បំភ្លឺជុំវិញការសងសឹករបស់ ឡុង សុភី និងកីឡាករថៃ
រាជធានីភ្នំពេញ ៖ ការប្រកួតសងសឹករវាងកីឡាករកម្ពុជា ឡុង សុភី និងកីឡាករថៃ Chhouk Chhai ត្រូវគេកត់សម្គាល់ថា
រាជធានីភ្នំពេញ ៖ ការប្រកួតសងសឹករវាងកីឡាករកម្ពុជា ឡុង សុភី និងកីឡាករថៃ Chhouk Chhai ត្រូវគេកត់សម្គាល់ថា
រាជធានីភ្នំពេញ ៖ ការប្រកួតសងសឹករវាងកីឡាករកម្ពុជា ឡុង សុភី និងកីឡាករថៃ Chhouk Chhai ត្រូវគេកត់សម្គាល់ថា បានទទួលលទ្ធផលមិនខុសពីការប្រកួតលើកទី៣ រវាងកីឡាករ រឿង សោភ័ណ្ឌ និងកីឡាករថៃនោះទេ ដោយសារតែបញ្ចប់ការប្រកួត កីឡាករ ឡុង សុភី ដែលជាជើងខ្លាំងម្នាក់ត្រូវបានកីឡាករថៃវាយឱ្យបាក់មុខលើរេញហើយបរាជ័យយ៉ាងអាម៉ាស់បើទោះជា ឡុង សុភី បង្ហាញទឹកមុខមិនពេញចិត្តនឹងលទ្ធផលដែលបានប្រកាសឡើង ។ ការប្រកួតនេះ ថែមទាំងធ្វើឱ្យម្នាក់ៗមានការរិះគន់ចំពោះឡុង សុភី ផង ដោយសារតែសកម្មភាពប្រកួតរបស់គេជាមួយកីឡាករថៃ ហាក់មិនសូវរស់រវើកពេញរយៈពេល៥ទឹក ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍ បានអះអាងថា រវាងកីឡាករ ឡុង សុភី មកពីក្លិបសាលវ័ន្តកីឡា និងកីឡាករថៃ Chhouk Chhai ជួបគ្នាចំនួន៣លើករួចមកហើយ រាប់ទាំងការប្រកួតកាលពីថ្ងៃទី២០ ខែសីហា នោះផង ។ ការប្រកួតកាលពី២លើកកន្លងទៅ អ្នកទាំងពីររកលទ្ធផលឈ្នះចាញ់មិនឃើញទេ ដោយសារតែការប៉ះប្រកួតគ្នាចំនួន២លើកនាពេលនោះ ចុងបញ្ចប់បានត្រឹមតែស្មើពិន្ទុគ្នា ។ យ៉ាងក៏ដោយលោកអះអាងថា លទ្ធផលស្មើគ្នាកាលពី២លើកមុន មិនមែនដោយសារតែខាងគណៈកម្មការមានភាពលម្អៀងចំពោះកីឡាករកម្ពុជានោះទេ គឺដោយសារតែការប្រកួតនៅក្នុងពេលនោះភាគីម្ខាងៗពិបាកឱ្យពិន្ទុឈ្នះចាញ់តែប៉ុណ្ណោះ ។
លោក ញាណ សុធី ថ្លែងថា មិនមែនជារឿងចៃដន្យនោះទេ ដែលកីឡាករ២នាក់ប្រកួតគ្នា២លើកហើយទទួលលទ្ធផលស្មើ រហូតដល់ថ្នាក់បែងចែកលទ្ធផលចាញ់ឈ្នះមិនបានទាំង២លើក ដែលធ្វើឱ្យម្នាក់ៗយល់ថាលទ្ធផលឱ្យស្មើកន្លងមក គឺក្រោមហេតុផលគណៈកម្មការយឹតយោងកីឡាករកម្ពុជា ។ ជាក់ស្ដែង ក្រោយពីការប្រកួតលើកទី៣ស្រាប់តែ ឡុង សុភី ជាអ្នកបរាជ័យដោយពិន្ទុទៅទៀត គឺរឹតតែមានការលើកឡើងកាន់តែច្រើនឡើងថា លទ្ធផលស្មើ២លើកកន្លងមក ជាលទ្ធផលលម្អៀងក្នុងនាមកាន់ជើងកីឡាករកម្ពុជា ។
លោកអះអាងថា ការប្រកួតកាលពីលើកមុនទាំងកីឡាករកម្ពុជានិងថៃ រកអត់ឃើញអ្នកណាល្អជាងដាច់ទាល់តែសោះ ទើបបណ្ដាលឱ្យមានលទ្ធផលស្មើគ្នា កុំឱ្យមានការរិះគន់ពីភាគីម្ខាងៗដែលសុទ្ធតែកាន់ជើងកីឡាកររៀងៗខ្លួន។ លោកប្រកាសថា នឹងបើកការប្រកួតឱ្យអ្នកទាំងពីរបានប៉ះគ្នាម្ដងទៀត បន្ទាប់ពីការប្រកួតប៉ះគ្នា៣លើកស្មើ២លើកជាប់ៗគ្នា និងលើកទី៣ កីឡាករ ឡុង សុភី គឺជាអ្នកចាញ់ពិន្ទុ ។
លោក ញាណ សុធី ប្រកាសថាលទ្ធផលឈ្នះចាញ់កាលពីលើកទី៣ អ្នកណាក៏ឃើញថា កីឡាករទាំងពីរសមនឹងទទួលលទ្ធផលពិតប្រាកដ ដោយមិនមែនជាលទ្ធផលកាន់ជើងម្ខាងៗ ឬចង់បំបាក់មុខកីឡាករកម្ពុជាដែលវាយលុកមិនសូវល្អនោះទេ ។ លោកទទួលស្គាល់ថា ការប្រកួតរបស់ ឡុង សុភី និងកីឡាករថៃ Chhouk Chhai ប្រកួតគ្នាមិនសូវរស់រវើកតាមការចង់បានប៉ុន្មានទេ សម្រាប់ការប៉ះគ្នាកាលពីលើកទី៣ ជាពិសេសនៅពេលដែលការប្រកួតពេញរយៈពេល៥ទឹកឃើញតែស្ទុះឱបគ្នា និងមិនបានវាយតប់គ្នាឱ្យល្អមើលទាល់តែសោះក៏ត្រូវលោកអាជ្ញាកណ្ដាលចាប់បំបែក ។
ការប្រកួតនៅក្នុងពេលនោះ ដ្បិតថាមិនសូវទាក់ទាញដែលធ្វើឱ្យអ្នកណាៗក៏កត់សម្គាល់ឃើញថា ឡុង សុភី ធ្លាក់ដៃ ប៉ុន្តែមិនមែនមានន័យថា លទ្ធផលដែលកំណត់ឱ្យ ឡុង សុភី ចាញ់ពិន្ទុគឺដោយសារតែចង់បំបាក់រឿងគេប្រកួតមិនបានល្អនោះទេ ។ លោកថា លទ្ធផលដែលបានស្ដែងឡើង គឺឡុង សុភី អត់ពេញចិត្ត ប៉ុន្តែផ្អែកតាមការប្រកួតពេញ៥ទឹក គឺកម្រិតវាយប្រកួតរបស់គេមិនសូវល្អ និងចាញ់ប្រៀបកីឡាករថៃ ទើបក្រោយបញ្ចប់ការប្រកួតទាំង៥ទឺកក៏ត្រូវកំណត់ឱ្យចាញ់តែម្ដង ។
ក្នុងទឹកទី១និងទី២ ការប្រកួតរបស់ពួកគេចំណាយកម្លាំងចោលទទេ ដោយមិនមានកីឡាករណាម្នាក់ប្រឹងបញ្ចេញសមត្ថភាពឱ្យរស់រវើកពេញចិត្តអ្នកទស្សនានោះទេ ។ លុះដល់ទឹកទី៣និងទី៤ ទើបភាគីម្ខាងៗប្រឹងប្រកួតបានបន្តិច ប៉ុន្តែក៏មិនល្អត្រូវចិត្តរបស់លោកនោះដែរ ទើបលោកយល់ថា ជារឿងគួរឱ្យស្ដាយព្រោះក្នុងជំនួបសងសឹកដែលអ្នកណាក៏ថាម្នាក់ៗនឹងប្រកួតអស់ពីសមត្ថភាពនោះ ចុងក្រោយបញ្ចប់ការប្រកួតបានត្រឹមតែឱបរឹតគ្នា រហូតដល់ថ្នាក់អ្នកទស្សនាចោទថា ឡើងមកឱបគ្នាដើម្បីឱ្យដល់ម៉ោងចប់ការប្រកួត ។
យ៉ាងណាក៏ដោយ ប្រៀបធៀបនឹងការវាយចេញ កីឡាករថៃមានប្រៀបល្អជាង គឺមិនមានអ្នកផ្ដល់ពិន្ទុមិនយុត្តិធម៌ ឬលម្អៀងទៅលើកីឡាករណាមួយនោះទេ ។ លោកទទូចឱ្យកីឡាករកម្ពុជា ប្រឹងប្រកួតឱ្យអស់ពីសមត្ថភាព ដោយលោកចាត់ទុកថា បើកីឡាករកម្ពុជាមិនប្រកួតឱ្យអស់ដៃ ក៏កីឡាករបរទេសមិនធ្វើការប្រកួតបានល្អដែរ ដែលពិតជាធ្វើឱ្យការប្រកួតទាំងមូលមើលឃើញពីចំណុចមិនរស់រវើក ។
លោក ញាណ សុធី ថ្លែងទៀតថា ការប្រកួតស្មើពិន្ទុកាលពី២លើកមុន កីឡាករឡុង សុភី ប្រកួតបានល្អជាងនេះ ដោយលោកអះអាងថា បើប្រកួតបានត្រឹមតែដូចគ្នានឹងការប្រកួតកាលពីថ្ងៃមុននោះ គឺលទ្ធផលពិតជាចាញ់កីឡាករថៃយូរមកហើយ ។ លោកសម្ដែងអារម្មណ៍សោកស្ដាយ នៅពេលដែលការប្រកួតសងសឹករបស់កីឡាករទាំងពីរមិនមានភាពរស់រវើក ដែលលោកអះអាងថា បើជ្រុលជាមានលទ្ធផលចាញ់ឈ្នះក៏គួរតែល្អមើលជាងនេះ ។
យ៉ាងណាក៏ដោយលោកមានប្រសាសន៍ថា ការប្រកួតដែលមិនសូវទាក់ទាញនោះមិនមែនជាកំហុសរបស់កីឡាករកម្ពុជាទេ ប៉ុន្តែវាអាចពាក់ព័ន្ធនឹងបរិយាកាសបណ្ដាលមកពីកីឡាករ Chhouk Chhai វាយបិទពិបាកវាយចូល និងបណ្ដាលមកពីកីឡាករថៃក៏មិនសូវវាយសម្រុកផងដែរ ទើបកីឡាករ ឡុង សុភី ក៏មិនហ៊ានសម្រុកដូចគ្នា ដែលនាំឱ្យការប្រកួតទាំងមូលមានភាពសោះកក្រោះមិនសូវទាក់ទាញ ។
កីឡាករ ឡុង សុភី ទទួលស្គាល់ថា ការប្រកួតរបស់ខ្លួនមិនសូវវាយប្រថុយដូចការប្រកួតមុនៗទេ ប៉ុន្តែនៅតែបង្ហាញអារម្មណ៍មិនអស់ចិត្តសម្រាប់លទ្ធផលដែលឱ្យខ្លួនចាញ់ការប្រកួត។
ឡុង សុភី និយាយថា បើប្រៀបធៀបនឹងកីឡាករថៃ គឺខ្លួនវាយចេញបានច្រើនហើយលទ្ធផលវាយត្រូវក៏ច្រើនណាស់ដែរ ទើបខ្លួនមិនសូវអស់ចិត្តក្រោយពីចប់ការប្រកួតបែរជាក្លាយជាអ្នកបរាជ័យ ។ យ៉ាងណាក៏ដោយ ខ្លួនមិនបានចាត់ទុកការផ្ដល់ពិន្ទុនៅពេលនោះថាជាការប្រកួតមិនយុត្តិធម៌ និងមិនត្រឹមត្រូវនោះទេ ដោយគ្រាន់តែយល់ឃើញថាខ្លួនខំប្រកួតនិងវាយសម្រុកលើកគូប្រកួតប៉ុណ្ណឹងដែរ បែរជាចាញ់កីឡាករថៃ ។
ឡុង សុភី និយាយទៀតថា នឹងត្រៀមខ្លួនសងសឹកកីឡាករថៃក្នុងពេលខាងមុខ ដោយមិនយល់ថាការប្រកួតចាញ់ពិន្ទុលើកនេះហើយក៏មានអារម្មណ៍ខ្លាចរអា រួចប្រកាសឈប់ប្រកួតនោះទេ ។ សុភី ថែមទាំងហៅថាការប្រកួតជាមួយកីឡាករ Chhouk Chhai ថាជាដៃគូល្អម្នាក់ ដែលធ្វើឱ្យខ្លួនចង់ប្រកួតជាមួយឱ្យបានញឹកញាប់នោះផង ដើម្បីអាចឱ្យការប្រកួតកាន់តែឆ្លុះបញ្ចាំងពីសមត្ថភាពរបស់ខ្លួន ។
ទោះជាយ៉ាងណា ឡុង សុភី សារភាពថា ខ្លួនវាយមិនបានល្អទេ បើប្រៀបធៀបនឹងការប្រកួតមុនៗសម្រាប់ជំនួបជាមួយ Chhouk Chhai ប៉ុន្តែហេតុផលដែលបានលេចឡើងនោះ មិនមែនដោយសារកំហុសរបស់ខ្លួនទេ គឺដោយសារតែគូប្រកួតចេះតែគេចៗឆ្ងាយដែលធ្វើឱ្យពិបាកវាយសំរុក លុះពេលចូលកៀកក៏រត់ចូលឱបដែលធ្វើឱ្យខ្លួនធ្វើអ្វីក៏មិនបាន ។
សុភី បានសម្ដែងនូវអារម្មណ៍សោកស្ដាយដែលខំត្រៀមកែង និងម៉ាត់ជាច្រើន ប៉ុន្តែពេលការប្រកួតជាក់ស្ដែងបែរជាត្រូវបរាជ័យ ដោយសារតែចង់វាយកែងក៏ពិបាក វាយម៉ាត់ក៏យ៉ាប់ ហើយចុងក្រោយបានត្រឹមតែឱបដើម្បីការពារខ្លួនវិញ ។ សុភីអះអាងថា ការប្រកួតជាមួយ Chhouk Chhai សម្រាប់លើកទី៣ ទទួលបានលទ្ធផលមិនអស់ចិត្ត និងបានប្រកាសយ៉ាងមុតមាំថា បើផ្គូផ្គងឱ្យប្រកួតលើកក្រោយនឹងប្រឹងឱ្យឈ្នះដើម្បីសងសឹក ។
លោក ញាន សុធី និយាយថា កីឡាករមួយគូនេះ នឹងរៀបចំឱ្យជួបគ្នាក្នុងពេលឆាប់ៗ ខាងមុខ ប្រសិនបើកីឡាករថៃរៀបចំពេលវេលាមកប្រកួតជាថ្មីនៅកម្ពុជា ដោយជួបជាមួយកីឡាករ ឡុង សុភី ៕
ចែករំលែកព័តមាននេះ