នាងប្រិមប្រិយថា ផ្តាច់ពាក្យល្អជាងលែងលះ
រាជធានីភ្នំពេញ ៖ តារាកំប្លែងនាងប្រិមប្រិយទើបតែភ្ជាប់ពាក្យបានប្រមាណ២ខែស្រាប់តែ
រាជធានីភ្នំពេញ ៖ តារាកំប្លែងនាងប្រិមប្រិយទើបតែភ្ជាប់ពាក្យបានប្រមាណ២ខែស្រាប់តែទម្លាយរឿងបែកបាក់គ្នាវិញ ។ ការបែកបាក់នេះជាមួយគូដណ្តឹងជាអាណិកជន ។
ប្រិមប្រិយប្រកាសកាលពីថ្ងៃទី២២ សីហា ២០១៧ថា មិនអាចបកក្រោយបានទេ បើទោះជានាង និងគូដណ្តឹងស្រឡាញ់គ្នាមិនក្រោម៧ឆ្នាំ មុនសម្រេចចិត្តភ្ជាប់ពាក្យក៏ដោយ។ ការបែកបាក់របស់ប្រិមប្រិយជាមួយលោកសៅ រ៉ានីត ជាអ្នកចម្រៀងសម័យនៅអាមេរិកបង្កឱ្យមានការចាប់អារម្មណ៍ខ្លាំង ព្រោះទើបតែភ្ជាប់ពាក្យកាលពីប្រមាណ២ខែមុន ។ ការបែកបាក់នេះលឿនពេក ។
តារាកំប្លែងប្រិមប្រិយបញ្ជាក់ហេតុផលថា «មកពីមិនចុះសម្រុងគ្នា ។ ទោះជាស្រឡាញ់គ្នា៧ឆ្នាំ តែនាងខ្ញុំសុខចិត្តបែកដើម្បីកុំឱ្យការហើយចែកផ្លូវគ្នាអាក្រក់មើលជាងផ្តាច់ពាក្យទៀត »។
ក្តីស្នេហ៍នេះបានសាងឡើងពេលនាងប្រិមប្រិយទៅសម្តែងនៅអាមេរិកជាមួយនាយក្រិន។ គ្រានោះលោកសៅ រ៉ានីត តែងតែយកចិត្តទុកដាក់លើនាងប្រិមប្រិយដោយជូននាងទៅណាមកណា និងជួយសម្រួលចំពោះការស្នាក់នៅស្រុកគេរបស់នាង ។
ថ្មីៗកន្លងមក ប្រិមប្រិយបានលុបចោលអស់រូបថតស្និទ្ធស្នាលផ្អែមល្ហែមជាមួយអតីតគូដណ្តឹងពីលើទំព័រហ្វេសប៊ុករបស់នាង ។
នាងប្រិមប្រិយធ្លាប់រៀបការ តែបានលែងលះគ្នា ។ ក្រោយមកលេចឮព័ត៌មានស្នេហ៍របស់នាងជាមួយថៅកែភោជនីយដ្ឋានមួយនៅភ្នំពេញ មុនពេលនាងភ្ជាប់ចំណងស្នេហ៍ជាមួយបុរសអាណិកជន ។
បច្ចុប្បន្នក្តីស្នេហ៍របស់នាងប្រិមប្រិយបែកបាក់ទាំងអស់ ៕
ចែករំលែកព័តមាននេះ