រាជធានីភ្នំពេញ ៖ ក្នុងចំណោមកីឡាករកីឡាការិនីល្បីឈ្មោះនៅក្នុងពិភពកីឡា គេកត់សម្គាល់កញ្ញាហែមថុន វិទិនី គឺជាកីឡាការិនីមួយរូបដែលមានអ្នកចាប់អារម្មណ៍មិនតិចទេ ជាពិសេសនៅពេលនឹកគិតដល់កីឡាការិនីរូបណាមានរូបសម្រស់ស្រស់ស្អាតជាងគេ គឺហែមថុន វិទិនី ពិតជាត្រូវគេនឹកគិតដល់ភ្លាមៗ ដោយសារតែនាងមានរូបសម្រស់ស្រស់សោភា បន្ថែមពីលើសមត្ថភាពផ្នែកហែលទឹក ។ ខាងក្រោមនេះជាជីវប្រវត្តិត្រួសៗរបស់កីឡាការិនីរូបនេះ ដែលអ្នកគាំទ្រភាគច្រើនមិនបានដឹង ។
ហែមថុន វិទិនី ជាកូនស្រីទោលតែម្នាក់គត់នៅក្នុងគ្រួសារដែលមានម្ដាយឈ្មោះហែម សេដា វ័យ៤២ឆ្នាំ ជាស្ត្រីមេម៉ាយ ។ នាងកើតនៅថ្ងៃទី៧ ខែតុលា ឆ្នាំ១៩៩៣ នៅសង្កាត់វាលវង់ ខណ្ឌ៧មករា រាជធានីភ្នំពេញ ។ នាងសុំមិនរំលឹកដល់ឪពុកឡើយ ដោយសារនាងបានធំដឹងក្ដីក្រោមការតស៊ូរបស់ម្ដាយ និងជីតា ដោយគ្មានការទទួលខុសត្រូវពីឪពុកក្នុងពេលនាងនៅតូច ។ កីឡាការិនីល្បីឈ្មោះរូបនេះថ្លែងថា៖«កុំថាឡើយខ្ញុំស្គាល់មុខគាត់ សូម្បីតែគាត់ឈ្មោះអីក៏ខ្ញុំមិនបានចាប់អារម្មណ៍ចង់ដឹងដែរ ព្រោះគាត់បោះបង់ខ្ញុំយូរហើយ» ។ នាងជាកីឡាការិនីខ្វះភាពកក់ក្ដៅពីឪពុក បើទោះជានាងច្រានចោលការចោទសួរពាក់ព័ន្ធនឹងបុរសរូបនេះក្ដី ។
ក្នុងវ័យកុមារភាព វិទិនី បានបោះជំហានចូលសិក្សានៅសាលាបឋមសិក្សា សំពៅមាស និងបានបន្តទៅកាន់វិទ្យាល័យបាក់ទូក ។ នាងបានប្រឡងបញ្ចប់ថ្នាក់ចំណេះទូទៅបាក់ឌុបក្នុងឆ្នាំ២០១០ដោយទទួលបាននិទ្ទេសមធ្យម ។ មកដល់ពេលនេះ នាងមិនទាន់មានឱកាសចូលរៀនថ្នាក់មហាវិទ្យាល័យនៅឡើយ ដោយសារតែជាប់ហាត់ហែលទឹក និងមមាញឹកនឹងការប្រកួតនៅក្រៅប្រទេសសឹងដកឃ្លាមិនរួច ។ ទោះបីយ៉ាងណា កីឡាការិនីរូបនេះ មានគម្រោងសិក្សាថ្នាក់ភាសាអង់គ្លេសនៅឆ្នាំក្រោយ ដើម្បីបង្កើនកម្រិតចេះដឹងឱ្យមានសន្ទស្សន៍អាចប្រដំប្រសងគ្នានឹងកេរ្តិ៍ឈ្មោះរបស់ខ្លួន ។ នាងនិយាយថា៖«ខ្ញុំឧស្សាហ៍ចេញទៅប្រកួតនៅក្រៅប្រទេស ដូច្នេះមានតែជំនាញភាសាទេ ដែលចាំបាច់សម្រាប់ខ្ញុំប្រើការ ហើយខ្ញុំប្រហែលមិនដំអក់ទៀតទេ កុំឱ្យខាតឆ្នាំ»។
ដំណើរវិវត្តន៍ឆ្ពោះទៅរកអាជីពហែលទឹក
ហែមថុន វិទិនី ជាចៅស្រីបង្កើតលោកហែម ថុន ដែលជាអតីតកីឡាករហែលទឹក និងជាអតីតប្រធានសហព័ន្ធមួយរូប ។ នាងអះអាងថាលោកគឺជាបុរសតែម្នាក់គត់ដែលនាំឱ្យនាងបានក្លាយជាកីឡាការិនីហែលទឹក ក្នុងពេលដែលនាងមិនដែលគិតឃើញទាល់តែសោះថានឹងបានក្លាយជាតារាកីឡាការិនីលើផ្នែកនេះ ។ នាងថ្លែងថា៖«កាលខ្ញុំនៅតូច ខ្ញុំតែងត្រូវលោកតាយកទៅហែលទឹក ហើយបង្ហាត់ឱ្យចេះហែលទឹកជាប្រចាំ ទើបខ្ញុំបានក្លាយជាកីឡាការិនីហែលទឹកមកដល់ថ្ងៃហ្នឹង»។
យុវតីរូបនេះ បានបង្ហាញទេពកោសល្យក្នុងនាមជាកីឡាការិនីហែលទឹកកាន់តែលេចធ្លោក្រោយពីទទួលការបណ្ដុះបណ្ដាល ដែលថ្ងៃណាក៏លេចមុខមាត់នៅបរិវេណអាងហែលទឹក ជាមួយលោកហែម ថុន នោះដែរ ដោយសារតែក្នុងពេលនោះលោក ហែម ថុន គឺជាអ្នកជំរុញរូបនាងដ៏សំខាន់ ។ នាងត្រូវបានជីតាលើកទឹកចិត្តឱ្យចូលជាសមាជិកថ្មីក្នុងកីឡាហែលទឹក នាឆ្នាំ១៩៩៩ ក្នុងពេលដែលនាងមានអាយុទើបតែ៥ឆ្នាំ ។ ក្នុងរយៈពេលនោះ នាងមិនបានរំលេចចេញស្នាដៃណាមួយ ក្នុងអាជីពជាអ្នកហែលទឹកឡើយ ដោយសារតែនាងក៏នៅវ័យក្មេង និងមិនទាន់មានបទពិសោធន៍ច្រើនផង ។ អំឡុងពីរ-បីឆ្នាំក្រោយមក នាងក៏មានឱកាសតាមរយៈការជំរុញទាំងនោះ ដោយបានវិវត្តក្លាយខ្លួនជាកីឡាការិនីដែលមានសមត្ថភាពគួរឱ្យកត់សម្គាល់ ជាពិសេសបន្ទាប់ពីនាងពេញសិទ្ធិក្នុងឋានៈជាកីឡាការិនីហែលទឹក និងបានប្រឡងជាប់ចំណាត់ថ្នាក់ក្នុងកម្រិតនៃការប្រកួតថ្នាក់ជាតិជាបន្តបន្ទាប់ ។ នាងត្រូវបានមន្ត្រីសហព័ន្ធផ្ដល់កិត្តិយសឱ្យបញ្ចូលឈ្មោះជាកីឡាការិនីជម្រើសជាតិពេញសិទ្ធិក្នុងឆ្នាំ២០០៣ ដែលការបោះជំហាននោះកាន់តែធ្វើឱ្យមានកម្លាំងចិត្តទ្វេដងនៅក្នុងពិភពហែលទឹក ។
នាងថែមទាំងត្រូវបានជ្រើសរើសជាតំណាងឱ្យកម្ពុជាចេញទៅប្រកួតនៅក្រៅប្រទេសញឹកញាប់ដោយសារតែការប្រឹងប្រែងរបស់ខ្លួននោះផង បើទោះជាមកដល់ពេលនេះនាងមិនទាន់ទទួលបានមេដាយ ឬចំណាត់ថ្នាក់ល្អត្រឡប់មកវិញ ក្រោមការបញ្ជូនឱ្យចេញប្រកួតរបស់សហព័ន្ធកីឡាហែលទឹកកម្ពុជាក្ដី ។ ទោះបីយ៉ាងណា សម្រាប់ការប្រកួតក្នុងស្រុក គឺនាងត្រូវបានគេកត់សម្គាល់ថាជាកីឡាការិនីដែលទទួលបានមេដាយមាសរាប់មិនអស់ និងជាកីឡាការិនីដែលមានឱកាសលុបលើកីឡាការិនីហែលទឹកផ្សេង ដែលអាចនិយាយបានថា សម្រាប់ការប្រកួតក្នុងស្រុក គឺមិនមានកីឡាការិនីណាម្នាក់ឈ្នះនាងនោះទេ ទើបធ្វើឱ្យនាងរមែងត្រូវបានតែងតាំងជាតំណាងកម្ពុជាចេញទៅប្រកួតនៅក្រៅស្រុកជាប្រចាំរហូតមានអ្នកខ្លះយល់ថានាងបានចេញទៅប្រកួតនៅក្រៅស្រុកព្រោះតែមានខ្សែទុយោ ប៉ុន្តែការពិតគឺមកពីនៅក្នុងស្រុកមិនមានអ្នកណាប្រកួតឈ្នះនាងប៉ុណ្ណោះ ។ នាងមានជំនាញហែលទឹកលើផ្នែកហែលសេរី ហែលរបៀបមេអំបៅ និងហែលមិនកំណត់ចម្ងាយ ។
ជំហានចេញទៅក្រៅប្រទេស
បើទោះជាមិនធ្លាប់ដណ្ដើមបានពានរង្វាន់ ឬមេដាយពីការប្រកួតនៅបរទេស តែ ហែមថុន វិទិនី គឺជាកីឡាការិនីហែលទឹកល្បីល្បាញតែម្នាក់គត់ដែលតំណាងឱ្យកម្ពុជា ហើយតែងលេចមុខនៅគ្រប់ព្រឹត្តិការណ៍ប្រកួតនៅឯនាយសមុទ្រ ។ នាងបានចាកចេញទៅប្រកួតបើកឆាកលើកដំបូងក្នុងឆ្នាំ២០០៥ ក្នុងកម្មវិធីប្រកួតកីឡាហែលទឹកអន្តរជាតិនៅថៃ ដោយទទួលបានលទ្ធផលបរាជ័យ ។ ក្នុងឆ្នាំ២០០៦ នាងចេញទៅប្រកួតនៅប្រទេសកាតា ដោយជួបវាសនាធ្លាក់ចេញពីការប្រកួតក្នុងវគ្គជម្រុះដូចគ្នា។
ក្នុងឆ្នាំ២០០៧ នាងបានចេញទៅប្រកួតស៊ីហ្គេម
នៅថៃ និងចាកចេញទៅប្រកួតនៅជប៉ុននាអំឡុងចុងឆ្នាំសាជាថ្មី ។ ជាមួយសំណាងដូចមុន តែនាងអាចឡើងដល់ជុំល្អជាងមុន ខណៈដែលឆ្លងចូលដល់វគ្គទីពីរទើបធ្លាក់ចេញពីការប្រកួត ។
ក្នុងឆ្នាំ២០០៨ នាងចេញទៅប្រកួតអូឡាំពិកនៅប្រទេសចិន ហើយឆ្នាំ២០០៩ បានចេញទៅបីប្រទេសព្រមគ្នា គឺសិង្ហបុរី ឡាវ និងអីុតាលី។
ដោយឡែកក្នុងឆ្នាំ២០១០ នាងបានលេច
មុខសាជាថ្មីនៅទីក្រុងក្វាងចូវ ប្រទេសចិន ក្នុងកម្មវិធីអាស៊ានហ្គេម៤៥ប្រទេស និងចេញទៅប្រកួតនៅទីក្រុងឌូបៃ ប្រទេសអេមីរាតអារ៉ាប់រួមកាលពីចុងឆ្នាំដដែលនោះ ។
កីឡាការិនីរូបនេះ និយាយថា ដំណើរចាកចេញទៅក្រៅប្រទេសរបស់ខ្លួន ដ្បិតថាមិនធ្លាប់ជោគជ័យ តែបានផ្ដល់នូវបទពិសោធន៍ច្រើនដល់នាង ដែលអាចឱ្យនាងប្រឹងឈោងយកជ័យជម្នះនាពេលខាងមុខបាន ។ នាងនិយាយថា៖«ខ្ញុំគិតថា អត្តពលិកហែលទឹកនៅក្រៅប្រទេសគេមានវាសនាល្អជាងយើង ព្រោះនៅស្រុកគេមិនត្រឹមតែមានអាងហែលទឹកធំៗ ចូលស្ដង់ដារប៉ុណ្ណោះទេ គឺសូម្បីតែឧបករណ៍ និងសម្ភារក្នុងពេលហ្វឹកហាត់ ក៏មានភាពទំនើបខុសពីនៅកម្ពុជាដែរ»។
ជំហរថ្ងៃអនាគត
មកទល់បច្ចុប្បន្ន ហែមថុន វិទិនី ជាគ្រូបង្វឹកកីឡាហែលទឹក ដោយកូនសិស្សរបស់នាងគឺមានទាំងតារាល្បីឈ្មោះ ។ វិទិនី ថ្លែងថា៖ «ខ្ញុំមិនឈប់ពីអាជីពកីឡានេះទេ ព្រោះវាជួយឱ្យខ្ញុំមានមុខមាត់ និងមានសុខភាពល្អ ហើយបើទោះជាខ្ញុំមានស្វាមី ក៏ប្រហែលមិនឈប់ដែរ យ៉ាងច្រើនខ្ញុំចេញធ្វើការមួយរយៈ គឺប្រាកដជាវិលមកកាន់អាជីពជាគ្រូបង្វឹកនោះវិញហើយ ព្រោះនេះជាអ្វីដែលខ្ញុំចង់បាន»។ នាងក៏នឹងបន្តការងារមួយនេះ បើទោះជានាងត្រូវរៀបការជាមួយកីឡាករបាល់ទាត់ សំអឿន ពិដោរ ក្នុងពេលខាងមុខក្តី៕
ចែករំលែកព័តមាននេះ