នៅចាំកុមារាម្នាក់នេះទេ?
ខេត្តសៀមរាប ៖ កុមារា ផា សុផាត អាយុ៦ឆ្នាំ ដែលបៅដោះមេគោ ជំនួសទឹកដោះម្ដាយ តាំងពីអាយុ១ខួប៣ខែ ខណៈដែលម្តាយបានចេញទៅធ្វើការស៊ីឈ្នួលគេនៅឯប្រទេសថៃ
ខេត្តសៀមរាប ៖ កុមារា ផា សុផាត អាយុ៦ឆ្នាំ ដែលបៅដោះមេគោ ជំនួសទឹកដោះម្ដាយ តាំងពីអាយុ១ខួប៣ខែ ខណៈដែលម្តាយបានចេញទៅធ្វើការស៊ីឈ្នួលគេនៅឯប្រទេសថៃ ទុកឱ្យនៅជាមួយជីដូនជីតា ដែលមានទីតាំងផ្ទះស្ថិតនៅក្នុងភូមិនគរភាស ឃុំនគរភាស ស្រុកអង្គរជុំ ខេត្តសៀមរាប ដែលចម្ងាយប្រមាណ៦០គីឡូម៉ែត្រភាគខាងលិចពីទីរួមខេត្តសៀមរាប ។
ចំណែកជីដូន និងជីតា របស់ក្មេងប្រុសតូចម្នាក់ ដែលធ្លាប់បៅដោះមេគោ ដើម្បីបំបាត់ការស្រេកឃ្លាន ដោយសារម្តាយទៅចោល តាំងពីអាយុជាង១ខួប កំពុងព្រួយបារម្ភអំពីបញ្ហាដែលកុមារនោះ មិនឆ្លាតវៃដូចកុមារផ្សេងទៀត ។
ការព្រួយបារម្ភកើតមានឡើងនៅស្របពេលដែលកុមារតូចម្នាក់នោះ គ្រប់អាយុទៅសាលារៀន ប៉ុន្តែគាត់ហាក់មិនសូវឆ្លាត និងមិនចងចាំមេរៀនទាំងឡាយ ហើយមានចំណាត់ថ្នាក់ខ្សោយផង នៅក្នុងចំណោមកុមារតូចៗ ដែលរៀនថ្នាក់ជាមួយគ្នា ។
ឬឯកុមារា ផា សុផាត គឺជាឈ្មោះក្មេងប្រុសតូចម្នាក់ ដែលធ្លាប់ដើរទៅបៅដោះមេគោរបស់ជីដូន ជីតា ដោយខ្លួនឯង ជារៀងរាល់ថ្ងៃកាលពីជាង ៤ឆ្នាំមុន ប៉ុន្តែពេលនេះគាត់មានអាយុ៦ឆ្នាំ ធំលូតលាស់ហើយ ។ បើទោះបីជាពេលនេះ កុមារ សុផាត បានឈប់បៅដោះមេគោជាយូរមកហើយក៏ដោយ ក៏ធ្វើឱ្យមនុស្សជាច្រើន នៅតែចងចាំរឿងរបស់ក្មេងប្រុសម្នាក់នេះដែរ ។
បច្ចុប្បន្ន កុមារ សុផាត នៅតែស្ថិតនៅក្រោមការមើលថែរបស់ជីដូន និងជីតា នៅក្នុងភូមិនគរភាស ឃុំនគរភាស ស្រុកអង្គរជុំ នៃខេត្តសៀមរាប ដោយសារតែឪពុកម្ដាយរបស់គាត់មានជីវភាពក្រីក្រ ហើយបានចំណាក់ស្រុកទៅធ្វើការនៅឯប្រទេសថៃ ។ កុមារ ផា សុផាត ពេលនេះបានចូលសាលារៀន ព្រមទាំងចេះនិយាយយ៉ាងច្បាស់ ប៉ុន្តែខ្មាសអៀនច្រើន មិនសូវរាក់ទាក់ជាមួយមនុស្សដែលប្លែកមុខទេ ៕
ចែករំលែកព័តមាននេះ