រាជធានីភ្នំពេញ ៖ ស្ត្រីម្នាក់បានរងរបួសយ៉ាងធ្ងន់ និងត្រូវបានគេបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ខណៈពេលដែលនាង កំពុងជិះម៉ូតូម៉ាក Today មួយគ្រឿងទៅឈប់នៅចំណុចភ្លើងស្តុបមួយកន្លែង ពេលនោះស្រាប់តែមានរថយន្តដឹកកុងតឺន័រមួយគ្រឿងបានបើកបរទៅដល់ បានបត់ឆ្លងផ្លូវមិនប្រយ័ត្ន ក៏បានកៀរម៉ូតូរបស់នាង និងរូបនាង រួចកៀបផ្ទប់ទៅនឹងរថយន្តម៉ាក MAZDA មួយគ្រឿងទៀត ដែលកំពុងឈប់ត្រង់ចំណុចភ្លើងស្តុបទន្ទឹមនឹងរូបនាងដែរនោះ ។
ទោះជាបែបណានេះ ក៏បានចាត់ទុកថាជាសំណាងហើយ ដែលស្ត្រីខាងលើ គ្រាន់តែរងរបួសមិនដល់ថ្នាក់ស្លាប់បាត់បង់ជីវិត ព្រោះត្រូវបានរថយន្តធុនយក្សមួយគ្រឿងនោះឈប់ទាន់ កុំអីជនរងគ្រោះ ប្រាកដជាត្រូវរថយន្តកៀបស្លាប់មិនខាន់ ។
ហេតុការណ៍នេះបានកើតឡើងកាលពីវេលាម៉ោង១០និង២៥នាទីព្រឹក ថ្ងៃទី១០ ខែសីហា ឆ្នាំ២០១៧ នៅលើកំណាត់ផ្លូវវ៉េងស្រង ត្រង់ចំណុចភ្លើងស្តុប ស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មាន បានឲ្យដឹងថា ៖ ជនរងគ្រោះមិនត្រូវបានគេស្គាល់ឈ្មោះឡើយ ហើយនៅមុនពេលកើតហេតុ គេបានឃើញនាងជិះម៉ូតូមួយគ្រឿងម៉ាក Today ពណ៍ឈាមជ្រូក គ្មានស្លាកលេខ ធ្វើដំណើរតាមបណ្តោយផ្លូវមួយកន្លែង សំដៅឡើងទៅកាន់ផ្លូវវ៉ងស្រេង ក្នុងទិសដៅពីត្បូងទៅជើង ។ ខណៈពេលទៅដលត្រង់់ចំណុចកើតហេតុ ដោយសារតែភ្លើងស្តុបពណ៍ក្រហម នាងបានឈប់ចាំក្បែររថយន្តមួយគ្រឿងទៀតម៉ាក Mazda ពណ៌ទឹកប្រាក់ ពាក់ស្លាកលេខ ភ្នំពេញ ២Y-៥១៨៨ រង់ចាំភ្លើងស្តុបលោតខៀវ ដើម្បីបន្តដំណើរទៅមុខទៀត ។
ប្រភពខាងលើបានបន្តថា ៖ លុះបន្តិចក្រោយមក ស្រាប់តែមានរថយន្តមួយគ្រឿងទៀត ពណ៍សឆ្នូតលឿងលាយខៀវ ពាក់ស្លាកលេខ ភ្នំពេញ ៣A-២៤២៧ ជារថយន្តកុងតឺន័រ ធ្វើដំណើរតាមបណ្តោយផ្លូវវ៉េងស្រេង ក្នុងទិសដៅពីកើតទៅលិច ។ បន្ទាប់មករថយន្តកុងតឺន័រនោះ បានបើកបត់ឆ្វេងទៅទិសខាងត្បូងចូលទៅតាមផ្លូវបេតុងរោងចក្រដំបូលខៀវ ហើយដោយសារតែកន្ទុយរថយន្តកុងតឺន័រនោះវែងពេក ក៏បានកៀរម៉ូតជនរងគ្រោះកៀបផ្ទប់ជាមួយរថយន្ត MAZDA បណ្ដាលឲ្យស្ត្រីអ្នកជិះម៉ូតូនោះ រងរបួសយ៉ាងធ្ងន់ធ្ងរតែម្ដង ។
ក្រោយពេលកើតហេតុ ជនរងគ្រោះត្រូវបានបញ្ជូនទៅសង្គ្រោះភ្លាមៗ ចំណែកនគរបាលមូលដ្ឋានក៏បានចុះទៅធ្វើការសម្រួលចរាចរ កុំឲ្យមានការកកស្ទះ ដោយឡែកភាគីរថយន្តបង្កបានធ្វើការសម្របសម្រួលជាមួយខាងក្រុមគ្រួសារស្ត្រីរងគ្រោះ រួមជាមួយខាងម្ចាស់រថយន្ត MAZDA ដើម្បូបញ្ចប់រឿងនៅនឹងកន្លងកើតហេតុនោះតែម្ដង ៕
ចែករំលែកព័តមាននេះ