រាជធានីភ្នំពេញ ៖ អាចជាដំណឹងល្អជាថ្មីសម្រាប់កម្ពុជា ព្រោះដំណក់ប្រេងដែលប្រជាពលរដ្ឋទន្ទឹងរង់ចាំជាយូរមកហើយ អាចនឹងទទួលបាននៅឆ្នាំ២០២០ខាងមុខនេះ បន្ទាប់ពីរាជរដ្ឋាភិបាលផ្តល់លិខិតអនុញ្ញាតឲ្យក្រុមហ៊ុន Kris Energy ចាប់ផ្តើមផលិតកម្មរបស់ខ្លួន ។
អគ្គនាយកនៃអគ្គនាយកដ្ឋានប្រេងកាតកម្ពុជា និងជាអ្នកនាំពាក្យក្រសួងរ៉ែ និងថាមពលលោក ជាប សួរ បានថ្លែងតាមទូរស័ព្ទនៅព្រឹកថ្ងៃទី៩ សីហាថា ក្នុងចំណោមប្លុកប្រេងទាំង៦របស់កម្ពុជា ដែលមានទីតាំងនៅក្នុងសមុទ្រមានតែប្លុកA មួយប៉ុណ្ណោះមានសកម្មភាព ដែលកំពុងរៀបចំដោយក្រុមហ៊ុន Kris Energy ។ រហូតមកទល់ពេលនេះ ការបែងចែកភាគលាភរវាងរាជរដ្ឋាភិបាល និងក្រុមហ៊ុននេះបានបញ្ចប់ហើយ ។ លោកបន្តថា រាជរដ្ឋាភិបាលនឹងចេញលិខិតអនុញ្ញាតឲ្យក្រុមហ៊ុននេះចាប់ផ្តើមធ្វើអាជីវកម្មនៅពេលឆាប់ៗ ហើយបន្ទាប់ពីទទួលបានលិខិតអនុញ្ញាត ក្រុមហ៊ុនត្រូវការពេលវេលារយៈពេល២៦ខែដើម្បីចាប់ផ្តើមសកម្មភាពទាញយកប្រេង ។
លោកបន្តថា ៖« រហូតមកទល់ពេលនេះ ក្រុមហ៊ុន និងរាជរដ្ឋាភិបាលបានចរចាត្រូវគ្នាអស់ហើយ ។ យើងសង្ឃឹមថា នៅឆ្នាំ២០២០ខាងមុខ កម្ពុជានឹងទទួលបានដំណក់ប្រេងដំបូងរបស់ខ្លួន » ។ លោកបន្តថា ៖« ប្រសិនជាតម្លៃប្រេងនៅទីផ្សារអន្តរជាតិបន្តធ្លាក់ចុះ អ្វីៗអាចប្រែប្រួល ព្រោះអ្វីដែលរាជរដ្ឋាភិបាលខិតខំកន្លងមក គឺមកពីយើងមិនទាន់មានសំណាងទទួលបាន » ។
នៅពេលលើកឡើងពីបរិមាណប្រេងនឹងទទួលបាន លោក ជាប សួរ បានថ្លែងថា អ្វីៗវាទាមទារការធ្វើផលិតកម្មសិន ទើបអាចដឹងថា ទទួលបានបរិមាណប្រេងកម្រិតណា។
កម្ពុជាមិនត្រឹមតែមានប្លុកប្រេងតែក្នុងសមុទ្រនោះទេ ប៉ុន្តែប្រទេសនេះក៏មានប្លុកប្រេងនៅលើគោកចំនួន១៩ប្លុកផងដែរ ដែលមិនទាន់មានការស្រាវជ្រាវនៅឡើយទេ គឺមានតែមួយប្លុកប៉ុណ្ណោះ ដែលបាននិងកំពុងចាប់ផ្តើមធ្វើសកម្មភាពស្រាវជ្រាវដោយក្រុមហ៊ុន Petro Vietnam មានទីតាំងស្ថិតនៅតំបន់ប្រសព្វគ្នារវាងខេត្តចំនួន៣ គឺខេត្ត កំពង់ធំ ព្រះវិហារ និងសៀមរាប ។ នេះបើតាមការបញ្ជាក់ពីលោក ជាប សួរ ។
លោកបន្តថា ចំណែកប្លុកប្រេងនៅដែនសមុទ្រ ក្រៅពីតំបន់ប្លុកA គឺមិនទាន់មានការស្រាវជ្រាវរកឃើញនៅតំបន់ណានៅឡើយទេ។ ចំណែកតំបន់ត្រួតស៊ីគ្នាជាមួយប្រទេសថៃ ដែលមានចំនួន៤តំបន់ គឺរាជរដ្ឋាភិបាលប្រទេសទាំងពីរមិនទាន់បានចរចា ឬដោះស្រាយចេញនៅឡើយ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ក្នុងស្ថានភាពបច្ចុប្បន្ន តម្លៃប្រេងនៅលើពិភពលោកបានធ្លាក់ចុះ ដែលធ្វើឲ្យតម្លៃ និងបរិមាណទទួលបានមានចំនួនតិច ។ វាអាចធ្វើឲ្យផលិតកម្មប្រេងរួមតូច ប៉ុន្តែធម្មតា ប្រទេសណាមានធនធានធម្មជាតិ មិនថារ៉ែ ឬធនធានអ្វីទេ គឺជាធនធានសំខាន់សម្រាប់កសាងជាតិហើយ ដែលទាមទារឲ្យរាជរដ្ឋាភិបាលចាត់ចែងធនធានទាំងនោះឲ្យមានប្រសិទ្ធភាព ។
លោកបន្តថា ៖« យើងមានយន្តការ និងចំណុចជាច្រើនត្រូវកែលម្អ ទាំងក្របខ័ណ្ឌច្បាប់ និងគ្រប់គ្រងធនធានទាំងនោះឲ្យមានប្រសិទ្ធភាព ដើម្បីកុំឲ្យដូចប្រទេសមួយចំនួនទាញបានធនធានប្រេងកាតដែរ តែត្រូវបណ្តាសាប្រេងកាត ព្រោះថវិកាបានមក មិនបានដាក់ចូលជាតិ » ។
លោកបន្តថា ៖« កម្ពុជាត្រូវមានចំណុចកែលម្អច្រើន ហើយការពន្យារពេលនេះ ក៏ជាឱកាសរៀបចំយន្តការឲ្យបានល្អប្រសើរ ដើម្បីកុំឲ្យពេលយើងយកបានធនធានប្រេងហើយ យើងសប្បាយចិត្តបានតែរយៈពេលខ្លី ដោយសារមិនបានកៀរគរចំណូលចូលថវិកាជាតិ ដែលធ្វើឲ្យធនធានធម្មជាតិក៏ត្រូវបាត់បង់ និងឱកាសកសាងជាតិក៏មិនមាន» ៕
ចែករំលែកព័តមាននេះ