រាជធានីភ្នំពេញ ៖ ការដាក់ចេញនូវកម្មវិធីកំណែទម្រង់ និងគោលនយោបាយទីផ្សារសេរី របស់រាជរដ្ឋាភិបាល សំដៅលើកស្ទួយស្ថិរភាពពាណិជ្ជកម្ម និងវិនិយោគ ព្រមទាំងយុទ្ធសាស្ត្រកាត់បន្ថយភាពក្រីក្រ បានធ្វើឲ្យប្រជាពលរដ្ឋទទួលបានអត្ថប្រយោជន៍យ៉ាងច្រើនពីកម្មវិធីកំណែទម្រង់ទាំងនេះ ។ តាមរយៈវឌ្ឍនភាពសេដ្ឋកិច្ចកម្រិតនេះបានផ្តល់ឱកាសដល់ប្រជាពលរដ្ឋកម្ពុជា ក្នុងការទទួលបានផលិតផល និងសេវាកម្មស្ទើរគ្រប់ប្រភេទ ។ ទន្ទឹមជាមួយគ្នានេះ វិនិយោគិនជាតិ និងអន្ដរជាតិ ក៏បានសម្លឹងឃើញឱកាសបោះទុនវិនិយោគជាបន្តបន្ទាប់ ដោយបានបង្កើតការងារ និងផ្ដល់ចំណូលដោយផ្ទាល់ និងប្រយោលដល់ប្រជាពលរដ្ឋខ្មែរមានជីវភាពរស់នៅយ៉ាងសមសម្យ ហើយបរិបទនៃការរស់នៅ ក៏មានការផ្លាស់ប្តូរពីមួយឆ្នាំទៅមួយឆ្នាំ ។
ស្របពេលពលរដ្ឋខ្មែរមានទំនោរទៅលើផលិតផលម៉ាកយីហោល្បីៗ និងលក់នៅកន្លែងទំនើបៗ ក៏បានធ្វើឲ្យការវិនិយោគលើហាងលក់ទំនិញ និងផ្សារទំនើបរីកចម្រើនផងដែរ ជាពិសេសនៅរាជធានីភ្នំពេញ ដោយមានហាង និងផ្សារទំនើបជាច្រើនបាននិងកំពុងលក់ផលិតផលម៉ាកយីហោល្បីៗពីបរទេសស្ទើរគ្រប់ប្រភេទ។ និន្នាការផ្លាស់ប្ដូរបែបផែននៃការរស់នៅនេះ បានធ្វើឲ្យសេដ្ឋីធំៗនៅស្រុកខ្មែរមួយចំនួនងាកមកវិនិយោគបង្កើតផ្សារទំនើប និងហាងលក់ទំនិញលក្ខណៈស្តង់ដា ទាំងហាងដែលបង្កើតក្នុងស្រុក ក៏ដូចជាហាង និងផ្សារទំនើបនាំឈ្មោះពីបរទេស ។
លោកឧកញ៉ា លី យ៉ុងផាត់ ជាសេដ្ឋីដ៏ល្បីឈ្មោះមួយរូបដែលក្តោបក្ដាប់មុខជំនួញជាច្រើនក្នុងដៃ បានបណ្ដាក់ទុននាំយកផ្សារទំនើបពីប្រទេសថៃ ឈ្មោះ Makro Supermarket មកកម្ពុជា ដែលផ្សារទំនើបមួយនេះនឹងចាប់ផ្ដើមដំណើរការលក់ទំនិញនៅចុងឆ្នាំនេះ ។ ផ្សារទំនើបនេះក៏នឹងកាត់បន្ថយនូវការធ្វើដំណើររបស់អាជីវករខ្មែរ ដែលកន្លងមកតែងតែចេញទៅប្រទេសថៃ ដើម្បីនាំចូលទំនិញមកចែកចាយក្នុងស្រុកផងដែរ ។
អ្នកឧកញ៉ា គិត ម៉េង សេដ្ឋីកាន់កាប់មុខជំនួញរាប់សិបក្នុងប្រទេសកម្ពុជា កាលពីពេលថ្មីៗនេះ បានចុះហត្ថលេខានាំយកផ្សារទំនើប EMART ដែលជាបុត្រសម្ព័ន្ធក្រុមហ៊ុន Shinsegac Group របស់ប្រទេសកូរ៉េ មកកម្ពុជា ។ ផ្សារទំនើបនេះនឹងចាប់ផ្ដើមសាងសង់នៅរាជធានីភ្នំពេញ ហើយក្រោយសាងសង់រួចរាល់ ផ្សារទំនើបមួយនេះនឹងលក់ទំនិញល្បីៗពីបរទេស និងទំនិញក្នុងស្រុកផងដែរ ។
លោកឧកញ៉ា ឧស្មានហាស្សាន់ ដែលជាសេដ្ឋីជនជាតិខ្មែរ-អ៊ិស្លាម ក៏បានបោះទុនវិនិយោគលើផ្សារទំនើបដ៏ធំរបស់ប្រទេសម៉ាឡេស៊ីផងដែរ នៅបណ្ដោយមហាវិថីសហព័ន្ធរុស្ស៊ី ដែលផ្សារទំនើបនោះអាចក្លាយជាផ្សារទំនើបធំជាងគេនៅក្នុងប្រទេសកម្ពុជា ។ ផ្សារទំនើបនេះឈ្មោះ ផាកសុន ស្ថិតនៅទីតាំងចំណុចប្រសព្វរវាងខណ្ឌចំនួន៣ គឺខណ្ឌទួលគោក ខណ្ឌ៧មករា និងខណ្ឌដូនពេញ និងជាចំណុចប្រសព្វរវាងអ្នកមាន និងអ្នកមធ្យមផងដែរ ។
អ្នកឧកញ៉ា ពុង ឃាវសែ សេដ្ឋីដ៏លេចធ្លោមួយរូប និងជាវិនិយោគិនសំខាន់មួយនៅកម្ពុជា ក្នុងការទាញវិនិយោគិនបរទេសមកវិនិយោគនៅស្រុកខ្មែរ ក៏មានផ្សារទំនើបមួយចំនួន ដែលអ្នកឧកញ៉ាបានវិនិយោគកន្លងមក និងកំពុងជួសជុលកែលម្អឡើងវិញនូវផ្សារទំនើបទាំងនោះ ដើម្បីប្រកួតប្រជែងយកប្រជាប្រិយភាពវិញ បន្ទាប់ពីផ្សារទំនើបបរទេសហូរចូលក្នុងស្រុកជាបន្តបន្ទាប់ ។ ផ្សារទំនើបធំៗដែលនៅក្រោមការវិនិយោគរបស់អ្នកឧកញ៉ា ពុង ឃាវសែ រួមមាន ផ្សារទំនើបសុវណ្ណា ផ្សារទំនើបសូរិយា និងផ្សារទំនើបរតនាផ្លាហ្សា ប៉ុន្តែបច្ចុប្បន្ននេះ ផ្សារទំនើបទាំងនោះកំពុងតែបាត់បង់អតិថិជនបន្តិចម្ដងៗ ក្រោយពីមានផ្សារទំនើបថ្មីៗពីបរទេសចូលមក ។
លោកជំទាវឧកញ៉ា លឹម ឈីវហូ អ្នកជំនួញស្ត្រីឆ្នើមនៅកម្ពុជា ក៏បានវិនិយោគលើមជ្ឈមណ្ឌលពាណិជ្ជកម្ម និងផ្សារទំនើបជាច្រើននៅរាជធានីភ្នំពេញ ក្នុងនោះមជ្ឈមណ្ឌលពាណិជ្ជកម្ម អ៊ែតវូត ក៏ជាបណ្ដុំហាងទំនើបៗទាំងខ្មែរ និងបរទេសផងដែរ ។
លោកឧកញ៉ា ស្រី ចាន់ថន អ្នកជំនួញលើវិស័យអចលនទ្រព្យ ហាងទំនិញ និងភោជនីយដ្ឋាននៅភ្នំពេញ បានវិនិយោគលើផ្សារកុងតឺន័រដំបូងគេនៅកណ្ដាលរាជធានី និងបានទាក់ទាញភ្ញៀវខ្មែរ និងបរទេសជាច្រើន ហើយកុងតឺន័រនេះដែរ មិនត្រឹមតែជាកន្លែងលក់ទំនិញ និងផលិតផលនោះទេ តែវាក៏ជាកន្លែងដើរកម្សាន្តពេលរាត្រីមួយសម្រាប់អ្នករស់នៅភ្នំពេញ និងតាមខេត្តផងដែរ ។
បើតាមលោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុនស្រាវជ្រាវមួយនៅកម្ពុជា បានឱ្យដឹងថា ការបង្កើតផ្សារទំនើបធំៗពីបរទេស គឺជាឱកាសមួយរបស់កម្ពុជា ដែលអាចផ្ដល់បទពិសោធន៍ ពីរបៀបគ្រប់គ្រងផ្សារទំនើបឱ្យមានស្ថិរភាពយូរអង្វែង មិនមែនតែមួយភ្លែតៗទេ ។
លោកនិយាយថា ៖« ការបង្កើតផ្សារទំនើប ក៏ជាការផ្ដល់ឱកាសការងារជាច្រើនដល់ពលរដ្ឋកម្ពុជាផងដែរ ។ ជាក់ស្ដែង គឺតាំងពីចាប់ផ្ដើមសាងសង់ផ្សាររហូតដល់ផ្សារដំណើរការ គឺសុទ្ធតែត្រូវការកម្លាំងពលកម្ម » ៕
ចែករំលែកព័តមាននេះ