ផលប៉ះពាល់នៃជំងឺលើសឈាម
ជំងឺលើសឈាមអាចឆក់យកអាយុជីវិតលោកអ្នកបានគ្រប់ពេលវេលាទាំងអស់ បើសិនជាលោកអ្នកធ្វេសប្រហែស មិនយកចិត្តទុកដាក់ក្នុងការថែទាំសុខភាព ។ មានអ្នកជំងឺលើសឈាមមួយចំនួនតែងតែយល់ថា
ជំងឺលើសឈាមអាចឆក់យកអាយុជីវិតលោកអ្នកបានគ្រប់ពេលវេលាទាំងអស់ បើសិនជាលោកអ្នកធ្វេសប្រហែស មិនយកចិត្តទុកដាក់ក្នុងការថែទាំសុខភាព ។ មានអ្នកជំងឺលើសឈាមមួយចំនួនតែងតែយល់ថា ការលេបថ្នាំព្យាបាលជំងឺលើសឈាមអាចបណ្តាលឲ្យកើតមានជំងឺខូចតម្រងនោម ហើយឈប់លេបថ្នាំដោយចិត្តឯង ។
បើតាមការអះអាងរបស់លោកវេជ្ជបណ្ឌិតឈឺ ប្រកប ឯកទេសផ្នែកជំងឺលើសឈាម បេះដូង និងជាប្រធានផ្នែកជំងឺទូទៅនៃមន្ទីរពេទ្យព្រះកុសុមៈ ប្រាប់កោះសន្តិភាពថា មានអ្នកជំងឺលើសឈាមមួយចំនួនតែងតែនិយាយត គ្នាៗថា ការលេបថ្នាំព្យាបាលជំងឺលើសឈាមផ្តល់ផលប៉ះពាល់ដល់តម្រងនោម ទាំងនេះគឺជាការយល់ខុសទាំង ស្រុង។
ការលេបថ្នាំព្យាបាលជំងឺលើសឈាមឲ្យបានទៀងទាត់គឺជួយការពារកុំឲ្យខូចតម្រងនោម ដែលនាំឲ្យមានផលវិបាកទៅថ្ងៃក្រោយ ពិសេសគឺការលាងឈាមដោយសារតែការខូចតម្រងនោមនេះ ។ ដូច្នេះសូមបងប្អូនដែលជាអ្នកជំងឺកុំយល់ច្រឡំ ហើយឈប់លេបថ្នាំព្យាបាលជំងឺលើសឈាមនេះដោយចិត្តឯង ដូចជាពាក្យគេនិយាយតគ្នា ព្រោះវាមិនមែនជាការណ៍ពិត ។
លោកវេជ្ជបណ្ឌិតប្រាប់ឲ្យដឹងអំពីផលប៉ះពាល់នៃជំងឺលើសឈាមថា ដូចដែលលោកអ្នកបានដឹងមកហើយថា ជំងឺលើសឈាមជាឃាតករស្ងៀមស្ងាត់ ដែលអាចឆក់យកជីវិតអ្នកជំងឺបានគ្រប់ពេលវេលា ជាងនេះទៅទៀតជំងឺលើសឈាមក៏បានផ្តល់ផលវិបាកជាច្រើន បើសិនជាមិនព្យាបាលឲ្យបានត្រឹមត្រូវទេនោះ ។
ផលប៉ះពាល់ទាំងនេះមានដូចជា៖
១-អាចប្រឈមទៅនឹងការកើតមានជំងឺស្ទះសរសៃឈាមបេះដូង ។
២-អាចបណ្តាលឲ្យកើតមានជំងឺស្ទះសរសៃឈាមខួរក្បាល ។
៣-អាចប្រឈមទៅនឹងការដាច់សរសៃឈាមខួរក្បាល ។
៤-អាចធ្វើឲ្យស្រវាំងភ្នែក បន្តិចម្តងៗ ហើយឈានដល់ការពិការភ្នែក ។
៥-អាចបណ្តាលឲ្យកើតមានជំងឺបេះដូង ។
៦-អាចបណ្តាលឲ្យកើតមានជំងឺខ្សោយបេះដូង ។
៧-អាចធ្វើឲ្យកើតមានវិបត្តិចង្វាក់បេះដូង ដែលធ្វើឲ្យអ្នកជំងឺញ័រដើមទ្រូង ។
៨-អាចធ្វើឲ្យខូចតម្រងនោម ដែលត្រូវលាងឈាមជាប្រចាំ ។
៩-អាចបណ្តាលឲ្យស្ទះសរសៃឈាមជើង ដែលពេលខ្លះត្រូវកាត់ជើងចោល ដោយសារតែសរសៃឈាមទៅចិញ្ចឹមជើងខូច ។
១០-អាចកើតមានជំងឺភ្លេចភ្លាំង ។
១១-អាចប៉ះពាល់ទៅដល់បញ្ហាផ្លូវភេទជាដើម ។
លោកអ្នកត្រូវចាំថា គ្រប់មនុស្សទាំងអស់ឲ្យតែឈានដល់អាយុ៨០ឡើងទៅអ្នកណាក៏អាចកើតមានជំងឺលើសឈាមដែរ សឹងតែ១០០% ។ ប៉ុន្តែជាទូទៅជំងឺនេះច្រើនតែងកើតមាននៅលើបុរសអាយុចាប់ពី៥០ឡើងទៅ និងស្ត្រី៦៥ឡើងទៅ ។ ជំងឺលើសឈាមគឺមានការទាក់ទងទៅនឹងអាយុកាល ដូច្នេះឈានចូលដល់វ័យចំណាស់ លោកអ្នកគួរតែស្វែងរកជំងឺនេះជាមួយគ្រូពេទ្យជំនាញ ទោះបីជាគ្មានរោគសញ្ញាក៏ដោយ ៕
ចែករំលែកព័តមាននេះ