សារព័ត៌មានបរទេសផ្សាយថា អ្នកវិទ្យាសាស្ត្រប្រទះឃើញផូស៊ីលត្រីពូជថ្មីនៅភាគខាងលិចឆៀងខាងជើងរបស់រដ្ឋណេវ៉ាដា សហរដ្ឋអាមេរិក គឺជាគ្រោងឆ្អឹងផ្នែកមាត់មានប្រវែងដល់ទៅ២៦សង្ទីម៉ែត្រ ធ្វើឱ្យពួកគេមានជំនឿថា ប្រវែងនៃដងខ្លួនរបស់ត្រីប្រភេទនេះអាចមាន១,៨ម៉ែត្រ មានចង្កាវែង និងធ្មេញមុតស្រួច ។ ឆ្លុះបញ្ចាំងឱ្យឃើញថា វាខាំចំណី រួចលេបចូលពោះស្រដៀងត្រីឆ្លាមបច្ចុប្បន្ន ។
ការរកឃើញនេះចុះផ្សាយក្នុង «Reno Gazette» កាលពីថ្ងៃទី១ សីហា ២០១៧ ខណៈពេលអ្នកវិទ្យាសាស្ត្ររកឃើញជាលើកដំបូងកាលពី៥ឆ្នាំមុនមានឈ្មោះថា «Birgeria Americana» មានជីវិតរស់នៅជាង២៥០លានឆ្នាំមុនក្នុងយុគសម័យ «ទ្រីយ៉ាស៊ីក» (Triassic) ។ ការរកឃើញនេះ គឺជារឿងសំខាន់មួយ ព្រោះអាចជួយឱ្យអ្នកវិទ្យាសាស្ត្រ ចចាប់ផ្តើមយល់លើរូបភាពថា សត្វសាហាវនានាបានវិវឌ្ឍយ៉ាងឆាប់រហ័សក្រោយពីកើតបាតុភូតផុតពូជលើកទី៣នៅលើផែនដីដែលកើតឡើងមុនយុគសម័យទ្រីយ៉ាស៊ីក ។
ភស្តុតាងនានាបញ្ជាក់ថា Birgeria Americana មានជីវិតរស់នៅក្នុងអំឡុងពេលប្រហែល១លានឆ្នាំ ក្រោយពីផុតពូជដ៏ធំធេងធ្វើឱ្យសត្វទឹកជាង៩០%បាត់ពីផែនដី ។ ក្រៅពីនេះ សម្តែងឱ្យឃើញថា ត្រីដ៏ធំអាចមានជីវិតនៅក្នុងទឹកក្តៅឧណ្ហៗដែលធ្លាប់រស់នៅដូចសត្វដទៃទៀត ប៉ុន្តែនៅសម័យនោះទឹកនៅក្បែរខ្សែអេក្វាទ័រលើដែនដីដែលក្លាយជារដ្ឋណេវ៉ាដាបច្ចុប្បន្នអាចមានសីតុណ្ហភាពខ្ពស់ជាង៣៥,៥អង្សាសេដែលត្រីក្នុងសម័យបច្ចុប្បន្នមិនអាចរស់បាន ៕
ចែករំលែកព័តមាននេះ