រថយន្តទំនើបថ្មីៗ អាចមានគ្រឿងបន្លាស់ប្រហែល៧,៥ម៉ឺនបំណែក ហើយបើមានគ្រឿងបន្លាស់ណាមួយដំណើរការមិនល្អ វានឹងអាចមានឥទ្ធិពលដល់រថយន្តរបស់អ្នក ។ ការថែទាំរថយន្តឲ្យនៅតែមានស្ថានភាពល្អ នឹងជួយឲ្យអ្នកមានសុវត្ថិភាពពេលបើកបរ ប្រើប្រាស់បានយូរ ហើយនៅថ្ងៃណាមួយដែលអ្នកចង់លក់វា អ្នកនឹងទទួលបានតម្លៃដ៏សមរម្យ ។ ខាងក្រោមនេះ គឺជាគន្លឹះមួយចំនួនក្នុងការថែទាំរថយន្តថ្មីរបស់អ្នក ។
១-ត្រួតពិនិត្យប្រេងម៉ាស៊ីនរថយន្ត ៖
ចូរត្រួតពិនិត្យវាឱ្យបានទៀងទាត់ អ្នកអាចពិនិត្យជាប្រចាំខែសម្រាប់យានយន្តដែលមានស្ថានភាពល្អ និងពិនិត្យឲ្យបានញឹកញាប់ ប្រសិនបើអ្នកសម្គាល់ឃើញមានការលិចធ្លាយប្រេង ឬត្រូវបន្ថែមប្រេងជាប្រចាំ ។ អ្នកគួរតែចតរថយន្តនៅកន្លែងរាបស្មើ ដើម្បីអាចពិនិត្យមើលកម្រិតប្រេងបានត្រឹមត្រូវ ។ សូមកុំបន្ថែមប្រេងលើសពីទំហំផ្ទុករបស់ម៉ាស៊ីន ហើយប្រសិនបើរកឃើញថា មានការលិចធ្លាយប្រេង សូមជួសជុលវាឱ្យបានឆាប់តាមដែលអាចធ្វើទៅបាន ។
២-ពិនិត្យសម្ពាធខ្យល់ក្នុងកង់រថយន្ត ៖
អ្នកគួរតែប្រើឧបករណ៍វាស់សម្ពាធកង់រថយន្តនីមួយៗឲ្យបានត្រឹមត្រូវ រួមទាំងថាសរបស់រថយន្តរៀងរាល់១ខែម្តង និងមុនពេលធ្វើដំណើរផ្លូវឆ្ងាយ ។ ធ្វើដូចនេះ នៅពេលដែលសម្បកកង់រថយន្តត្រជាក់ (មុនពេលបើកបររថយន្ត ឬបន្ទាប់ពីបើកបរតិចជាង៤គីឡូម៉ែត្រ)។ កំណត់សម្ពាធកង់រថយន្តដែលណែនាំដោយក្រុមហ៊ុនផលិតរថយន្ត មិនមែនសម្ពាធអតិបរមា ដែលធ្វើឲ្យកង់រថយន្តឡើងប៉ោងនោះទេ ។
៣-លាងរថយន្ត ៖
សូមព្យាយាមលាងរថយន្តរបស់អ្នកជារៀងរាល់សប្តាហ៍ ប្រសិនបើអាច ។ អ្នកគួរលាងសម្អាតតួរថយន្ត ហើយបើចាំបាច់ សូមលាងសម្អាតតួខាងក្រោមរថយន្តផងដែរដើម្បីកម្ចាត់ភាពកខ្វក់ និងអំបិលដែលជាប់នៅពេលបើកបរតាមផ្លូវ ។ ម្យ៉ាងទៀត អ្នកគួរប៉ូលាតួរថយន្តដើម្បីរក្សាពណ៌ និងធ្វើឲ្យវាមើលទៅភ្លឺរលោង ។
៤-ពិនិត្យមើលតម្រងខ្យល់ ៖
អ្នកគួរតែត្រួតពិនិត្យមើលតម្រងខ្យល់រថយន្ត និងយកវាចេញពីរថយន្ត ហើយដាក់វាបញ្ចាំងនឹងពន្លឺថ្ងៃ ។ ប្រសិនបើមិនឃើញមានពន្លឺចូលតាមតម្រងខ្យល់នេះទេ សូមដូរវាចេញ។ បើមិនអីចឹងទេ សូមអនុវត្តតាមការណែនាំនៅពេលណាសមស្របក្នុងការដូរវាចេញ ។
៥-ត្រួតពិនិត្យមើលហ្វ្រាំង ៖
ប្រព័ន្ធហ្វ្រាំងរថយន្តទំនើប ត្រូវបានរចនាឡើងដើម្បីឲ្យអ្នកដូរវាបានទៀងទាត់ និងរក្សាប្រសិទ្ធភាពហ្វ្រាំងជាអតិបរមា។ ប្រសិនបើអ្នកកត់សម្គាល់ឃើញថា មានបញ្ហាណាមួយជាមួយនឹងប្រព័ន្ធហ្វ្រាំង សូមយករថយន្តទៅត្រួតពិនិត្យហ្វ្រាំងភ្លាមៗ ។
បើប្រព័ន្ធហ្វ្រាំងមានបញ្ហា អ្នកអាចមានគ្រោះថ្នាក់ធ្ងន់ធ្ងរ ។
៦-ត្រួតពិនិត្យអាគុយរថយន្ត ៖
អ្នកគួរត្រួតពិនិត្យតម្កៀបចាប់អាគុយ និងខ្សែសាកអាគុយដើម្បីប្រាកដថា វាត្រូវបានភ្ជាប់ដោយសុវត្ថិភាព គ្មានការសឹក ឬច្រែះស៊ី។ ប្រសិនបើអាគុយរថយន្តមានគម្របអាចបើកបាន សូមពិនិត្យមើលកម្រិតសារធាតុរាវរបស់វារៀងរាល់២ទៅ៣ខែម្តង ជាពិសេស នៅពេលអាកាសធាតុក្តៅ ។
ក្រោយពីអានគន្លឹះទាំងអស់ខាងលើនេះហើយ តើលោកអ្នកយល់ឃើញយ៉ាងណាដែរ ?
ចែករំលែកព័តមាននេះ