រាជធានីភ្នំពេញ ៖ នៅរសៀលថ្ងៃសៅរ៍ទី១៩ សីហា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងនៅតែដំណើរការដូចធម្មតា ដោយប្រកាសបើករេញឲ្យកីឡាករកម្ពុជា២រូប និង
រាជធានីភ្នំពេញ ៖ នៅរសៀលថ្ងៃសៅរ៍ទី១៩ សីហា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងនៅតែដំណើរការដូចធម្មតា ដោយប្រកាសបើករេញឲ្យកីឡាករកម្ពុជា២រូប និងបរទេស២រូបប៉ះគ្នា បើទោះជាព្រឹត្តិការណ៍ដណ្ដើមខ្សែក្រវាត់អន្តរជាតិដែលបានបញ្ចប់ទៅនៅមិនទាន់ប្រកាសបើករដូវកាលថ្មីជាផ្លូវការក្តី ។ អ្វីដែលគេកត់សម្គាល់គឺការប្រកួតរបស់គូទាំងពីរ នឹងត្រូវធ្វើឡើងដោយកីឡាករកម្ពុជាជើងចាស់ ប៉ះសុទ្ធតែជាមួយកីឡាករល្បីឈ្មោះពេញកម្លាំង និងពោរពេញដោយបច្ចេកទេសមកពីប្រទេសថៃ ។
ការប្រកួតដែលនឹងចាប់ផ្ដើមឡើងពីម៉ោង២រសៀលស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលរសៀលថ្ងៃសម្រាក ដែលមនុស្សម្នាក្នុងក្រុងនិយមមកទស្សនាដល់ស្ទូឌីយោ ក្នុងពេលដែលមុននិងក្រោយម៉ោងប្រដាល់សុទ្ធតែជាការប្រគំតន្ត្រីផង ទើបមិនខ្វះមនុស្សទស្សនា ។ ការប្រកួតប្រដាល់អន្តរជាតិជាលក្ខណៈមិត្តភាពកំដររេញ ដើម្បីរង់ចាំការប្រកួតដណ្ដើមខ្សែក្រវាត់វគ្គថ្មីលេចចេញជារូបរាងនេះ ត្រូវបានប្រកាសថា ពិតជាមានអ្នកទស្សនាច្រើនកកកុញមិនខុសពីការប្រកួតក្នុងពេលដណ្ដើមខ្សែក្រវាត់នោះឡើយ ។ កីឡាករកម្ពុជា២រូប គឺជើងខ្លាំង រឿង សោភ័ណ្ឌ និងកីឡាករល្បីឈ្មោះគួរសម ហុឹម សេរី នឹងក្លាយជាគូប្រកួតស៊ីសាច់ហុតឈាមជាមួយកីឡាករបរទេសនៅរសៀលស្អែកនោះ ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយ ដោយគ្រាន់តែបានដឹងថាពួកគេនឹងត្រូវឡើងប្រកួតជាមួយកីឡាករថៃភាគីម្ខាងៗសប្បាយចិត្តទទួលយកដោយការពេញចិត្តតែម្ដង ។ លោកថា កីឡាករកម្ពុជាទាំងពីរសុទ្ធតែបានត្រៀមខ្លួនមុនពេលប៉ះគ្នា ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់នោះផង ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ រឿង សោភ័ណ្ឌ ជាជើងខ្លាំងឱ្យឡើងប៉ះប្រកួតជាមួយកីឡាកថៃឈ្មោះ Khun Phen ក្នុងនាមជាគូឯកអន្តរជាតិនៅរសៀលថ្ងៃសៅរ៍ស្អែក ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាតែម្ដងនៅក្នុងព្រឹត្តិការណ៍មួយនេះ ដើម្បីឱ្យការប្រកួតនៅពាក់កណ្ដាលខែសីហានេះ មានភាពទាក់ទាញ ។
លោកថា កីឡាករ រឿង សោភ័ណ្ឌ អាចចាត់ទុកជាជើងខ្លាំងម្នាក់នៅលើសង្វៀនទើបសម្រេចឱ្យឡើងប្រកួតជាអន្តរជាតិ ខណ:ដែលព្រឹត្តិការណ៍នេះត្រូវបានគេដឹងថា ចម្រុះដោយកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថាជំនួប រឿង សោភ័ណ្ឌ ជាមួយកីឡាករថៃ ពិតជាមិនធម្មតា ។ កីឡាករកម្ពុជារូបនេះគឺជាសមាសភាពល្អម្នាក់ បន្ទាប់ពីការប្រកួតប៉ុន្មានលើកចុងក្រោយរបស់គេមានលទ្ធផលល្អវិញខុសពីមួយរយៈពេលមុនដែលវាយជាមួយថៃល្អខ្លះ មិនសូវល្អខ្លះនៅលើសង្វៀនអន្តរជាតិដូចគ្នា ។ លោកថា រឿង សោភ័ណ្ឌនៅតែចាត់ទុកជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតថ្ងៃស្អែក។
លោកថា កីឡាករថៃធ្លាប់ប្រកួត៩៣លើក ឈ្នះ៧២លើក ចាញ់១៨លើក និងស្មើ៣លើក ហើយបើទោះជាកីឡាកររូបនេះមានប្រវត្តិឡើងប្រកួតតិចជាងភាគីខាងកម្ពុជា ដែលមានប្រវត្តិប្រកួតដល់១៥១លើក ឈ្នះ១៣២លើក ចាញ់១៧លើក និងស្មើ២លើក ក៏មិនអាចមើលស្រាលបានដែរ។
សម្រាប់កីឡាករ ហ៊ឹម សេរី មកពីក្លិបតាព្រហ្មមានជ័យ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃឈ្មោះ Phat Chantha នៅក្នុងព្រឹត្តិការណ៍ប្រដាល់អន្តរជាតិនេះដែរក្នុងនាមជាគូរងឯក ។ លោកថា ការប្រកួតរបស់ពួកគេ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលហុឹម សេរី ជាកីឡាករខ្លាំងតែមិនសូវមានឱកាសឡើងប្រកួតអន្តរជាតិនាពេលកន្លងមក ។ លោកថា កីឡាករថៃគឺជាជើងចាស់និងល្បីឈ្មោះ តែមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជា ជាធំបើទោះជាគេថ្មីបន្តិចក្ដី ។
លោកថា កីឡាករថៃធ្លាប់ប្រកួត៥១លើក ឈ្នះ៤៣លើក ចាញ់៨លើក និងមិនដែលស្មើ រីឯកីឡាករកម្ពុជាធ្លាប់ប្រកួតបាន៧៥លើក ឈ្នះ៦៥លើក ចាញ់១០លើក និងមិនដែលស្មើដូចគ្នា ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នា ៕
ចែករំលែកព័តមាននេះ