ការធ្លាក់ចុះនៃការបំបៅកូនដោយទឹកដោះម្តាយនៅកម្ពុជា តាមការអង្កេតរបស់ថ្នាក់ជាតិ ក្នុងឆ្នាំ២០១៤បានបង្ហាញថា អត្រានៃការបំបៅកូនដោយទឹកដោះម្តាយនៅកម្ពុជា ធ្លាក់ចុះយ៉ាងខ្លាំង សល់ត្រឹមតែ
ការធ្លាក់ចុះនៃការបំបៅកូនដោយទឹកដោះម្តាយនៅកម្ពុជា តាមការអង្កេតរបស់ថ្នាក់ជាតិ ក្នុងឆ្នាំ២០១៤បានបង្ហាញថា អត្រានៃការបំបៅកូនដោយទឹកដោះម្តាយនៅកម្ពុជា ធ្លាក់ចុះយ៉ាងខ្លាំង សល់ត្រឹមតែ៦៥%ប៉ុណ្ណោះ ពិសេសក្នុងតំបន់ទីប្រជុំជនធ្លាក់ចុះជាងនៅទីជនបទ ។ នេះបើតាមការអះអាងរបស់លោកហ៊ូ ក្រើន នាយករងនៃអង្គការហេឡែ ខេលល័រ អន្តរជាតិប្រចាំកម្ពុជា(HKI) និងជាអ្នកសម្របសម្រួល នៃសម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា (SUN CSA-CAMBODIA) ។
នាយករងនៃអង្គការហេឡែ ខេលល័រ អន្តរជាតិប្រចាំកម្ពុជា(HKI)ឲ្យដឹងថា ក្នុង ១ឆ្នាំៗកម្ពុជាត្រូវខាតបង់ប្រាក់ប្រមាណជាង២០លានដុល្លារជារៀងរាល់ឆ្នាំ ដោយសារតែការធ្លាក់ចុះនៃការបំបៅកូនដោយទឹកដោះម្តាយ ។ មូលហេតុចំបងនៃការធ្លាក់ចុះនេះបណ្តាលមកពីកត្តាមួយចំនួនដូចជា ការងារ ពេលវេលានៃការប្រកបរបររកស៊ីប្រចាំថ្ងៃរបស់ស្ត្រីជាម្តាយ និងការវាយលុកពីទីផ្សារបស់ម្សៅទឹកដោះគោសិប្បនិមិត្ត ដែលបាន និងកំពុងធ្វើឲ្យមហោជនភ័ន្តច្រឡំ រវាងសារប្រយោជន៍របស់ទឹកដោះម្តាយ ដូច្នេះហើយទើបមានការធ្លាក់ចុះ ។
បើតាមការប៉ាន់ប្រមាណរបស់លោកហ៊ូ ក្រើន ថា ក្នុងទីក្រុងភ្នំពេញការបំបៅកូនដោយទឹកដោះគោសប្បនិមិត្តកើនឡើងរហូតដល់៥០% ហើយអាចនឹងកើនឡើងច្រើនជាងនេះនាពេលខាងមុខដោយសារតែការងារ និងការយល់ច្រឡំចំពោះទឹកដោះម្តាយ និងទឹកដោះគោសិប្បនិមិត្ត ។ ការបំបៅទឹកដោះសិប្បនិមិត្ត មានគ្រោះថ្នាក់ដល់ទារក ពិសេសបើសិនជាអ្នកម្តាយមិនមានអនាម័យចំពោះសម្ភារបំបៅកូន ឬក៏ប្រើប្រាស់ម្សៅទឹកដោះសិប្បនិមិត្ត ពុំបានសមស្រប អាចធ្វើឲ្យប៉ះពាល់ដល់សុខភាពធ្ងន់ និងអាចប្រឈមទៅនឹងជំងឺមួយចំនួននាពេលអនាគតដូចជា រាករូស ធាត់លើសទម្ងន់ជំងឺទឹកនោមផ្អែម និងជំងឺក ផ្សេងៗទៀត ។
ដើម្បីចៀសផុតពីបញ្ហាដែលអាចប្រឈមទាំងនោះ អ្នកម្តាយគ្រប់រូបគួរតែបំបៅកូនដោយទឹកដោះតែមួយមុខគត់រាប់ចាប់ពីពេលកើតរហូតដល់៦ខែ ។ អ្វីដែលល្អជានេះគួរតែបន្តបំបៅកូនដោយទឹកដោះម្តាយឱ្យបានលើសពី២ឆ្នាំទើបជាការប្រសើរ ។
តាមការសិក្សាស្រាវជ្រាវរបស់អ្នកវិទ្យាសាស្ត្រថា ការបំបៅកូនដោយទឹកដោះក្នុងអំឡុងពេលសម្រាលបាន១ម៉ោងដំបូងអាចកាត់បន្ថយអត្រាមរណភាពរបស់ទារករហូតដល់២០% និងអាចកាត់បន្ថយនូវជំងឺ ផ្សេងៗបានរហូតដល់១៥% ។ ការបំបៅកូនដោយទឹកដោះម្តាយគឺមានសារប្រយោជន៍ណាស់សម្រាប់់ទារកក្នុងការលូតលាស់ផ្នែកបញ្ហា និងស្មារតីបានយ៉ាងល្អ ព្រោះតែទឹកដោះម្តាយគឺជាឱសថទិព្វសម្រាប់ទារក និងកុមារ ៕
ចែករំលែកព័តមាននេះ