កំណែទម្រង់លើវិស័យកាត់ដេរកាន់តែប្រសើរ ប៉ុន្ដែ…
រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា ហៅកាត់ថា (GMAC) បានសម្តែងការយល់ស្របតាមមតិលើកឡើងរបស់ឯកអគ្គរដ្ឋទូតកាណាដាប្រចាំកម្ពុជា ស្តីពីកំណែទម្រង់របស់
រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា ហៅកាត់ថា (GMAC) បានសម្តែងការយល់ស្របតាមមតិលើកឡើងរបស់ឯកអគ្គរដ្ឋទូតកាណាដាប្រចាំកម្ពុជា ស្តីពីកំណែទម្រង់របស់រាជរដ្ឋាភិបាល ដែលបានធ្វើក្នុងរយៈពេលប៉ុន្មានឆ្នាំថ្មីៗនេះលើការសម្រួលពាណិជ្ជកម្មសម្រាប់ការនាំចេញ និងការធ្វើទំនើបកម្មការងារ ។ ប៉ុន្តែសមាគមនេះបាននិយាយថា នៅមានការងារមួយចំនួនទៀតទាមទារឲ្យមានការកែលម្អ ។
ការឆ្លើយតបរបស់ GMAC បានធ្វើឡើងបន្ទាប់ពីកិច្ចប្រជុំរវាងរដ្ឋលេខាធិការនៃក្រសួងពាណិជ្ជកម្ម លោក ឱក ប៊ុង និងលោកជំទាវ ប៉ូទី ដូនីកា (Pottie Donica) ឯកអគ្គរដ្ឋទូតកាណាដាប្រចាំកម្ពុជា កាលពីថ្ងៃ៧ សីហា កន្លងមក នៅទីស្ដីការក្រសួងពាណិជ្ជកម្ម ។
ក្នុងជំនួបនោះ លោកជំទាវឯកអគ្គរដ្ឋទូតកាណាដា បានសម្តែងនូវការកោតសរសើរចំពោះការកែទម្រង់វឌ្ឍនភាព ដែលបានអនុវត្តដោយក្រសួងពាណិជ្ជកម្ម ការធ្វើស្វ័យប្រវត្តិកម្មវិញ្ញាបនបត្របញ្ជាក់ប្រភពដើម (C/O) និងការអនុវត្តកិច្ចព្រមព្រៀងសម្របសម្រួលពាណិជ្ជកម្ម (TFA) ដែលជាការផ្លាស់ប្តូរមួយនាំឱ្យកម្ពុជាក្លាយជាប្រទេសលេចធ្លោបំផុតក្នុងចំណោមបណ្តាប្រទេសអភិវឌ្ឍន៍តិចតួច (LDCs) ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជា បានទទួលស្គាល់ពីការកែលម្អនៃកំណែទម្រង់ ដែលធ្វើឡើងដោយក្រសួងពាណិជ្ជកម្មរយៈពេលប៉ុន្មានឆ្នាំកន្លងមក ក្នុងការធ្វើទំនើបកម្មនៃការសម្រួលពាណិជ្ជកម្ម ការចេញវិញ្ញាបនបត្របញ្ជាក់ប្រភពដើម និងការកាត់បន្ថយការចំណាយមិនចាំបាច់ ដើម្បីធ្វើឱ្យបរិយាកាសធុរកិច្ចកាន់តែប្រសើរឡើង ។
លោក កាំង ម៉ូនីកា បានមានប្រសាសន៍ថា ៖« GMAC ទទួលស្គាល់អំពីកិច្ចខិតខំប្រឹងប្រែងកែទម្រង់ដោយក្រសួងពាណិជ្ជកម្ម ហើយយើងសូមកោតសរសើរចំពោះការធ្វើឲ្យកាន់តែមានភាពងាយស្រួលនៃនីតិវិធី និងការធ្វើទំនើបកម្មនានា ជាពិសេស ការស្នើធ្វើស្វ័យប្រវត្តិកម្មវិញ្ញាបនបត្របញ្ជាក់ប្រភពដើម (CO) »
« ប្រព័ន្ធអនឡាញ គឺជាមធ្យោបាយមួយដើម្បីកាត់បន្ថយការចំណាយ និងជួយសន្សំសំចៃពេលវេលាទៅមុខ ។ វាកាត់បន្ថយចំណុចប្រទាក់របស់មនុស្ស និងកាត់បន្ថយឱកាសសម្រាប់ការបង់ប្រាក់ក្រៅផ្លូវការ » ។ នេះជាការថ្លែងអះអាងរបស់លោក ។
យ៉ាងណាក៏ដោយ លោកបាននិយាយថា ទោះបីជាកិច្ចប្រឹងប្រែងរបស់ក្រសួងដែលបានធ្វើរួចហើយក៏ដោយ ក៏សមាគម GMAC យល់ឃើញថា រយៈពេលកំណត់ វាជាការពិបាកមួយដែលមិនអាចទទួលបាន CO នៅក្នុងរយៈពេល២ថ្ងៃផ្លូវការ ។ មានន័យថា យ៉ាងហោចណាស់ ក៏ចំណាយពេល៥ថ្ងៃដែរ ដោយសារតែមានដំណាក់កាលច្រើន គួបផ្សំជាមួយនឹងបន្ទុកការងាររបស់មន្ត្រីច្រើន ។
លោកថា ៖« ដូចយើងបានឃើញអំពីការកំណែទម្រង់របស់ក្រសួង ដែលកំពុងធ្វើការលើការកែលម្អក្នុងការជួយកាត់បន្ថយការចំណាយមិនចាំបាច់ផ្សេងៗ ។ ប៉ុន្តែកម្រៃសេវារដ្ឋបាលផ្លូវការសម្រាប់ CO (៥០ដុល្លារអាមេរិក/CO ទម្រង់ A, ៣០ដុល្លារអាមេរិក/CO ទម្រង់ N) ក៏គួរកាត់បន្ថយដែរ » ។
លោកបន្តថា ៖« វាក៏មានសារសំខាន់ផងដែរក្នុងការលុបបំបាត់ថ្លៃសេវាផ្លូវការមួយចំនួនដែលមិនទាន់មានហេតុផលនៅឡើយទេ ដូចជា កម្រៃគ្រប់គ្រងការនាំចេញ ។ ការយកកម្រៃរបស់ខាងកាំកុងត្រូល ក៏បានរួមចំណែកជំរុញដល់ការកើនឡើងនៃការចំណាយថ្លៃដើមនៃការនាំចេញ នាំចូលខ្ពស់ ហើយនេះក៏គួរតែត្រូវបានគេមើលឃើញផងដែរ » ។
កាណាដា គឺជាទីផ្សារសំខាន់មួយសម្រាប់ការនាំចេញសម្លៀកបំពាក់ និងស្បែកជើងរបស់កម្ពុជា ។ នៅក្នុងឆ្នាំ២០១៦ ប្រទេសនេះបានស្រូបយកជិត៨%នៃការនាំចេញសម្លៀកបំពាក់និងស្បែកជើងរបស់កម្ពុជា កើនឡើងពី៧,៥% នៅក្នុងឆ្នាំ២០១៥ និងត្រឹមតែ០,៥%ប៉ុណ្ណោះកាលពីឆ្នាំ២០១០ ។
កាលពីឆ្នាំមុន ការនាំចេញផលិតផលកាត់ដេរ និងស្បែកជើងរបស់កម្ពុជា បានបន្តកើនឡើងប្រមាណ៧,២% ក្នុងទឹកប្រាក់ប្រមាណជា៧,៣ពាន់លានដុល្លារ ដោយបានកើនឡើងពីចំនួន៦,៨ពាន់លានដុល្លារនៅឆ្នាំ២០១៥ ៕
ចែករំលែកព័តមាននេះ