យោងតាមប្រភពព័ត៌មានក្នុងស្រុកថា នារីអត្តឃា.ត៣នាក់ កាលពីថ្ងៃទី១៥ សីហា បានបំផ្ទុះគ្រាប់បែកដាក់ជាប់ខ្លួនពួកគេនៅទីក្រុងមួយស្ថិតនៅចម្ងាយ២៥គីឡូម៉ែត្រ ពីទីក្រុង
ប្រទេសនីហ្សេរីយ៉ា ៖ យោងតាមប្រភពព័ត៌មានក្នុងស្រុកថា នារីអត្តឃាត៣នាក់ កាលពីថ្ងៃទី១៥ សីហា បានបំផ្ទុះគ្រាប់បែកដាក់ជាប់ខ្លួនពួកគេនៅទីក្រុងមួយស្ថិតនៅចម្ងាយ២៥គីឡូម៉ែត្រ ពីទីក្រុង MAIDUGURI រដ្ឋធានីនៃរដ្ឋប័រណូ ភាគឦសាននីហ្សេរីយ៉ា បណ្តាលឱ្យមនុស្សស្លាប់២៨នាក់ និងរបួសជាង៨០នាក់ ។
លោក BABA KURA សមាជិកកងជីវពលស៊ីវិល ដែលតស៊ូប្រឆាំងក្រុមជីហាដ បូកូហារ៉ាម រៀបរាប់ថា នារីអត្តឃាត៣នាក់ បានបំផ្ទុះគ្រឿងផ្ទុះនៅចង្កេះពួកគេក្បែរច្រកចូលជំរំជនភៀសខ្លួននៅទីក្រុង MANDARARI បណ្តាលឱ្យមនុស្សស្លាប់២៨នាក់ និងរបួស៨២នាក់ ។ នារីអត្តឃាតទីមួយបានធ្វើឱ្យផ្ទុះនាវេលាម៉ោង១៨ម៉ោងក្នុងស្រុកក្នុងផ្សារ ដែលស្ថិតនៅត្រង់ច្រកចូលជំរំ ។ ពេលនោះមានការជ្រួលច្របល់ ហើយពួកអ្នកលក់ដូរនាំគ្នាបិទហាង នារីអត្តឃាត២នាក់ទៀតបានបំផ្ទុះគ្រាប់បែកដាក់ជាប់ខ្លួនពួកគេ បណ្តាលឱ្យមនុស្សស្លាប់ និងរបួសច្រើន ។
លោក IBRAHIM LIMAN ប្រមុខមួយរូបនៃកងជីវពលស៊ីវិលអះអាងពីការវាយប្រហារអត្តឃាតទាំង៣នេះ ដោយនិយាយថា អ្នករបួសជាង៨០នាក់ ត្រូវបញ្ជូនទៅកាន់មន្ទីរពេទ្យក្រុង MAIDUGURI ជាទីក្រុងធំនាភាគឦសាននីហ្សេរីយ៉ា ។
ពួកជីហាដក្រុមបូកូហារ៉ាមជាក្រុមវាយប្រហារ និងសម្លាប់រង្គាលក្នុងតំបន់បឹងឆាដ បានធ្វើចលនាបះបោរបណ្តាលឱ្យមនុស្សស្លាប់ជាង២០.០០០នាក់ ហើយមនុស្ស២,៦លាននាក់ រត់ភៀសខ្លួនចាប់តាំងពីពួកជ្រុលនិយមនេះកាន់អាវុធតស៊ូពីឆ្នាំ២០០៩មក ៕
ចែករំលែកព័តមាននេះ