្រាប់ការប្រកួតជាអន្តរជាតិធំៗដែលមានតម្លៃខ្លួនខ្ពស់ ប៉ុន្តែបណ្ដាលមកពីពេលខ្លះក៏ឈ្នះ ហើយពេលខ្លះក៏ចាញ់ ទើបធ្វើឱ្យកីឡាកររូបនេះបាក់ស្រុតកម្លាំងគាំទ្រមួយផ្នែក ។ អីុចឹងហើយ ទើបការបង្ហាញខ្លួននៅក្នុងវិស័យភាពយន្តអាចជាការកៀរគរប្រជាប្រិយភាពមួយថ្មី បន្ទាប់ពីទីផ្សារឡើងប្រដាល់របស់កីឡាកររូបនេះមានការប្រែប្រួល ជាពិសេសក្រោយការឡើងសង្វៀនម្ដងៗរបស់គេ ទទួលលទ្ធផលមិនសូវល្អតាមការរំពឹងទុក ។
ឃឹម ឌីម៉ា ធ្លាប់បានប្រកាសថា ភាពនឿយណាយនៅក្នុងពិភពប្រដាល់ គឺជាមូលហេតុដែលធ្វើឱ្យរូបគេមិនសូវស្វាហាប់ជាមួយនឹងការឡើងសង្វៀន ទើបធ្វើឱ្យការហ្វឹកហាត់មិនសូវសកម្ម ហើយឈានទៅបាត់បង់កម្លាំងរឹងមាំមួយផ្នែក ដែលនាំឱ្យយូរៗទើបទទួលឡើងប្រកួតម្ដង ។ ទោះជាយ៉ាងណា ការប្រដាល់នៅតែជាជម្រើសសម្រាប់ជីវិត តែមិនចង់ឡើងប្រកួតរហូតភ្លេចគិតការងារផ្ទាល់ខ្លួន និងចេះតែទទួលប្រកួត រហូតមិនទុកឱកាសឱ្យក្មេងជំនាន់ក្រោយនោះទេ ទើបអ្នកទស្សនាកម្រឃើញ ឃឹម ឌីម៉ា ឡើងសង្វៀនសឹងតែរាល់អាទិត្យដូចមុន ដែលមានន័យថាសឹងតែស្ងាត់មុខ ទាល់តែច្រើនសប្ដាហ៍ទើបឃើញឡើងប្រកួតម្ដង ។
ទំនងជាចង់បង្វែរអាជីពពីការប្រដាល់ទៅជាអាជីពមួយផ្សេងទៀតហើយ ទើបស្រាប់តែឃឹម ឌីម៉ា លេចមុខយ៉ាងក្រឡឺមក្នុងការទទួលសម្ដែងក្នុងរឿង«ចង់ដឹងសាកមើល» ដែលត្រូវគេអះអាងថា កីឡាកររូបនេះគឺជាតួអង្គសំខាន់មួយក្នុងរឿង ហើយត្រូវសម្ដែងជាតួអង្គដែលមានរូបរាងសង្ហា និងចេះវាយតប់ផង ។
ផលិតកររឿង «ចង់ដឹងសាកមើល» បញ្ជាក់ថា ភាពយន្តមួយនេះនឹងបញ្ចប់ការថតក្នុងពេលឆាប់ៗ ដើម្បីអាចដំណើរការដាក់បញ្ចាំងក្នុងរោងនៅអំឡុងចុងខែតុលា ឬដើមខែវិច្ឆិកាខាងមុខ។ លោក ដេវីត បញ្ជាក់ថា តួអង្គរបស់ ឃឹម ឌីម៉ា ក៏ត្រូវសម្ដែងប៉ះជាមួយតួអង្គជាអ្នកចេះវាយតប់ផ្សេងទៀតដែរ ដើម្បីរំលេចក្បាច់គុនដោយឱ្យមានឈុតឆាកវាយតប់ដោយក្បាច់ប្រដាល់បុរាណខ្មែរ ។ ក្នុងនោះភាពយន្តមួយនេះ ក៏តម្រូវឱ្យតួអង្គសំខាន់សម្ដែងបែបកំប្លុកកំប្លែងផងដែរ បើទោះជា ឃឹម ឌីម៉ា មិនមានប្លង់ច្រើនក្នុងការសម្ដែងជាតួបែបកំប្លែង ដែលខុសពីជំនាញដើមរបស់គេ ។
លោកហាក់រំពឹងក្នុងកម្រិតខ្ពស់ថា រឿងដែលឃឹម ឌីម៉ា ចូលរួមសម្ដែងនឹងមានការគាំទ្រខ្លាំង ដោយសារតែរូបគេទើបត្រូវសម្ដែងជាលើកដំបូង ហើយភាពយន្តមួយនេះក៏ចូលរួមសម្ដែងដោយតារាល្បីៗដូចជា នាយចាបចៀន នាយក្រូច កញ្ញា ដួង ម៉ានិច លោកលឹម រដ្ឋា និងតារាសម្ដែងល្បីឈ្មោះជាច្រើនទៀត ។ ក្រៅពីឃឹម ឌីម៉ា ក៏មានវត្តមានកីឡាករអាជីពមួយចំនួនទៀតចូលរួមសម្ដែងដែរ ៕
ចែករំលែកព័តមាននេះ