ខេត្តកំពង់ឆ្នាំង ៖ យុវជនពិការម្នាក់ បានលង់ទឹកក្នុងធុងស្លាប់មួយយប់ទល់ភ្លឺ ទើបមានការភ្ញាក់ផ្អើល ។ ហេតុការភ្ញាក់ផ្អើលនេះ បានកើតឡើងនៅវេលាម៉ោង0៩និង៣០នាទីព្រឹក ថ្ងៃទី១១ ខែសីហា ឆ្នាំ២០១៧ នៅចំណុចផ្សារឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ខណៈឪពុកម្តាយ ចុះទៅដងទឹកប្រទះឃើញកូន ។
បុរសជាឪពុកឈ្មោះ ងិន ផល្លា និងម្តាយឈ្មោះ ភី មានទីលំនៅក្នុងភូមិឃុំកើតហេតុខាងលើ បានឲ្យដឹងថា ៖ កូនប្រុសរបស់គាត់ឈ្មោះ ផៃ បញ្ញា អាយុ២៤ឆ្នាំ ហើយកូនប្រុសរបស់គាត់នេះ មានជម្ងឺស្គន់ និងពិការ (ទន់ជើង) តាំងតែពីកំណើត ។
នៅថ្ងៃកើតហេតុ គាត់បាននាំប្តីរបស់គាត់ មកពិនិត្យជម្ងឺទៅមន្ទីរពេទ្យបង្អែកខេត្តកំពង់ឆ្នាំង និងសម្រាកនៅទីនោះមួយយប់ ដោយទុកឲ្យកូនប្រុសរងគ្រោះនៅផ្ទះម្នាក់ឯង លុះព្រឹកឡើងថ្ងៃទី១១ ខែសីហា ឆ្នាំ២០១៧ ម៉ោងប្រហែល០៩ព្រឹក ពួកគាត់បានត្រលប់មកវិញ ពេលមកដល់ផ្ទះ ក៏បានឃើញកូនប្រុសរបស់ពួកគាត់ដាំក្បាលចូលក្នុងធុង ដែលមានទឹកឈ្លក់ស្លាប់បាត់ទៅហើយ មិនដឹងថាស្លាប់ពីពេលណាមកនោះទេ បន្ទាប់មកក៏បានរាយការណ៍មកសមត្ថកិច្ច ដើម្បីពិនិត្យសាកសព ។
តាមការចុះធ្វើកោសល្យវច្ឆ័យរបស់សមត្ថកិច្ចមូលដ្ឋាន បានអោយដឹងថា ៖ ជនរងគ្រោះអាចពេលទៅឱនដងទឹកក្នុងធុង បានផុតជើង ដាំក្បាលចូលក្នុងធុងឈ្លក់ទឹករហូតដល់ស្លាប់ គ្មានអ្នកដឹង រហូតមួយយប់ទល់ភ្លឺ លុះព្រឹកឡើងទើបភ្ញាក់ផ្អើល ៕
ចែករំលែកព័តមាននេះ