រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា រាជរដ្ឋាភិបាលនឹងផ្តល់ទុនបង្វិលចំនួន៥០លានដុល្លារដល់វិស័យឯកជន ដើម្បីប្រមូលទិញស្រូវពីកសិករ ហើយរាជរដ្ឋាភិបាលនឹងផ្តល់ទុនបន្ថែមទៀត ប្រសិនបើការប្រមូលទិញស្រូវនៅតែមានតម្រូវការ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក វង្សី វិស្សុត បានលើកឡើងនៅក្នុងកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ស្តីពី យន្តការអន្តរាគមន៍របស់រាជរដ្ឋាភិបាល ក្នុងការប្រមូលទិញស្រូវសម្រាប់ឆ្នាំ២០១៧ និងឆ្នាំ២០១៨ នៅទីស្តីការក្រសួង នាថ្ងៃទី១៤ សីហាថា សម្រាប់គោលការណ៍នៃការប្រមូលទិញស្រូវដើម្បីជួយលើកស្ទួយថ្លៃស្រូវរបស់ប្រជាកសិករកម្ពុជា រាជរដ្ឋាភិបាលនឹងបង្កើនតាមរយៈការអន្តរាគមន៍កញ្ចប់ថវិកាជាច្រើន ក្នុងនោះសម្រាប់គម្រោងការបង្កើតឡសម្ងួត គឺមានទំហំទឹកប្រាក់ពី១៥ ទៅ៣០លានដុល្លារអាមេរិក ។ មកដល់ពេលនេះ សម្រាប់កញ្ចប់ថវិកា១៥លានដុល្លារ គឺយើងបានយកទៅអភិវឌ្ឍនៅក្នុងខេត្តបាត់ដំបង និងកំពង់ធំរួចហើយ ។ ជាមួយគ្នានេះ រាជរដ្ឋាភិបាលនឹងជំរុញឲ្យបង្កើតគ្រោងឡសម្ងួតចំនួន៣កន្លែងទៀត គឺនៅក្នុងខេត្តព្រៃវែង កំពង់ធំ និងតាកែវផងដែរ ។
លោករដ្ឋលេខាធិការ ក៏បានអំពាវនាវដល់អាជ្ញាធរនៅតាមបណ្តាខេត្តទាំងអស់ត្រូវចូលរួមផ្សព្វផ្សាយ និងជំរុញការប្រមូលទិញស្រូវឲ្យមានតម្លាភាព ជាពិសេស ចូលរួមលុបបំបាត់ឲ្យអស់លើករណីទារលុយខុសច្បាប់ ខណៈរាជរដ្ឋាភិបាលកំពុងជំរុញយកចិត្តទុកដាក់យ៉ាងខ្លាំងលើការប្រមូលទិញស្រូវនៅក្នុងគម្រោងផែនការឆ្នាំ២០១៧-២០១៨ ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានថ្លែងថា ការបញ្ចេញទុនរបស់រាជរដ្ឋាភិបាល ដើម្បីដោះស្រាយបញ្ហាតម្លៃកសិផលនានា គឺអាចជួយវិស័យនេះរយៈពេលខ្លី មិនបានរយៈពេលវែងទេ ដោយសារកសិកម្ម វាជាបញ្ហាជាប់ជាប្រព័ន្ធរាប់តាំងពីតម្លៃដើមនៃការដាំដុះ សមត្ថភាពផលិត សមត្ថភាពកែច្នៃ និងទីផ្សារដែលអាចស្រូបយកផលិតផលកសិកម្មទាំងនោះ ។ ឧទាហរណ៍ ពោត គឺមានរោងចក្រផលិតចំណីសត្វតែប៉ុន្មានប៉ុណ្ណោះដែលមានតម្រូវការ ។ លោកបន្តថា បញ្ហាគ្រប់គ្រងព័ត៌មានទីផ្សារទាក់ទងនឹងតម្រូវការ និងការផ្គត់ផ្គង់ ក៏មិនទាន់រៀបចំឲ្យបានសុក្រឹតនៅឡើយ ។ ជាក់ស្តែង ពេលលោកចុះស្រាវជ្រាវនៅតាមមន្ទីរកសិកម្មក្នុងខេត្តមួយចំនួន គឺមន្ត្រីទាំងនោះគ្មានព័ត៌មានបច្ចុប្បន្នភាពទាក់ទងនឹងផ្ទៃដី ទំហំនៃការផលិត និងបរិមាណទេ ហើយឈ្មួញទិញកសិផល ក៏គ្មានព័ត៌មានទីផ្សារច្បាស់លាស់ផងដែរ ។
លោកបន្តថា ៖« រដ្ឋាភិបាលគួរបង្កើតឲ្យមានព័ត៌មានទីផ្សារមានសុក្រឹតភាព ដើម្បីដឹងពីស្ថានភាពទីផ្សារ បរិមាណនៃការផ្គត់ផ្គង់ និងតម្រូវការផលិតផលកសិកម្ម ព្រោះយើងអាចគ្រប់គ្រងព័ត៌មានទីផ្សារបាន ទាល់តែយើងមានព័ត៌មាននៅក្នុងដៃ » ។ លោកបន្តថា ៖« បញ្ហាធំ គឺសមត្ថភាពនៃការកែច្នៃរបស់យើងនៅមានកម្រិត និងការគ្រប់គ្រងព័ត៌មានទីផ្សារមិនទាន់បាន » ។
ទោះជាយ៉ាងណា លោកឧកញ៉ា សុង សារ៉ន អគ្គនាយកក្រុមហ៊ុននាំចេញអង្ករ AMRU RICE បានថ្លែងថា ការផ្តល់ឥណទានរបស់រាជរដ្ឋាភិបាលឆ្នាំនេះល្អប្រសើរជាងឆ្នាំមុន ដោយសារអត្រាការប្រាក់ធ្លាក់ចុះ លក្ខខណ្ឌនៃការផ្តល់ឥណទានសមស្រប និងបត់បែនតាមសភាពជាក់ស្តែង ការផ្តល់ទាន់ពេលវេលា និងស្របតាមពេលវេលាតម្រូវ ។ លោកបន្តថា ប្រសិនជាការផ្តល់ឥណទានយឺត គ្មានអ្នកណាហ៊ានទិញទេ ព្រោះកសិករផលិតបានច្រើន ដែលអាចធ្វើឲ្យតម្លៃកសិផលធ្លាក់ចុះ ។
លោកបន្តថា ៖« ទោះជាយ៉ាងណា ឥណទានទាំងនេះមិនបានផ្តល់សម្រាប់អ្នកទិញស្រូវស ធម្មតាទេ គឺផ្តល់ឥណទានសម្រាប់តែស្រូវក្រអូបសម្រាប់នាំចេញប៉ុណ្ណោះ » ។
លោកបន្តថា ៖«រដ្ឋាភិបាលគួរជួយចរចាជាមួយរដ្ឋាភិបាលចិនបន្ថែមទៀត ដើម្បីឲ្យប្រទេសចិនជួយទិញអង្ករ «ស» ធម្មតារបស់កម្ពុជា ព្រោះបច្ចុប្បន្ន ចិនទិញតែអង្ករក្រអូបប៉ុណ្ណោះ » ៕
ចែករំលែកព័តមាននេះ