រាជធានីភ្នំពេញ ៖ « នៅពេលយើងមិនចេះបច្ចេកវិទ្យា ឬក៏ព័ត៌មានវិទ្យា វាប្រៀបដូចជាយើងជាមនុស្សងងឹតភ្នែក ដែលមិនបានទទួលព័ត៌មានអ្វីទាំងអស់ ជាពិសេស គឺធ្វើឲ្យការងារនៅស្ថាប័ននានា និងការសិក្សាតាមមហាវិទ្យាល័យមិនមានភាពរលូនផងដែរ » ។ នេះគឺជាការលើកឡើងរបស់កញ្ញា ហុង ដានេ អាយុ២០ឆ្នាំ ជានិស្សិតនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ។
និសិត្សដែលកំពុងសិក្សាជំនាញផ្នែកនីតិសាស្ត្ររូបនេះបានបន្តថា ៖« សម័យនេះ គឺជាសម័យបច្ចេកវិទ្យា ដែលតម្រូវឲ្យចេះប្រើប្រាស់កុំព្យូទ័រ និងស្មាតហ្វូនសម្រាប់បម្រើការងារ និងការសិក្សា មិនមែនគ្រាន់តែកាន់ដើម្បីភាពសង្ហាទេ ។ ខ្ញុំមើលឃើញថា នៅពេលយើងចេះប្រើបចេ្ចកវិទ្យា ទោះបីជាមិនសិក្សាយកជំនាញ software បង្កើតគេហទំព័រ ឬក៏កម្មវិធីធំៗសម្រាប់បម្រើវិស័យឧស្សាហកម្មក្តី តែយុវវ័យចាំបាច់ត្រូវចេះជំនាញបច្ចេកវិទ្យា យ៉ាងហោចណាស់ ក៏អាចមានចំណេះចេះប្រើប្រាស់រាល់កម្មវិធីរបស់ស្មាតហ្វូន នោះពិភពលោកគឺស្ថិតក្នុងដៃអ្នកសម្រាប់ការស្រាវជ្រាវនានា និងការសិក្សានៅមហាវិទ្យាល័យផងដែរ » ។
កញ្ញាបានបន្តទៀតថា បើនិយាយពីបច្ចេកវិទ្យា គឺមានច្រើនផ្នែកច្រើនជំនាញ តែមិនថាអ្នកពូកែផ្នែកបចេ្ចកវិទ្យាខាងឧស្សាហកម្ម ឬបណ្តាញទំនាក់ទំនង ឬក៏បចេ្ចកវិទ្យាក្នុងវិទ្យាសាស្ត្រសុខាភិបាលនោះទេ គឺសុទ្ធតែមានគុណតម្លៃខ្ពស់ក្នុងការអភិវឌ្ឍធនធានមនុស្ស និងប្រទេសជាតិ ។
ថ្មីៗនេះផងដែរ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអញ្ជើញទៅបំពេញទស្សនកិច្ចផ្លូវការនៅប្រទេសជប៉ុន កាលពីថ្ងៃទី៦ ដល់៩ ខែសីហា ឆ្នាំ២០១៧ ក៏បានជំរុញ និងលើកទឹកចិត្តឲ្យយុវជនកម្ពុជា ត្រូវពង្រឹងសមត្ថភាពផ្នែកជំនាញបច្ចេកវិទ្យា ដើម្បីជួយដល់ការអភិវឌ្ឍប្រទេសកម្ពុជាផងដែរ ។
នៅឯពិធីជួបសំណេះសំណាលជាមួយនិស្សិតខ្មែរជាង២៥០នាក់ ក្នុងនោះរួមមានក្រុមគ្រួសារ និស្សិតមកពីទីក្រុងផ្សេងៗនៃប្រទេសជប៉ុនថា ៖«សម្តេចសូមកោតសរសើរ និងផ្តាំផ្ញើដល់និស្សិត និងកម្មសិក្សាការីទាំងអស់ ត្រូវខិតខំប្រឹងប្រែងក្រេបយកចំណេះដឹង ចំណេះធ្វើ ជាពិសេស ជំនាញបច្ចេកវិជ្ជាដើម្បីយកទៅបម្រើប្រទេសជាតិ » ។
សូមបញ្ជាក់ថា នៅក្នុងដំណើរទស្សនកិច្ចផ្លូវការរបស់សម្តេចតេជោពេលនោះ គឺដើម្បីរឹតចំណងមិត្តភាព និងកិច្ចសហប្រតិបត្តិការទ្វេភាគីរវាងប្រទេសទាំងពីរឲ្យកាន់តែស្អិតរមួត និងដើម្បីជំរុញ និងបង្កើនទំហំពាណិជ្ជកម្មឲ្យកាន់តែខ្លាំងឡើង ។ សម្តេចតេជោ ក៏បានជំរុញឲ្យមានការវិនិយោគលើបច្ចេកវិទ្យា ដោយផ្តោតលើវិស័យឧស្សាហកម្មកែច្នៃឲ្យបានច្រើនដែលបង្កើតការងារកាន់តែច្រើនដល់ប្រជាពលរដ្ឋ និងបង្កើនចំណូលថវិកាជាតិកាន់តែខ្ពស់ ។
ប្រមុខរាជរដ្ឋាភិបាលថ្មីៗនេះ ក៏បានលើកឡើងពីសារសំខាន់នៃបច្ចេកវិទ្យាសម្រាប់ការងាររដ្ឋបាល និងការដឹកនាំប្រទេសផងដែរ ។ សម្តេចតេជោ ហ៊ុន សែន កាលពីចុងឆ្នាំ២០១៦ ក្នុងឱកាសសម្ពោធអគារទីស្តីការក្រសួងប្រៃសណីយ៍ និងទូរគមនាគមន៍ បានជំរុញឲ្យមន្ត្រីទាំងអស់ត្រូវចេះបច្ចេកវិទ្យា និងព័ត៌មានវិទ្យាឲ្យបានទូលំទូលាយ ឬយ៉ាងហោចណាស់ ចេះប្រើស្មាតហ្វូន និងកម្មវិធីក្នុងស្មាតហ្វូនសម្រាប់ទំនាក់ទំនងការងាររដ្ឋបាលនានា ។
សម្តេចនាយករដ្ឋមន្ត្រីបានមានប្រសាសន៍ថា តាមរយៈកម្មវិធីស្មាតហ្វូតជាច្រើនក្នុងទូរស័ព្ទដៃរបស់សម្តេច គឺសម្តេចបានប្រើប្រាស់សម្រាប់ការបំពេញការងាររាល់ថ្ងៃក្នុងការទំនាក់ទំនងមន្ត្រីរាជរដ្ឋាភិបាល និងការដាក់ចេញនូវបទបញ្ជានានា។
សម្តេចតេជោ នាយករដ្ឋមន្ត្រីបានសង្កត់ធ្ងន់នៅពេលនោះថា បើទោះបីជាបច្ចេកវិទ្យាឈានដល់កម្រិតខ្ពស់ក៏ដោយ តែបើមនុស្សមិនចេះប្រើប្រាស់វាទេ វាគ្មានអ្វីល្អប្រសើរទេ ។ ដូច្នេះ ប្រសិនបើមន្ត្រីរាជការណាម្នាក់មិនចេះប្រើប្រាស់បច្ចេកវិទ្យាទេ ពួកគេនឹងមិនត្រូវបានដំឡើងឋានៈតួនាទីទេ ។
យ៉ាងណាមិញ តាមស្ថាប័នក្រសួងមួយចំនួនមានការធ្វើឲ្យប្រសើរឡើងនូវប្រព័ន្ធបចេ្ចកវិទ្យា ដូចជា ក្រសួងពាណិជ្ជកម្ម សម្រាប់ការចុះបញ្ជីពាណិជ្ជកម្មតាមប្រព័ន្ធស្វ័យប្រវត្តិកម្ម ក៏ដូចជាក្រសួងសាធារណការ និងដឹកជញ្ជូន ដែលបានដាក់ឲ្យដំណើរការជាផ្លូវការនូវប្រព័ន្ធស្វ័យប្រវត្តិកម្មចុះបញ្ជីយានជំនិះ ត្រួតពិនិត្យលក្ខណៈបចេ្ចកទេសយានជំនិះ ផ្តល់ប័ណ្ណបើកយានយន្ត និងកម្មវិធីយល់ដឹងអំពីទ្រឹស្តីនៃការបើកលើទូរស័ព្ទជាដើម ។ ទន្ទឹមនឹងនេះ ក្រសួងពាណិជ្ជកម្មក៏បាននិងកំពុងធ្វើសេចក្តីព្រាងច្បាប់ស្តីអំពី E-commerce ផងដែរ ។
កញ្ញា កែវ គូនីឡា វ័យ២៩ឆ្នាំ ជានិស្សិតដែលបានបញ្ចប់ការសិក្សាថ្នាក់អនុបណ្ឌិត ផ្នែកគោលនយោបាយសាធារណៈពីសាលា លី ក្វាន់ យូ (Lee Kuan Yew School) នៃសាកលវិទ្យាល័យជាតិសិង្ហបុរី បច្ចេកវិទ្យា ឲ្យដឹងថា បច្ចេកវិទ្យា គឺជាអ្វីដែលយុវជនគួរតែក្រសោបយកជាចាំបាច់ ។
កញ្ញាបានបញ្ជាក់ថា ៖« ជាការពិតណាស់ សម័យនេះ គឺជាសម័យបច្ចេកវិទ្យា ហើយបច្ចេកវិទ្យានេះហើយ ជួយឲ្យយើងរៀនសូត្រ និងធ្វើការកាន់តែមានភាពរលូន និងលទ្ធផលល្អ។ ហេតុនេះហើយយុវជននានាគួរចាប់យកបច្ចេកវិទ្យាណាដែលមានប្រយោជន៍ចំពោះការងារ និងការរៀនសូត្ររបស់ខ្លួន » ។
នៅពេលត្រូវបានសួរថា បើសិនជាយុវជនមានជំនាញខាងបច្ចេកវិទ្យាខ្ពស់តាមវិស័យនីមួយៗ តើវារួមចំណែកដល់ការអភិវឌ្ឍសេដ្ឋកិច្ចប្រទេស ឬយ៉ាងណានោះ កញ្ញា កែវ គូនីឡា នាយកគ្រប់គ្រងក្រុមហ៊ុនទំនាក់ទំនង REDHILL Communications បានឲ្យដឹងថា នៅអាស៊ានសព្វថ្ងៃនេះ គេចាប់ផ្តើមនិយាយអំពី សេដ្ឋកិច្ចឌីជីថល (digital economy) ដែលជួយលើកស្ទួយវិស័យសេដ្ឋកិច្ចរបស់ប្រទេសនីមួយៗបន្ថែមទៀត ដោយសារវាអាចជួយបង្កើនកម្រិតនៃផលិតកម្ម (productivity level) របស់វិស័យនីមួយៗ ។ ម្យ៉ាងទៀត ជំនាញខាងផ្នែកបច្ចេកវិទ្យារបស់ប្រទេសមួយនឹងអាចទាក់ទាញវិនិយោគផ្សេងៗឲ្យចូលមក និងផ្តល់ការងារជាច្រើនដល់យុវជនដែលមានជំនាញខាងផ្នែកនោះ ។
កញ្ញា កែវ គូនីឡា បានបន្ថែមថា ៖« ការយល់ដឹងពីបច្ចេកវិទ្យា ធ្វើឲ្យការងាររបស់ខ្លួនកន្លងមក និងថ្មីៗនេះមានភាពរលូន និងមានលទ្ធផលល្អៗជាច្រើន ។ មានចំណេះបច្ចេកវិទ្យាជាច្រើនណាស់លើលោកយើងនេះ ប៉ុន្តែយើងគួរចេះជ្រើសរើសយកបច្ចេកវិទ្យាណាមួយដែលយើងចូលចិត្ត ហើយយើងអាចយកមកប្រើប្រាស់ ដើម្បីអភិវឌ្ឍន៍ខាងផ្នែកការសិក្សា និងការងារប្រចាំថ្ងៃរបស់យើង » ។
យុវជន ក សំណាង ដែលបានបញ្ចប់ការសិក្សាផ្នែកព័ត៌មានវិទ្យា និងកំពុងបម្រើការនៅស្ថាប័នមួយក្នុងរាជធានីភ្នំពេញ ហាក់យល់ស្របនឹងការលើកឡើងរបស់ថ្នាក់ដឹកនាំកំពូលថា ជំនាញបច្ចេកវិទ្យា គឺមានសារសំខាន់ណាស់ក្នុងយុគសម័យទំនើបនេះ ។
យុវជន ក សំណាង និយាយថា ក្នុងពេលបច្ចុប្បន្ន បច្ចេកវិទ្យាមានការជឿនលឿនយ៉ាងខ្លាំង ជាពិសេសវាត្រូវបានគេយកមកប្រើប្រាស់លើគ្រប់វិស័យ ។ អ្នកជំនាញខាងផ្នែកព័ត៌មានវិទ្យារូបនេះបន្តថា បចេ្ចកវិទ្យា គឺរួមចំណែកដោះស្រាយនូវបញ្ហា និងសកម្មភាពរបស់មនុស្សបានជាច្រើន ។
យុវជនរូបនេះបន្តទៀតថា ៖«គ្រប់វិស័យទាំងអស់ ប្រសិនបើគ្មានបច្ចេកវិទ្យានោះ ការគ្រប់គ្រង ក៏ដូចជាដំណើរការការងារនឹងមានភាពលំបាក ។ ទស្សនៈរបស់ខ្ញុំគឺថា គ្រប់ប្រទេស និងប្រជាជនទាំងអស់ ប្រសិនបើមានការយល់ដឹងពីបច្ចេកវិទ្យា នោះវានឹងអាចជួយអភិវឌ្ឍន៍ប្រទេសជាតិ ក៏ដូចជាចំណេះដឹងផ្ទាល់ខ្លួន និងអាចជួយដោះស្រាយបញ្ហាមួយចំនួនមានប្រសិទ្ធភាព និងឆាប់រហ័សជាងមុន » ។
យ៉ាងណាមិញ ខាងវិស័យសារព័ត៌មានវិញក៏មានការប្រែប្រួលយ៉ាងខ្លាំងផងដែរពាក់ព័ន្ធនឹងការវិវត្តនៃបច្ចេកវិទ្យា ។ លោក ម៉េង ឆៃ ដែលធ្វើការខាងវិស័យសារព័ត៌មានអស់រយៈពេលជាង១០ឆ្នាំបានលើកឡើងថា បចេ្ចកវិទ្យាក៏បានវាយលុកខ្លាំងលើវិស័យសារព័ត៌មានផងដែរ ដោយសារតែការទំនាក់ទំនង និងការទទួលព័ត៌មានពីស្ថាប័នរាជរដ្ឋាភិបាលមួយចំនួន ជាពិសេស សាលាដំបូងរាជធានីភ្នំពេញ គឺធ្វើឡើងតាមកម្មវិធីតេឡេក្រាម និងបណ្តាញសង្គមហ្វេសប៊ុកជាដើម ។
លោក ម៉េង ឆៃ បន្ថែមថា ៖«យើងមើលឃើញបច្ចេកវិទ្យាបានដើរឈានមុខក្នុងវិស័យសារព័ត៌មានផងដែរ ដូចជា កកើតនូវសារព័ត៌មានអនឡាញ ការវាយលុកនៃបណ្តាញសង្គមហ្វេសប៊ុក និងកម្មវិធី Apps មួយចំនួនដូចជា WhatsApp, Telegram ឬ line ជាដើម » ។
លោក ម៉េង ឆៃ បន្តទៀតថា ៖« ជាការពិត ស្ថាប័នរដ្ឋមួយចំនួនបានប្រើប្រាស់បច្ចេកវិទ្យា និងកម្មវិធី Apps ក្នុងការចែកចាយព័ត៌មានដល់អ្នកសារព័ត៌មាន ដូចជាស្ថាប័នសាលាដំបូងរាជធានីភ្នំពេញ គឺឈានមុខគេក្នុងការប្រើប្រាស់កម្មវិធីតេឡេក្រាមទំនាក់ទំនងជាមួយអ្នកសារព័ត៌មាន ក៏ដូចជាក្រសួងយុត្តិធម៌ផងដែរ » ៕
ចែករំលែកព័តមាននេះ