រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្មបានថ្លែងថា បច្ចុប្បន្ន ការប្រើប្រាស់គ្រឿងយន្តក្នុងវិស័យកសិកម្មបានកើនឡើងជិត១០០% ខណៈកម្លាំងពលកម្មក្នុងវិស័យនេះបានធ្លាក់ចុះមកនៅសល់ជាង
រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្មបានថ្លែងថា បច្ចុប្បន្ន ការប្រើប្រាស់គ្រឿងយន្តក្នុងវិស័យកសិកម្មបានកើនឡើងជិត១០០% ខណៈកម្លាំងពលកម្មក្នុងវិស័យនេះបានធ្លាក់ចុះមកនៅសល់ជាង៤០%ប៉ុណ្ណោះ ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងកាលពីថ្ងៃទី៦ សីហា ថា ការប្រើប្រាស់គ្រឿងយន្តក្នុងវិស័យកសិកម្មនាពេលបច្ចុប្បន្នបានកើនដល់ប្រមាណ៩៦% ដែលធ្វើឲ្យវិស័យនេះទទួលបានតម្លៃបន្ថែមកាន់តែច្រើន តាមរយៈការកាត់បន្ថយការប្រើប្រាស់កម្លាំងពលកម្ម ដែលធ្វើឲ្យមានការចំណាយខ្ពស់ ។ លោកបន្តថា ជាមួយគ្នានេះ ការប្រើប្រាស់កម្លាំងពលកម្មក្នុងវិស័យនេះ បានធ្លាក់ចុះពីជាង៨០%នៅដើមទសវត្សរ៍៩០ មកនៅត្រឹមប្រមាណ៤១%ផងដែរនាពេលបច្ចុប្បន្ន។
លោកបន្តថា ៖« នេះជានិន្នាការធម្មតា មិនមានអ្វីគួរឲ្យព្រួយបារម្ភឡើយ ព្រោះនៅពេលប្រទេសរីកចម្រើន កម្លាំងពលកម្មក្នុងវិស័យកសិកម្មតែងតែធ្លាក់ចុះ ហើយជំនួសវិញដោយវិស័យបច្ចេកវិទ្យា » ។ លោកបន្តថា ៖«បច្ចុប្បន្ន នៅប្រទេសជឿនលឿន មិនត្រឹមតែប្រើប្រាស់គ្រឿងយន្តសម្រាប់ស្ទូងនោះទេ តែពួកគេបានវិវត្តន៍ពីការស្ទូងពេលមានទឹក មកជាការស្ទូងស្ងួតឬបុកដាំ ដែលជៀងវាងបាននូវការប្រឡាក់ប្រឡូស » ។
លោក វេង សាខុន បន្ថែមថា ជាមួយកំណើននៃផលិតផលកសិកម្ម លោករំពឹងថា ឆ្នាំនេះ កម្ពុជាទទួលបានទិន្នផលស្រូវលើសជាង១០លានតោនដើម្បីឆ្លើយតបតម្រូវការទីផ្សារ និងការនាំចេញអង្ករ ដែលការបញ្ជាទិញកើនឡើងផងដែរ ។ ជាក់ស្តែង ក្នុងសប្តាហ៍នេះ ប្រទេសបង់ក្លាដែសគ្រោងទិញអង្ករពីកម្ពុជា ចំនួន១លានតោនក្នុងរយៈពេល៥ឆ្នាំ គិតចាប់ពីឆ្នាំនេះ ដល់ឆ្នាំ២០២១ខាងមុខ ។
ជាមួយកំណើនព្យាករនេះ លោក វេង សាខុន ឲ្យដឹងថា បច្ចុប្បន្ន ក្រសួងបាននិងកំពុងដាក់ឲ្យប្រើប្រាស់ពូជស្រូវថ្មីមួយទៀតឈ្មោះ ខា១៤ ខា១៥ និងខា១៦ ជាប្រភេទស្រូវមានសភាពធន់នឹងជំងឺ និងអាកាសធាតុ សម្រាប់ឲ្យកសិករប្រើប្រាស់ផងដែរ ។ ទោះជាយ៉ាងណា ពូជស្រូវថ្មីនេះមិនទាន់បានចែកចាយទូលំទូលាយនៅឡើយទេ ប៉ុន្តែក្រសួងកំពុងខិតខំពង្រីកពូជស្រូវប្រភេទថ្មីនេះ និងពូជដទៃទៀត តាមរយៈការធ្វើកិច្ចសន្យាជាមួយសហគមន៍មួយចំនួន ដើម្បីផលិតពូជស្រូវសុទ្ធឲ្យបានល្អសម្រាប់ចែកចាយដល់ប្រជាពលរដ្ឋផងដែរ ។
លោកឧកញ៉ា សុង សារ៉ន អគ្គនាយកក្រុមហ៊ុន Amru Rice បានថ្លែងថា លោកពិតជាមើលឃើញភាពរីកចម្រើនក្នុងវិស័យកសិកម្ម ដោយកសិករបានងាកចេញពីការប្រើប្រាស់សត្វពាហនៈ មកប្រើប្រាស់គ្រឿងយន្តកាន់តែច្រើន ។ និន្នាការនេះបានធ្វើឲ្យបរិមាណនៃការដាំដុះកើនឡើង ចំណេញពេលវេលា ស្រូវផលិតបានរបស់កសិករមានគុណភាពល្អជាងមុន តាមរយៈការកាត់បន្ថយពេលវេលាច្រូត ក៏ដូចជាកាត់បន្ថយការធ្លាក់គ្រាប់ស្រូវពេលប្រមូលផលច្រើន ។
លោកបន្តថា ៖« បច្ចុប្បន្ន កម្លាំងពលកម្មក្នុងវិស័យនេះថ្លៃ ដោយសារកម្លាំងពលកម្មវ័យក្មេងបានងាកមកធ្វើការក្នុងវិស័យឧស្សាហកម្ម ។ ហេតុនេះ ការងាកទៅប្រើប្រាស់គ្រឿងចក្ររបស់កសិករពិតជាល្អប្រសើរ » ។ លោកបន្តថា ៖« ទោះជាយ៉ាងណា មិនទាន់មានការសិក្សាណាមួយរកឃើញថា ការប្រើប្រាស់គ្រឿងចក្រ និងកម្លាំងពលកម្មក្នុងវិស័យកសិកម្ម មួយណាចំណេញជាងនោះទេ » ។
តាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា រយៈពេល៦ខែដើមឆ្នាំនេះ ការប្រើប្រាស់គ្រឿងយន្តសម្រាប់ផលិតកម្មកសិកម្ម គឺមាននិន្នាការកើនឡើងដល់៩១,១៧% បើធៀបនឹងការប្រើប្រាស់គោ-ក្របី មានត្រឹមតែ៨,៨៣%ប៉ុណ្ណោះ ។
របាយការណ៍បញ្ជាក់ថា ផ្ទៃដីភ្ជួររាស់សម្រេចបានចំនួន១.៦៨៩.៨៤៩ហិកតា ក្នុងនោះភ្ជួររាស់ដោយគោ-ក្របីចំនួន៥៤.២៧៦ហិកតា និងគ្រឿងយន្តកសិកម្មចំនួន១.៦៣៥.៥៧៣ហិកតា កើនឡើងលើសឆ្នាំមុន ២០៧.៤១៣ហិកតា ៕
ចែករំលែកព័តមាននេះ