ប្រទេសអេហ្ស៊ីប ៖ តុល្យការនៃគ្រោះថ្នាក់រថភ្លើង២បុកគ្នានៅខេត្តអាឡិចសាន់ឌ្រី អេហ្ស៊ីប កាលពីថ្ងៃទី១១ សីហា បើតាមទូរទស្សន៍រដ្ឋថា អ្នកស្លាប់ឡើងដល់៤៩នាក់ ។
ក្រសួងសុខាភិបាលអេហ្ស៊ីបរាយការណ៍នាពេលមុននេះថា មនុស្ស៣៦នាក់ស្លាប់ ហើយជាង១២០នាក់រងរបួសក្នុងការបុកគ្នារវាងរថភ្លើងទាំង២នេះ នៅភាគខាងកើតនៃទីក្រុងជាប់មាត់សមុទ្រអាឡិចសាន់ឌ្រី ។ ក្រសួងនេះវាយតម្លៃថា ចំនួនអ្នកស្លាប់អាចកើនថែម ព្រោះមនុស្សជាច្រើនរងរបួសធ្ងន់ ។
រថភ្លើងដែលរត់រវាងទីក្រុងគែរ និងទីក្រុងអាឡិចសាន់ឌ្រី បានបុកជាមួយរថភ្លើងមួយទៀត ដែលរត់រវាងទីក្រុង PORT SAID និងក្រុងអាឡិចសាន់ឌ្រី ។ គ្រោះថ្នាក់នេះកើតមាននៅតំបន់ KOURSHID ភាគខាងកើតទីក្រុងអាឡិចសាន់ឌ្រី ។ អគ្គរដ្ឋអាជ្ញាអេហ្ស៊ីបបានចេញបញ្ជាឱ្យធ្វើការស៊ើបអង្កេតជាបន្ទាន់មួយ ដើម្បីកំណត់បណ្តាអ្នកទទួលខុសត្រូវលើគ្រោះថ្នាក់ដ៏សែនទារុណនេះ ។
ប្រធានាធិបតីអេហ្ស៊ីប លោកអាប់ដែលហ្វាតតាហ៍ អាល់ស៊ីសស៊ី ស្នើឱ្យធ្វើអ្វីគ្រប់យ៉ាងវែកមុខអ្នកទទួលខុសត្រូវ ។
កាលពីឆ្នាំ២០១៣ មនុស្សយ៉ាងតិច១៩នាក់បានត្រូវស្លាប់ ដោយសាររថភ្លើងមួយខ្សែធ្លាក់ពីផ្លូវដែកនៅទីក្រុង GIZEH ហើយការបុកគ្នារវាងរថភ្លើងមួយគ្រឿង និងរថយន្តបឺសដឹកសិស្សមួយកាលពីឆ្នាំ២០១២ នៅតំបន់ HAUTE-EGYPTE បណ្តាលឱ្យមនុស្សស្លាប់៥១នាក់ ភាគច្រើនជាកុមារ ៕
ចែករំលែកព័តមាននេះ