ចេញពីផឹកស៊ីស្រវឹងជិះម៉ូតូបុករថយន្តរបួស2នាក់
រាជធានីភ្នំពេញ ៖ បុរស២នាក់ចេញពីផឹកស៊ីវិញបានជិះម៉ូតូជ្រុលទៅបុកនឹងរថយន្តនៅផ្លូវបំបែកជាបួនបណ្តាលឱ្យអ្នកជិះម៉ូតូរងរបួសធ្ងន់ម្នាក់
រាជធានីភ្នំពេញ ៖ បុរស២នាក់ចេញពីផឹកស៊ីវិញបានជិះម៉ូតូជ្រុលទៅបុកនឹងរថយន្តនៅផ្លូវបំបែកជាបួនបណ្តាលឱ្យអ្នកជិះម៉ូតូរងរបួសធ្ងន់ម្នាក់ និងស្រាល់ម្នាក់ ហេតុការណ៍នេះបានកើតឡើងនៅវេលាម៉ោង១១និង៤០នាទីយប់ ថ្ងៃទី១៧ ខែសីហា ឆ្នាំ២០១៧ ចំណុចផ្លូវព្រះមុនីវង្ស កែងនឹងផ្លូវ៣១០ សង្កាត់បឹងកេងកង២ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តម៉ាកកាមរីបាឡែន ពណ៌ស្ករ មិនចាំស្លាកលេខ បានធ្វើដំណើរតាមផ្លូវ៣១០ក្នុងទិសដៅពីលិចទៅកើត ខណៈមកដល់ផ្លូវបំបែកជាបួនក៏ស្រាប់តែមានបុរស២នាក់មិនដឹងថា ចេញពីផឹកស៊ីនៅទីណានោះទេ គឺបានជិះម៉ូតូម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ១AQ-៣២២០ បានធ្វើដំណើរតាមផ្លូវព្រះមុនីវង្សក្នុងទិសដៅពីជើងទៅត្បូងក្នុងល្បឿនលឿន និងស្រវឹងព្រមទាំងខ្វះការប្រុងប្រយ័ត្នផងនោះបានជ្រុលទៅបុកចំពាក់កណ្តាលពេញរថយន្តពេញទំហឹងបណ្តាលឱ្យអ្នកបើកម៉ូតូរងរបួសបែកក្បាល សន្លប់ស្តូកស្តឹង ចំណែកអ្នកអង្គុយខាងក្រោយរងរបួស រលាត់ដៃរលាត់ជើង ចំណែកម៉ូតូរងការខូចខាតបាក់ខ្នងមុខ និងបែកក្បាំងទាំងសងខាង ។ ដោយឡែកខាងរថយន្តវិញ ឃើញហេតុការណ៍ដូចនេះ បានបន្ថែមល្បឿនរត់គេចខ្លួនបាត់ស្រមោល ។
ក្រោយពេលកើតហេតុ បងប្អូនប្រជាពលរដ្ឋបានទូរស័ព្ទហៅរថយន្តសង្គ្រោះឱ្យមកដឹកជនរងគ្រោះដែលរងរបួសធ្ងន់យកទៅសង្គ្រោះនៅគ្លីនិកឯកជន ។ ចំណែកម៉ូតូត្រូវបានសមត្ថកិច្ច យកទៅរក្សាទុកនៅអធិការដ្ឋានខណ្ឌចំការមន ៕
ចែករំលែកព័តមាននេះ