បុរសអ្នកស្ទូចត្រីប្រទះឃើញ កាំភ្លើងខ្លី១ដើមនៅក្បែរចេតីយ
រាជធានីភ្នំពេញ ៖ កាំភ្លើងខ្លីម៉ាកកា៥៩មួយដើម ដែលមានគ្រាប់ចំនួន៧គ្រាប់ ត្រូវបានជនមិនស្គាល់មុខនិងមិនស្គាល់សមាសភាព
រាជធានីភ្នំពេញ ៖ កាំភ្លើងខ្លីម៉ាកកា៥៩មួយដើម ដែលមានគ្រាប់ចំនួន៧គ្រាប់ ត្រូវបានជនមិនស្គាល់មុខនិងមិនស្គាល់សមាសភាពយកទៅប្លុងចោលនៅក្បែរចេតីយមាត់ស្រះទឹកមួយកន្លែង ហើយត្រូវបានបុរសអ្នកស្ទូចត្រីម្នាក់ប្រទះឃើញ ក៏រើសយកទៅប្រគល់ជូននគរបាលប៉ុស្ដិ៍ភ្លើងឆេះរទេះ ដើម្បីរក្សាទុក និងស្រាវជ្រាវបន្តឲ្យដឹងថា ម្ចាស់កាំភ្លើងខ្លីនោះជានរណា មានជាប់ពាក់ព័ន្ធទៅនឹងបទល្មើសអ្វីដែរឬអត់។ ជាពិសេសមានការជាប់ពាក់ព័ន្ធទៅនឹងអំពើឃាតកម្មបាញ់សម្លាប់ស្ត្រីម្នាក់នៅក្នុងសង្កាត់ចោមចៅ កាលពីវេលាទាបភ្លឺឈានចូលថ្ងៃទី១៩ ខែសីហា កន្លងមកដែរឬអត់ ព្រោះពេលនោះតាមការសន្និដ្ឋានលើសំបកគ្រាប់ ដែលបន្សល់ទុកនៅកន្លែងកើតហេតុអាចជាកាំភ្លើងម៉ាកកា៥៩ដែរ។
បុរសអ្នកស្ទូចត្រីបានប្រទះឃើញកាំភ្លើងខ្លី១ដើមនោះ កាលពីវេលាម៉ោង៨ព្រឹក ថ្ងៃទី២០ ខែសីហា ឆ្នាំ២០១៧ នៅចំណុចចេតីយក្បែរស្រះទឹកមួយកន្លែង ដែលមានទីតាំងស្ថិតនៅក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។ រហូតដល់វេលាម៉ោង៤ និង១៥នាទីល្ងាចថ្ងៃដដែល ទើបបុរសនោះទៅរាយការណ៍និងនាំយកកាំភ្លើងនោះប្រគល់ឲ្យនគរបាលប៉ុស្ដិ៍ ភ្លើងឆេះរទេះរក្សាទុក។ តាមប្រភពព័ត៌មានបានឲ្យដឹងថា កាំភ្លើងខ្លី១ដើមនោះម៉ាកកា៥៩ លេខ BA-5705 មានគ្រាប់ចំនួន៧គ្រាប់នៅក្នុងនោះ ហើយទំនងកាំភ្លើងនេះត្រូវបានគេប្រើប្រាស់រាល់ថ្ងៃ មិនមែនកាំភ្លើងទុកចោលយូរមកហើយនោះឡើយ ទើបត្រូវជនមិនស្គាល់ មុខយកទៅប្លុងចោលថ្មីៗតែប៉ុណ្ណោះ ព្រោះវានៅស្អាតគ្មានច្រេះគ្មានស្នឹមដូចជាការទុកចោលយូរថ្ងៃនោះឡើយ។
ចំណែកបុរសដែលជាអ្នកស្ទូចត្រីប្រទះឃើញកាំភ្លើងនេះ ឈ្មោះ លាវ វិបុល អាយុ៣៧ឆ្នាំ មានទីលំនៅក្នុងភូមិកើតហេតុខាងលើ។ នៅមុនពេលកើតហេតុបុរសខាងលើបានជិះកង់ចេញពីផ្ទះទៅស្ទូចត្រីនៅចំណុចកើតហេតុ ពេលទៅដល់បានយកកង់ទៅទុកនៅក្បែចេតីយ ស្រាប់តែប្រទះឃើញកាំភ្លើង១ដើមនោះនៅជិតចេតីយគាត់ក៏រើសវា ហើយបានយកទៅទុកនៅផ្ទះ រហូតដល់វេលាល្ងាចទើបនាំយកទៅប្រគល់ជូននគរបាល។ ទាក់ទិននឹងហេតុការណ៍នោះ កម្លាំងនគរបាលប៉ុស្ដិ៍ភ្លើងឆេះរទេះ បានទទួលយកកាំភ្លើងនោះទៅរក្សាទុក និងបានធ្វើការសាកសួរព័ត៌មានពីបុរសខាងលើ ធ្វើរបាយការណ៍រួចរាល់ហើយ និងកំពុងធ្វើការស្រាវជ្រាវតាមជំនាញ ដើម្បីស្វែងរកម្ចាស់កាំភ្លើងពិតប្រាកដ និងមូលហេតុដែលបានយកកាំភ្លើងទៅប្លុងចោលបែបនេះ។
ទោះបីជាបែបណានគរបាលមិនទាន់ដឹងថា តើកាំភ្លើងដែលជនមិន ស្គាល់មុខយកទៅប្លុងចោលនេះ មានជាប់ពាក់ព័ន្ធទៅនឹងបទល្មើសអ្វីខ្លះ ហើយមានការពាក់ព័ន្ធនឹងអំពើឃាតកម្មបាញ់សម្លាប់ស្ត្រីម្នាក់នៅក្នុងសង្កាត់ចោមចៅឬអត់នៅឡើយនោះទេ៕
ចែករំលែកព័តមាននេះ