អាគុយរថយន្ដជិតខូច វាមានសញ្ញាបែបណា និងថែទាំដូចម្ដេច ?
រាជធានីភ្នំពេញ ៖ ម្ចាស់រថយន្ដភាគច្រើន ពិសេសសុភាពនារីពិតជាមិនសូវចាប់អារម្មណ៍បើកគម្របក្បាលរថយន្ដដើម្បីត្រួតពិនិត្យបញ្ហានានា មុននឹង
រាជធានីភ្នំពេញ ៖ ម្ចាស់រថយន្ដភាគច្រើន ពិសេសសុភាពនារីពិតជាមិនសូវចាប់អារម្មណ៍បើកគម្របក្បាលរថយន្ដដើម្បីត្រួតពិនិត្យបញ្ហានានា មុននឹង
រាជធានីភ្នំពេញ ៖ ម្ចាស់រថយន្ដភាគច្រើន ពិសេសសុភាពនារីពិតជាមិនសូវចាប់អារម្មណ៍បើកគម្របក្បាលរថយន្ដដើម្បីត្រួតពិនិត្យបញ្ហានានា មុននឹងចេញដំណើរឡើយ ។ ការធ្វេសប្រហែសបែបនេះ អ្នកអាចនឹងជួបរឿងស៊យនៅថ្ងៃណាមួយ ពិសេសពេលកំពុងត្រូវការប្រញាប់ បែរជាបញ្ឆេះរថយន្ដមិនឆេះ ពេលនោះអ្នកមានអារម្មណ៍បែបណា?
នៅថ្ងៃនេះ ទំព័រផ្នែករថយន្ដ និងបច្ចេកវិទ្យា នៃសារព័ត៌មានកោះសន្ដិភាព សូមលើកយកចំណេះដឹងខ្លះៗពាក់ព័ន្ធនឹងអាគុយមកចែករំលែក ដើម្បីឲ្យម្ចាស់យានយន្ដទាំងអស់មានការប្រុងប្រយ័ត្ន និងតាមដានអាគុយរថយន្ដរបស់លោកអ្នក ។
អ្នកជំនាញផ្នែកយានយន្តបានឱ្យដឹងថា តាមពិត អាគុយរថយន្ដ គឺអាចដឹងពីគុណភាព និងសញ្ញានៅពេលវាជិតខូចបានយ៉ាងស្រួល តែម្ចាស់រថយន្ដភាគច្រើនបែរជាមិនសូវចាប់អារម្មណ៍ ។
អ្នកជំនាញផ្នែកយានយន្តនៃសាលាដុនបូស្កូ បានឱ្យដឹងថា អាគុយមាន២ប្រភេទ គឺអាគុយស្ងួត និងអាគុយទឹក ដែលម្ចាស់រថយន្ដអាចសង្កេតដឹងបានថា វាខូច ឬជិតខូចដោយខ្លួនឯង ។
លោកពន្យល់ថា អាគុយស្ងួត វានឹងចេញសញ្ញាក្បាលអាគុយលើតាប្លូរថយន្តតែម្តង ហើយកាលណាចេញសញ្ញានេះ វាបង្ហាញថា អាចអាគុយមិនកាន់ភ្លើង, ឌីណាម៉ូរថយន្តមិនសាក ឬបញ្ហាផ្សេងទៀតពាក់ព័ន្ធនឹងអាគុយ ដែលយើងអាចពិនិត្យមើលភ្នែកវាដោយផ្ទាល់ ។ លោកថា ៖« បើភ្នែកអាគុយនោះមានពណ៌ខៀវ មានន័យថា វានៅមានគុណភាពល្អ បើឃើញពណ៌ស គឺអាគុយនោះត្រូវការបំពេញថាមពលឡើងវិញជាបន្ទាន់ ប៉ុន្ដែបើភ្នែកវាឡើងពណ៌ក្រហមនោះ គឺវាអស់រយៈពេលនៃការប្រើប្រាស់ហើយ » ។
លោកបន្តថា ៖« ចំពោះអាគុយទឹកវិញ ពេលណាវាអស់គុណភាពឬខូច យើងអាចមើលឃើញដោយធុងអាគុយរាងប៉ោង មានស្នឹមលើក្បាលអាគុយច្រើន ហើយកម្រិតទឹកអាស៊ីតធ្លាក់ចុះ ឬក៏រីងតែម្ដង ។ លើសពីនេះ នៅពេលយើងដេរបញ្ឆេះ វាមិនងាយនឹងឆេះ នេះបញ្ជាក់ថា វាជិតខូចហើយ » ។ លោកបន្ថែមថា ដើម្បីឱ្យកាន់តែច្បាស់ទៅលើគុណភាព និងអាយុកាលនៃការប្រើប្រាស់សម្រាប់រថយន្ត យើងអាចទិញឧបករណ៍ធ្វើតេស្ដមកពិនិត្យបន្ថែមក៏បាន ។
ចំពោះវិធីងាយៗដើម្បីថែរក្សា អ្នកជំនាញរូបនេះបានឲ្យដឹងថា ៖« យើងត្រូវជ្រើសរើសប្រភេទអាគុយឱ្យត្រូវនឹងកម្លាំងម៉ាស៊ីនរថយន្ដដែលក្រុមហ៊ុនកំណត់, មិនគួរយកអាគុយដែលមានតង់ស្យុងខុសគ្នាទៅកូវនោះទេ, ពេលដេរបញ្ឆេះម្តងជា២ដងមិនឆេះ កុំព្យាយាមដេរទៀត ព្រោះវាអាចធ្វើឱ្យអាគុយឆាប់ខូច, ក្នុង១សប្តាហ៍ បើអ្នកមិនចេញដំណើរ ត្រូវបញ្ឆេះរថយន្តពី៣ទៅ៥នាទីដើម្បីបំពេញថាមពលវិញ, ត្រូវដុសសម្អាតក្រចាប់អាគុយឱ្យបានស្អាត កុំឱ្យវាស្នឹម ឬច្រែះនៅលើក្បាលអាគុយ » ។
អ្នកស្រី ហេង ស្រៀង ម្ចាស់ហាងលក់អាគុយមួយកន្លែងបានឱ្យដឹងថា អាគុយរថយន្ដមានច្រើនម៉ាក និងច្រើនប្រភេទ ។ ម្ចាស់រថយន្ដគួរដឹងថា អាគុយណាវាត្រូវនឹងម៉ាស៊ីនរថយន្ដរបស់ខ្លួន ។ អ្នកស្រីថា ៖« បើរថយន្ដទំនើបៗ មិនសូវជាចាំបាច់ថែទាំអ្វីទេ ឱ្យតែយើងទិញអាគុយម៉ាកល្អ និងមានការធានាត្រឹមត្រូវ ជាការស្រេច ហើយពេលប្រើប្រាស់បាន១ ឬ២ឆ្នាំ ប្រសិនបើវាចេញសញ្ញានៅលើតាប្លូ ម្ចាស់រថយន្ត ត្រូវយកមកតេស្ដដើម្បីដឹងច្បាស់ពីគុណភាពវា ។ ចំណែកហាងអ្នកស្រីវិញ រាល់លោកអ្នកដែលទិញអាគុយ គឺមានការធានារយៈពេល៣ខែ ហើយបើខូចក្នុងអំឡុងពេលនោះ ក្រុមហ៊ុននឹងប្តូរថ្មីជូនវិញ » ៕
ចែករំលែកព័តមាននេះ