តាមក្របួចមកវិញបានទាំងមនុស្ស…
ជនសង្ស័យ២នាក់ត្រូវកម្លាំងនគរបាលក្រុង សហការជាមួយការិយាល័យព្រហ្មទណ្ឌកម្រិតធ្ងន់ស្រាវជ្រាវរហូតឃាត់ខ្លួនបាន
ខេត្តបាត់ដំបង ៖ សេចក្តីរាយការណ៍បឋមឱ្យដឹងថា ជនសង្ស័យ២នាក់ត្រូវកម្លាំងនគរបាលក្រុង សហការជាមួយការិយាល័យព្រហ្មទណ្ឌកម្រិតធ្ងន់ស្រាវជ្រាវរហូតឃាត់ខ្លួនបាន កាលពីវេលាម៉ោង១០យប់ថ្ងៃទី១៨ សីហា ក្រោយពីមានពាក្យបណ្តឹងរបស់ជនរងគ្រោះលើករណីលួចខោអាវយ៉ាងច្រើន ដែលកើតឡើងត្រង់ចំណុចក្រុមទី42 ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
សេចក្តីរាយការណ៍បន្តថា ជនសង្ស័យទាំង២នាក់ ម្នាក់ឈ្មោះញ៉ែម ប៊ុនធឿន ហៅហើម អាយុ២៨ឆ្នាំ និងម្នាក់ទៀតឈ្មោះទូច ម៉ៅ អាយុ២៨ឆ្នាំ ទាំង២នាក់ស្នាក់នៅបណ្នោះអាសន្នក្នុងភូមិកាប់គោថ្មី សង្កាត់អូរចារ ក្រុងបាត់ដំបង ។ ដោយឡែក ជនរងគ្រោះជាម្ចាស់ខោអាវឈ្មោះម៉ាស់ ឡើ ហៅញ៉ ភេទប្រុស អាយុ៣៩ឆ្នាំ ស្នាក់នៅបណ្តោះអាសន្នក្នុងភូមិកើតហេតុ ។
ក្រោយឃាត់ខ្លួន ជនសង្ស័យខាងលើបានឆ្លើយសារភាពថា ខ្លួនពិតជាធ្វើសកម្មភាពលួចសម្ភារទាំងនោះពិតប្រាកដមែន ។ ក្នុងនោះមានខោស្រីចំនួន៤៣ខោ និងខោខូវប៊យ៧២ខោ ។ បច្ចុប្បន្ន ជនសង្ស័យបានកសាងសំណុំរឿងបញ្ជូនទៅតុលាការ ។
ចែករំលែកព័តមាននេះ