ពេលឃើញភ្លើងសញ្ញាព្រមានលើតាប្លូ ត្រូវប្រញាប់យករថយន្ដទៅពិនិត្យ
រាជធានីភ្នំពេញ ៖ ប្រសិនបើរថយន្ដលោកអ្នកចេញភ្លើងសញ្ញាព្រមានណាមួយនៅលើតាប្លូជាប់ មានន័យថា
រាជធានីភ្នំពេញ ៖ ប្រសិនបើរថយន្ដលោកអ្នកចេញភ្លើងសញ្ញាព្រមានណាមួយនៅលើតាប្លូជាប់ មានន័យថា
រាជធានីភ្នំពេញ ៖ ប្រសិនបើរថយន្ដលោកអ្នកចេញភ្លើងសញ្ញាព្រមានណាមួយនៅលើតាប្លូជាប់ មានន័យថា រថយន្ដនោះកំពុងមានបញ្ហាពាក់ព័ន្ធនឹងសញ្ញានោះហើយ ដូច្នេះត្រូវប្រញាប់យកវាទៅពិនិត្យបន្ទាន់ ជៀសវាងមានបញ្ហានៅពេលបើកបរ ។ ចំពោះរថយន្ដស៊េរីទំនើប ថ្វីដ្បិតមានតម្លៃខ្ពស់ តែវាបំពាក់នូវប្រព័ន្ធសុវត្ថិភាពគ្រប់យ៉ាង នៅពេលមានបញ្ហាត្រង់កន្លែងណាមួយ គឺវាបង្ហាញសញ្ញានៅលើតាប្លូឲ្យដឹងភ្លាម គ្រាន់តែសញ្ញាមួយចំនួន ម្ចាស់រថយន្ដមិនដឹង និងមិនសូវចាប់អារម្មណ៍ប៉ុណ្ណោះ ។
អ្នកជំនាញប្រព័ន្ធភ្លើង និងវិភាគរថយន្ដដោយកុំព្យូទ័រ ប្រចាំក្រុមហ៊ុនលក់រថយន្ដមួយ កន្លែងបានឲ្យដឹងថា ភ្លើងសញ្ញាព្រមានដែលចេញនៅលើតាប្លូមួយចំនួន ម្ចាស់រថយន្ដអាចមើលយល់ថា រថយន្ដខ្លួនមានបញ្ហាពាក់ព័ន្ធត្រង់នេះ ឬត្រង់នោះ តែសញ្ញាខ្លះទៀត ប្រហែលជាមិនស្គាល់ទេ ហើយភ្លើងសញ្ញាទាំងនោះមាន៣ ដែលសំខាន់ជាងគេ ។
លោក អេង បូរី អ្នកជំនាញរូបនេះឲ្យដឹងកាលពីថ្ងៃទី២៣ សីហា ថា ៖« បើវាចេញសញ្ញាណាមួយនៅលើតាប្លូមិនបាត់អីចឹង មានន័យថា រថយន្ដហ្នឹងមានបញ្ហាហើយ ត្រូវយកវាទៅឲ្យជាងពិនិត្យបន្ទាន់ ជៀសវាងមានអ្វីកើតឡើងដូចជា រលត់តាមផ្លូវ ឬអាចធ្ងន់ធ្ងរជាងនេះ ពិសេសគឺសញ្ញាព្រមានបីគឺ បញ្ហាហ្វ្រាំង, ម៉ាស៊ីន និងពោងសុវត្ថិភាព»។
លោកបន្ដថា ៖« ចំពោះរថយន្ដចាប់ពីស៊េរីខ្ពស់ទៅ យើងងាយស្រួលពិនិត្យទេ ព្រោះវាបំពាក់ប្រព័ន្ធបច្ចេកវិទ្យាទំនើប ដោយគ្រាន់តែភ្ជាប់ជាមួយកុំព្យូទ័រ វានឹងបង្ហាញបញ្ហាអីហើយ និយាយរួម សូម្បីតែសម្ពាធខ្យល់កង់ស្ទើរ ក៏វាបង្ហាញសញ្ញាដែរ អីចឹងម្ចាស់រថយន្ដអាចដឹងបានដោយស្រួល » ។
លោកបញ្ជាក់ថា ភ្លើងសញ្ញាព្រមាននៅតាប្លូហ្នឹងមានច្រើន តែការបំពាក់គឺទៅតាមស៊េរី ម៉ូដែល និងម៉ាករថយន្ដ មានន័យថា រថយន្ដកាន់តែទំនើប មានសញ្ញាព្រមានសុវត្ថិភាពកាន់តែច្រើន គ្រាន់តែសញ្ញាមួយចំនួនងាយយល់ ដូចជា មិនពាក់ខ្សែក្រវាត់, ទ្វារបិទមិនជិត, អាគុយមានបញ្ហា, ពោងសុវត្ថិភាពមានបញ្ហា, ប្រព័ន្ធហ្វ្រាំងABS មានបញ្ហា, បរិមាណទឹកលាងកញ្ចក់ជិតអស់ និងភ្លេចដោះហ្វ្រាំងដៃ ជាដើម ។ ប៉ុន្ដែក៏មានសញ្ញាជាច្រើនទៀតដែលម្ចាស់រថយន្ដភាគច្រើនអាចមិនដឹង ឬមិនបានឈ្វេងយល់ដែរ ដូចជា សញ្ញាប្រព័ន្ធប្រអប់លេខរថយន្ដ, សញ្ញាប្តូរប្រេងម៉ាស៊ីន, សញ្ញាសម្ពាធខ្យល់ក្នុងសម្បកកង់, សញ្ញាម៉ាស៊ីនរថយន្ដចុះថយថាមពល, សញ្ញាធុងសាំងបិទមិនជិត, សញ្ញាប្រព័ន្ធគ្រប់គ្រងកុំព្យូទ័រមានបញ្ហា, សញ្ញាម៉ាស៊ីនឡើងកម្ដៅ, សញ្ញាសម្ពាធ ឬកម្រិតប្រេងរំអិលធ្លាក់ចុះ, សញ្ញាប្រព័ន្ធកាច់បញ្ឆេះម៉ាស៊ីនត្រូវគេចាក់សោ និងសញ្ញាខ្វះប្រេងហ្វ្រាំង ជាដើម ។
លោកបានសង្កត់ធ្ងន់ថា ទោះបីជាសញ្ញាណាក៏ដោយ ឲ្យតែវាលេចចេញនៅលើតាប្លូ គឺមានបញ្ហាហើយ គ្រាន់តែសញ្ញាខ្លះសំខាន់ និងខ្លះមិនសូវចាំបាច់ តែម្ចាស់រថយន្ដត្រូវយកវាទៅត្រួតពិនិត្យកាន់តែឆាប់ កាន់តែល្អ ដើម្បីជៀសវាងបញ្ហាកើតឡើងជាយថាហេតុ ។
អ្នកបើករថយន្ដឲ្យក្រុមហ៊ុនឯកជនមួយ ដែលមានបទពិសោធន៍បើកបររយៈពេល២០ឆ្នាំ និងកាន់ចង្កូតរថយន្ដច្រើនម៉ាក ច្រើនស៊េរី បានឲ្យដឹងថា ភ្លើងសញ្ញាព្រមានទាំងនោះមានបំពាក់មិនដូចគ្នាទេ វាអាស្រ័យទៅតាមស៊េរី ម៉ូដែល និងម៉ាករថយន្ដ ទោះបីជាក្រុមហ៊ុនតែមួយ និងឆ្នាំផលិតដូចគ្នាក៏ដោយ ។
លោក មឿន គឹមស្រៀន អ្នកបើកបររូបនេះបានឲ្យដឹងកាលពីថ្ងៃទី២៣ សីហា ថា ៖« បើខ្ញុំមិនច្រឡំទេ សញ្ញាព្រមាននេះ គឺមានបំពាក់ចាប់ពីរថយន្ដផលិតលើឆ្នាំ៩២ឡើងទៅ និយាយរួមគឺចាប់ពីរថយន្ដដែលមានខ្សែដោតកុំព្យូទ័រមក គ្រាន់តែមានតិច ឬច្រើនទៅតាមស៊េរីឆ្នាំ, ម៉ាក និងប្រទេសផលិត » ។ លោកថា ៖« ការបំពាក់បច្ចេកវិទ្យានេះ គឺអាចជួយម្ចាស់រថយន្ដបានច្រើនដើម្បីដឹងពីបញ្ហានានា និងងាយស្រួលយើងយកវាទៅត្រួតពិនិត្យ ជៀងវាងមានបញ្ហាណាមួយកើតឡើង » ។
លោកបញ្ជាក់ថា សញ្ញាទាំងនោះវាមិនចេះតែលេចចេញទេ លុះត្រាតែមានបញ្ហា ហើយមុននឹងវាបង្ហាញសញ្ញានេះ គឺវាចេញភ្លឹបភ្លែតៗម្ដងម្កាលដែរ គ្រាន់តែម្ចាស់រថយន្ដមិនចាប់អារម្មណ៍ ។ ដូច្នេះ បើឃើញសញ្ញាព្រមានណាមួយវាចេញលើតាប្លូជាប់រហូតហើយ ត្រូវយកវាទៅឆែកមើលដើម្បីជួសជុល ឬផ្លាស់ប្ដូរ។
យ៉ាងណាក៏ដោយ ការបំពាក់បច្ចេកវិទ្យាក្នុងរថយន្ដកាន់តែទំនើប ជាងជួសជុលខ្លះ ក៏ចេះមិនអស់ដែរ ដែលទាមទារឲ្យតាមដានបញ្ហាឲ្យច្បាស់ ជៀសវាងជួសជុល ឬប្ដូរគ្រឿងបន្លាស់ខុសកន្លែង នាំឲ្យម្ចាស់រថយន្ដខាតបង់លុយកាក់ ហើយរថយន្ដនៅតែមានបញ្ហាដដែល ។
លោក គឹមស្រៀន និយាយថា ៖« ជាងខ្លះល្អ គេប្រាប់ម្ចាស់ត្រង់ៗតែម្ដងថា រថយន្ដយើងមានបញ្ហាត្រង់នេះ ត្រង់នោះ អាចជួសជុលបាន ឬត្រូវប្ដូរចេញជាដើម រីឯតម្លៃថ្លៃថ្នូរក៏គេប្រាប់ដែរ ប៉ុន្ដែអ្នកខ្លះមិនអីចឹងទេ រថយន្ដមានបញ្ហាតិចតួចសោះ បែរជាទៅប្ដូរគ្រឿង ហើយធានារយៈពេលនេះ រយៈពេលនោះ ដោយគ្រាន់តែទៅ Reset ឬដោះក្បាលអាគុយចេញក៏មាន តែភ្លើងសញ្ញានោះនឹងចេញមកដដែលនៅពេលក្រោយ ។ ដូច្នេះ ទាមទារឲ្យម្ចាស់រថយន្ដត្រូវសួរនាំឲ្យច្បាស់ថា វាខូចអីពិតប្រាកដ ជៀសវាងជួសជុលខុសកន្លែងអស់លុយឥតប្រយោជន៍ » ៕
ចែករំលែកព័តមាននេះ