ក្រុមអ្នកវិទ្យាសាស្ត្រប្រេស៊ីលបាននិយាយថាខួរក្បាលរបស់ស្ត្រីវ័យចំណាស់ដែលបានហាត់យោហ្គានៅតំបន់ដែលទាក់ទងនឹងការប្រុងប្រយ័ត្ន និងការចងចាំ មានន័យថាការហាត់យោហ្គាអាចជាវិធីទប់ស្កាត់ការថយចុះនៃការយល់ដឹងដែលមានការទាក់ទងជាមួយនឹងការវិវឍ្ឍទៅរកភាពចាស់ ។
នៅពេលដែលយើងកាន់តែចាស់ ខួរក្បាលរបស់យើងនឹងប្រែប្រួល ។ ការប្រែប្រួលនេះរួមទាំងការប្រែប្រួលខួរក្បាលដែលវាទាក់ទងការថយចុះនៃការយល់ដឹង ។
តើយោហ្គាជួយខួរក្បាលបានយ៉ាងដូចម្តេច? លោកស្រី Elisa Kozasa នៃមន្ទីរពេទ្យ Israelita Albert Einstein ក្នុងទីក្រុង São Paulo នៃប្រទេសប្រស៊ីលពន្យល់ថា ៖ «វាដូចគ្នាទៅនឹងសាច់ដុំដែរ ខួរក្បាលរបស់យើងមានការរីកចម្រើនតាមរយៈការហ្វឹកហាត់ ។
ការហាត់យោហ្គាដូចនឹងការអនុវត្ត ផ្សេងៗដែរ វាមានសមាសធាតុដែលអាចជួយខួរក្បាលទាក់ទងនឹងសមត្ថភាពនៃការយល់ និងការប្រុងប្រយ័ត្ន » ។
ការស្រាវជ្រាវពីមុនបានបង្ហាញថាយោហ្គាមានអត្ថប្រយោជន៍ជាច្រើនដល់សុខភាពជាងការធ្វើលំហាត់ប្រាណបែបដទៃទៀត ហើយអ្នកហាត់យោហ្គាបានបង្ហាញឲ្យឃើញថាពួកគេមានភាពប្រសើឡើងចំពោះការយល់ដឹង ការយកចិត្តទុកដាក់ និងការចងចាំ ។ មនុស្សវ័យចំណាស់ដែលមានការប៉ះពាល់ផ្នែកខួរក្បាលតិចតួចក៏បានបង្ហាញឲ្យឃើញពីភាពប្រសើរឡើងផងដែរបន្ទាប់ពីបានហាត់យោហ្គារយៈពេលខ្លី ។
ការស្រាវជ្រាវ ថ្មីៗផ្សេងទៀតបានរកឃើញថាយោហ្គាផ្តល់អត្ថប្រយោជន៍ជាច្រើនដល់សុខភាព ។ ការស្រាវជ្រាវមួយដែលបានចេញផ្សាយនៅក្នុងព្រឹត្តបត្រ The Journal of Alternative and Complementary Medicine បានរកឃើញថាការហាត់យោហ្គារួមផ្សំជាមួយនឹងការណែនាំអំពីការដកដង្ហើម វែងៗជួយកាត់បន្ថយរោគសញ្ញារបស់អ្នកដែលមានជំងឺបាក់ទឹកចិត្ត ។
យោងតាមការសិក្សាមួយពីសាកលវិទ្យាល័យ Johns Hopkins បានឱ្យដឹងថាយោហ្គាក៏ជាវិធីប្រកបដោយសុវត្ថិភាព និងប្រសិទ្ធភាពសម្រាប់អ្នកដែលមានជំងឺរលាកសន្លាក់ ។ ក្រុមអ្នកស្ម័គ្រចិត្ត៧៥នាក់ដែលមានទម្រង់នៃជំងឺរលាកសន្លាក់ទូទៅទាំង២ គឺជំងឺរលាកឆ្អឹងសន្លាក់ជង្គង់ និងជំងឺរលាកសន្លាក់ម្រាមដៃបានចូលរួមក្នុងក្រុមមិនហាត់យោហ្គា និងក្រុមដែលហាត់យោហ្គា២ដងប្រចាំសប្តាហ៍បូករួមទាំងការហាត់១ដងក្នុង១សប្តាហ៍នៅឯផ្ទះ ។
បន្ទាប់ពីរយៈពេល៨សប្តាហ៍ អ្នកដែលស្ថិតក្នុងក្រុមយោហ្គា ការឈឺចាប់របស់ពួកគេ និងសមត្ថភាពក្នុងការធ្វើសកម្មភាពប្រចាំថ្ងៃបានប្រសើរឡើង២០% បើប្រៀបធៀបទៅនឹងក្រុមដែលមិនបានហាត់ ៕
ចែករំលែកព័តមាននេះ