រាជធានីភ្នំពេញ ៖ បន្ទាប់ពីលេងចាញ់ក្រុមជម្រើសជាតិអាយុក្រោម២២(U22)ឆ្នាំហ្វ៊ីលីពីន២-០កាលពីយប់ថ្ងៃទី១៥ សីហា រួចមក ក្រុមជម្រើសជាតិអាយុក្រោម២២(U22)ឆ្នាំកម្ពុជា ត្រូវជួប
រាជធានីភ្នំពេញ ៖ បន្ទាប់ពីលេងចាញ់ក្រុមជម្រើសជាតិអាយុក្រោម២២(U22)ឆ្នាំហ្វ៊ីលីពីន២-០កាលពីយប់ថ្ងៃទី១៥ សីហា រួចមក ក្រុមជម្រើសជាតិអាយុក្រោម២២(U22)ឆ្នាំកម្ពុជា ត្រូវជួបប្រកួតជាមួយក្រុមជម្រើសជាតិអាយុក្រោម២២(U22)ឆ្នាំវៀតណាមក្នុងព្រឹត្តិការណ៍ស៊ីហ្គេមលើកទី២៩ នៅប្រទេសម៉ាឡេស៊ី នាវេលាម៉ោង៣រសៀលថ្ងៃទី១៧ សីហា ឆ្នាំ២០១៧ ជាបន្តទៀត។
ក្នុងជំនួបបើកឆាកពូលBជាមួយក្រុមU22ហ្វ៊ីលីពីន ក្រុមU22កម្ពុជាហាក់គ្មានសំណាងទាល់តែសោះ ទោះបីមានឱកាសនាំបាល់ទៅលេងមុខទីគូប្រកួតជាច្រើនលើកក្ដី ។
នៅតង់ទី១ ក្រុមទាំងពីរបញ្ចប់ដោយលទ្ធផលស្មើគ្នា០-០ លុះចូលដល់តង់ទី១នៅនាទីទី៥១ កីឡាRaymart Cubon បានតែតបាល់បញ្ចូលទីជួយឲ្យក្រុមU22ហ្វ៊ីលីពីននាំមុខ១-០ ។ នៅនាទីទី៨២ កីឡាករ Kouchi Belgira បានទាត់បាល់ពិន័យពីចម្ងាយចូលទីក្រុមU22កម្ពុជាបានយ៉ាងឡូយនាំឲ្យក្រុមU22ហ្វ៊ីលីពីនបង្កើនការនាំមុខ ២-០។ នៅនាទីទី៨៨ កីឡាករ ឆុំ ពិសា របស់ក្រុមU22កម្ពុជាត្រូវបានបណ្តេញចេញពីការប្រកួតក្រោយទទួលបានកាតលឿងជាលើកទីពីរ ។ ក្រុមU22កម្ពុជាទោះបីប្រឹងលេងវាយបកយ៉ាងណាក៏ដោយក៏គ្មានសំណាងរកបានគ្រាប់បាល់ដែរពោលគឺបានត្រឹមទាត់ប៉ះរបាទីគូប្រកួតប៉ុណ្ណោះ ។ ក្រុមU22ហ្វ៊ីលីពីន បានរក្សាលទ្ធផលនាំមុខ២-០រហូតដល់ចប់ការប្រកួត ។ តាមរយៈជ័យជម្នះនេះធ្វើឲ្យក្រុមមួយនេះសម្ដែងការរីករាយយ៉ាងខ្លាំងដោយសារមិនត្រឹមតែទទួលបាន៣ពិន្ទុដំបូង ប៉ុណ្ណោះទេថែមទាំងសងសឹកបានសម្រេចផងដែរ ខណៈកាលពីឆ្នាំ២០១៥ ពួកគេបានចាញ់ក្រុមកម្ពុជា ៣-១ ។
សម្រាប់ការប្រកួតពីរគូដំបូងនៅក្នុងពូលB ក្រុមU22វៀតណាម បានយកឈ្នះក្រុមU22ទីម័រខាងកើត៤-០ ។ ៤គ្រាប់នេះរកបានដោយកីឡាករ Doan Van Hau ២គ្រាប់ម្នាក់ឯង និងកីឡាករ Ha Duc Chinh និង Nguyen Cong Phuong រកបានម្នាក់១គ្រាប់ ។ រីឯក្រុមU22ឥណ្ឌូណេស៊ី ស្មើក្រុមU22ថៃ ១-១ ដែល១គ្រាប់នាំមុខដំបូងរកបានដោយកីឡាករថៃ Chaiyawat Buran នៅតង់ទី១ ហើយកីឡាករឥណ្ឌូណេស៊ី Septian David រកបាន១គ្រាប់តាមស្មើវិញនៅតង់ទី២តាមរយៈការទាត់បាល់ពិន័យប៉េណាល់ទី ។
យោងតាមលទ្ធផលខាងលើបង្ហាញឱ្យឃើញថា ក្រុមU22កម្ពុជា ហាក់ចាញ់ប្រៀបក្រុមU22វៀតណាមបន្តិចតែអ្នកគាំទ្រសង្ឃឹមថា ក្រុមU22កម្ពុជា នឹងធ្វើបានល្អជាងមុនមិនខានក្នុងជំនួបជាមួយក្រុមU22វៀតណាមនៅថ្ងៃព្រហស្បតិ៍ ទី១៧ ខែសីហា មុនជំនួបរវាងក្រុមU22 ឥណ្ឌូណេស៊ី និងក្រុមU22ហ្វ៊ីលីពីន និងជំនួបរវាងក្រុមU22ថៃ និងក្រុមU22 ទីម័រខាងកើត ៕
ចែករំលែកព័តមាននេះ