ចាប់ឃាត់ខ្លួនក្រុមចោរដើរគាស់ផ្ទះ១ក្រុម
ខេត្តប៉ៃលិន ៖ ចោរ១ក្រុម មានគ្នា៤នាក់ ត្រូវបានកម្លាំងនគរបាលចាប់ឃាត់ខ្លួន ខណ:ដើរធ្វើសកម្មភាពលួចគាស់ផ្ទះប្រជាពលរដ្ឋរាល់យប់ លុះម្ចាស់គេដឹង
ខេត្តប៉ៃលិន ៖ ចោរ១ក្រុម មានគ្នា៤នាក់ ត្រូវបានកម្លាំងនគរបាលចាប់ឃាត់ខ្លួន ខណ:ដើរធ្វើសកម្មភាពលួចគាស់ផ្ទះប្រជាពលរដ្ឋរាល់យប់ លុះម្ចាស់គេដឹង ស្គាល់ ក៏ដាក់ពាក្យបណ្តឹងឱ្យនគរបាលចាប់ឃាត់ខ្លួនតែម្តង ។ តែក្រោយមកមានជនសង្ស័យម្នាក់ បានរត់គេចខ្លួនបាត់ស្រមោល ហើយនគរបាលកំពុងតាមរកមើល ដើម្បីចាប់ឃាត់ខ្លួនយកមកផ្តន្ទាទោសតាមច្បាប់ ។
ករណីក្រុមចោរលូចគាស់ផ្ទះប្រជាពលរដ្ឋនេះ បានកើតឡើងកាលពីវេលាម៉ោង០៣និង៣០នាទីទាបភ្លឺ ថ្ងៃទី១៨ ខែសីហា ឆ្នាំ២០១៧ នៅចំណុច (សំបុកចាប) ស្ថិតនៅភូមិផ្សារព្រំជើងឃុំស្ទឹងកាច់ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ៖ ជនរងគ្រោះ ឈ្មោះ សៀម វិសិទ្ធ ភេទប្រុស អាយុ២៥ឆ្នាំ ត្រូវចោរយកអស់ខ្សែ.កប្លាទីនមួយខ្សែ តំលៃ៣៥០ដុល្លារ, ចិញ្ជៀនប្លាទីន៣វង់តំលៃ២០០ដុល្លារ, កងដៃប្លាទីនមួយគួតំលៃ៣៥០ដុល្លារ, ក្រវិលប្លាទីនមួយវង់តំលៃ១៥០ដុល្លារ, ទូរស័ព្ទអាហ្វូន ស៊ិចផ្លើស មួយគ្រឿងតំលៃ៣៥០ដុល្លារ សរុបទឹកប្រាក់អស់ចំនួន១៤០០ដុល្លារ ។ ប្រភពបន្តទៀតថា ក្រោយពីទទួលពាក្យបណ្តឹង កម្លាំងអធិការស្រុកសាលាក្រៅ បានធ្វើកាស៊ើបអង្កេត ហើយក្តាប់បានមុខសញ្ញា រហូតឈានធ្វើការឃាត់ខ្លួនជនសង្ស័យទាំងអស់ខាងលើ ។
ចំណែកជនសង្ស័យទាំងបីនាក់ក្នុងចំណោមបួននាក់ រួមមាន ទី១.ឈ្មោះ ឆុង ឆើត ភេទប្រុស អាយុ២០ឆ្នាំ រស់នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ (ជាអ្នកផ្សំគំនិតលក់របស់) ទី២.ឈ្មោះ រឿន ណុច ភេទប្រុស អាយុ១៩ឆ្នាំ រស់នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ (ជាជនដៃដល់) និងទី៣.ឈ្មោះ លឿង សំណាង ភេទប្រុស អាយុ១២ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ (ជាជនដៃដល់) និងម្នាក់ទៀតបានរត់គេចខ្លួនបាត់ស្រមោល ។
ពាក់ព័ន្ធនឹងករណីខាងលើនេះ ខាងអធិការនគរបាលស្រុកសាលាក្រៅ បានបញ្ជូនទៅជំនាញ ដើម្បីរៀបចំសំណុំរឿង បញ្ជូនទៅកាន់សាលាដំបូងខេត្ត ឱ្យចាត់ការតាមនីតិវិធី ៕
ចែករំលែកព័តមាននេះ