ការសាងសង់ឡជីវ ឧស្ម័នរួមចំណែកលើកកម្ពស់ជីវភាពប្រជាកសិករ
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការសាងសង់ឡជីវឧស្ម័នជូនប្រជាកសិករនៅតាមជនបទ និងសហគមន៍ បានចូលរួមលើកកម្ពស់កម្រិតជីវភាព
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការសាងសង់ឡជីវឧស្ម័នជូនប្រជាកសិករនៅតាមជនបទ និងសហគមន៍ បានចូលរួមលើកកម្ពស់កម្រិតជីវភាព
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការសាងសង់ឡជីវឧស្ម័នជូនប្រជាកសិករនៅតាមជនបទ និងសហគមន៍ បានចូលរួមលើកកម្ពស់កម្រិតជីវភាពប្រជាកសិករ ដោយការប្រើប្រាស់ឡជីវឧស្ម័នប្រកបដោយនិរន្តរភាព និងចូលរួមអនុវត្តគោលដៅប្រកបដោយចីរភាពនៅកម្ពុជា។
លោក ឡោ រស្មី មន្ត្រីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ប្រាប់កោះសន្តិភាពកាលពីថ្ងៃទី៨ សីហា ម្សិលមិញថា ការអភិវឌ្ឍឡជីវឧស្ម័ននៅកម្ពុជាកំពុងតែដើរតួយ៉ាងសំខាន់ក្នុងការកាត់បន្ថយការបំភាយឧស្ម័នផ្ទះកញ្ចក់ ហើយគោលនយោបាយអភិវឌ្ឍន៍ឡជីវឧស្ម័នកម្ពុជា ឆ្នាំ២០១៦-២០២៥នេះ ស្របទៅតាមគោលនយោបាយយុទ្ធសាស្ត្រចតុកោណដំណាក់កាលទី៣ និងផែនការយុទ្ធសាស្ត្រអភិវឌ្ឍន៍ជាតិ ។
លោកបន្តថា កម្មវិធីឡជីវឧស្ម័នជាតិបានចាប់ផ្តើមតាំងពីឆ្នាំ២០០៦ និងបានសហការជាមួយអង្គការដៃគូប្រមាណ៦ ដោយអនុវត្តនៅតាមខេត្ត-ក្រុងចំនួន១៤ ហើយគិតមកដល់ពេលនេះ ការសាងសង់ឡជីវឧស្ម័នជូនដល់ប្រជាកសិករនៅតាមគោលដៅបានចំនួន២៦.១២៣ឡ ។
លោកបញ្ជាក់ថា ៖« តាមសូចនាករលទ្ធផលដែលត្រូវសម្រេចឱ្យបាននៅត្រឹមឆ្នាំ២០២៥ សម្រាប់ឡជីវឧស្ម័នជាលក្ខណៈគ្រួសារ បានសាងសង់នៅឆ្នាំ២០១៦ មានប្រមាណ២៥ពាន់ឡ, ឆ្នាំ២០២០ មាន៣៣ពាន់ឡ និងដល់ឆ្នាំ២០២៥ មានរហូតដល់៤៣ពាន់ឡ ។ ឡជីវឧស្ម័នថ្នាក់ខ្នាតមធ្យមសាងសង់នៅឆ្នាំ២០១៦ មាន១០០ឡ, ឆ្នាំ២០២០ មាន២០០ឡ និងដល់ឆ្នាំ២០២៥ មាន៥០០ឡ និងឡជីវឧស្ម័នខ្នាតធំ នៅឆ្នាំ២០១៦ ចំនួន១ឡ, ឆ្នាំ២០២០ មាន៣ឡ និងឆ្នាំ២០២៥ មាន៥ឡ » ។
លោក សិន ដារ៉ាវុធ មន្ត្រីសម្របសម្រួលគម្រោងអភិវឌ្ឍន៍ឡជីវឧស្ម័ននៃអង្គការ CEDAC បានឱ្យដឹងថា ៖« មកដល់ពេលនេះ មានខេត្តចំនួន៣ ស្ថិតក្រោមការគ្រប់គ្រងរបស់ CEDAC គឺខេត្តកំពត ព្រៃវែង និងកំពង់ធំ ហើយគិតត្រឹមចុងខែកក្កដា ឆ្នាំ២០១៧កន្លងទៅ យើងសាងសង់ឡជីវឧស្ម័នបាន៧.៤១២ឡជូនប្រជាកសិករ » ។
លោកបន្តថា ៖« សព្វថ្ងៃនេះ ការសាងសង់ ឡជីវឧស្ម័នយើងនេះ មានមិនទាន់ដល់១%នៃចំនួនប្រជាកសិករនៅឡើយទេ ដោយសារកសិករខ្លាចចំណាយលើទុនសាងសង់, ការយល់ដឹង និងការផ្សព្វផ្សាយមិនទាន់ដល់កម្រិត, ការហូរចូលនៃគ្រឿងយន្តកសិកម្ម និងការហូរចេញនៃកម្លាំងពលកម្ម ធ្វើឱ្យកសិករលក់គោ-ក្របីអស់ ជាហេតុធ្វើឱ្យកសិករគ្មានឱកាសសាងសង់ឡ » ។
លោក គល់ ធី កសិករនៅខេត្តតាកែវ ដែកលប្រើប្រាស់ឡជីវឧស្ម័នដំបូងគេក្នុងភូមិដែលលោករស់នៅ បានឲ្យដឹងតាមទូរស័ព្ទកាលពីថ្ងៃទី៨ សីហា ថា ការសង់ឡជីវឧស្ម័ន ពិតជាផ្ដល់ផលប្រយោជន៍ច្រើនយ៉ាង ដែលមិនត្រឹមតែផ្ដល់ប្រភពភ្លើងសម្រាប់ចម្អិនអាហារ និងបំភ្លឺលំនៅឋានប៉ុណ្ណោះទេ ថែមទាំងជាប្រភពជីធម្មជាតិដ៏ល្អដាច់គេសម្រាប់ដាក់ដំណាំស្រូវ និងដំណាំរួមផ្សំនានាទៀតផង ។
លោកនិយាយថា ៖« ខ្ញុំចំណាយធ្វើឡជីវឧស្ម័ននេះអស់ជាង៥០០ដុល្លារ តែខាងអង្គការជួយ១៥០ដុល្លារវិញ នៅសល់ប៉ុន្មាន ខ្ញុំបង់រំលស់តាមគ្រឹះស្ថានមីក្រូហិរញ្ញវត្ថុមួយដែលសហការជាមួយអង្គការនេះ » ។ លោកថា ៖« មុនពេលក្រុមការងារចុះមកធ្វើ គេបានពិនិត្យទីតាំង និងសត្វពាហនៈដែលយើងកំពុងចិញ្ចឹមជាមុនសិន ដើម្បីដឹងថា ត្រូវធ្វើទំហំប៉ុនណា » ។ លោកថា ៖« ដំបូង ខ្ញុំចំណាយធ្វើវាអស់ច្រើនបន្ដិចមែន ប៉ុន្ដែបើធៀបនឹងយើងទិញអុស ទិញធ្យូងប្រចាំខែ គឺយើងចំណេញច្រើន ហើយវាមិនបង្កហានិភ័យអ្វីដូចហ្គាសក្នុងធុង ដែលយើងបារម្ភខ្លាចផ្ទុះនោះទេ ថែមទាំងចម្អិនម្ហូប ដាំទឹកទាន់ចិត្តទៀត » ។
លោកបន្ដថា ក្រៅពីផ្ដល់ប្រភពថាមពលសម្រាប់បំពេញសេចក្ដីត្រូវការក្នុងផ្ទះបាយ និងភ្លើងបំភ្លឺហើយ កម្អែលលាមកសត្វដែលហៀរចេញពីឡ គឺជាប្រភពជីធម្មជាតិដ៏ល្អបំផុតសម្រាប់ដាក់ស្រែចម្ការ ។
លោកនិយាយថា ៖« កម្អែលលាមកសត្វដែលហៀរចេញពីឡនេះ ខ្ញុំយកទៅដាក់ស្រែធ្វើឲ្យដីផុស ស្រូវល្អណាស់ មិនចេះខ្លោចស្រូវ ដោយយកអាចម៍គោទៅដាក់ទាំងដុលនោះទេ ហើយបើយកមកដាក់ដំណាំបន្លែវិញ គឺដឹងតែល្អទាំងដើម ទាំងស្លឹក និងផ្លែធំៗតែម្ដង » ។
លោកបញ្ជាក់ថា បច្ចុប្បន្ន ក្នុងភូមិរបស់លោក មានគ្រួសារកំពុងប្រើប្រាស់ឡជីវឧស្ម័នច្រើន ដោយសារតែវាប្រើទៅស្រួល ព្រោះឃើញលោកប្រើស្រួល ។
តាមរបាយការណ៍ក្រសួងកសិកម្មបង្ហាញថា ដើម្បីសម្រេចនូវទិសដៅនេះ វិធានការគោលនយោបាយចំនួន៥នឹងត្រូវដាក់ចេញមាន ៖
១-បង្កើនធនធានហិរញ្ញវត្ថុ និងថវិកាជាតិឱ្យកើនពីក្នុងរង្វង់៤%នៅឆ្នាំ២០១៦ ដល់១០%យ៉ាងតិចនៅឆ្នាំ២០២៥ នៃថវិកាជាតិហិរញ្ញប្បទានទ្រទ្រង់កម្មវិធីជំរុញផលិតកម្មសត្វ និងសុខភាពសត្វ សម្រាប់ចូលរួមចំណែកអភិវឌ្ឍន៍ឡជីវឧស្ម័ន ។
២-ធានាការចូលរួមឧបត្ថម្ភធនដល់កសិករចិញ្ចឹមសត្វ ដែលអនុវត្តការសាងសង់ និងប្រើប្រាស់ឡជីវឧស្ម័ន ដោយត្រូវផ្តល់ធនធានថវិកាទាបបំផុតប្រមាណ៣០% នៃតម្លៃសាងសង់ក្នុង១ឡជីវឧស្ម័ន ដើម្បីលើកទឹកចិត្តការចូលរួមពីកសិករ ។
៣-លើកទឹកចិត្តដល់ដៃគូអភិវឌ្ឍន៍ចូលរួមឱ្យបានសស្រាក់សស្រាំ ក្នុងការអភិវឌ្ឍឡជីវឧស្ម័ន នៅកម្ពុជា ដោយត្រូវការថវិកាធនធានហិរញ្ញវត្ថុ ក្នុងកម្រិត១០%យ៉ាងតិចនៃគម្រោងអភិវឌ្ឍន៍កម្មវិធីជំរុញផលិតកម្មសត្វ និងសុខភាពសត្វ សម្រាប់ចូលរួមអភិវឌ្ឍន៍ឡជីវឧស្ម័ន ។
៤-លើកទឹកចិត្ត និងជំរុញឱ្យវិស័យឯកជន ពិសេស កសិដ្ឋានចិញ្ចឹមសត្វ និងសត្តឃាតដ្ឋាន ទាំងអស់ចូលរួមសាងសង់ ប្រើប្រាស់ឡជីវឧស្ម័ន និងផ្តល់នូវបទពិសោធន៍ដល់កសិករចិញ្ចឹមសត្វខ្នាតតូច និងមធ្យម បានយល់ដឹងពីការសាងសង់ និងប្រើប្រាស់ឡជីវឧស្ម័ន ។
៥-បង្កើនកិច្ចសហប្រតិបត្តិការជាមួយស្ថាប័នមីក្រូហិរញ្ញវត្ថុ និងធនាគារ ក្នុងការផ្តល់ប្រាក់កម្ចីដល់កសិករដើម្បីគាំទ្រសកម្មភាពអភិវឌ្ឍន៍ឡជីវឧស្ម័ន ពិសេស ជំរុញឱ្យមានការបញ្ចុះការប្រាក់ក្នុងកម្រិតមួយសមរម្យ ៕
ចែករំលែកព័តមាននេះ